ბათუმის შოთა რუსთაველის სახელმწიფო უნივერსიტეტში ევროპის დღე რამდენიმე ღონისძიებით აღინიშნა. კვირეული ისტორიის სპეციალობის სტუდენტთა კონფერენციით -„ევროპა და საქართველო“ გაიხსნა. შედგა ფილმის „მოგზაურობა ეროპაში“ ჩვენება. უმაღლესი საგანმანათლებლო დაწესებულების წარმომადგენლებმა სტუდენტებს საზღვარგარეთ სწავლის პირობები გააცნეს და გაცვლითი პროგრამების შესახებ პრეზენტაციები წარუდგინეს.

საზოგადოებრივ საქმეთა ინსტიტუტის, კავკასიის უნივერსიტეტისა და ივ. ჯავახიშვილის სახელობის თბილისის სახელმწიფო უნივერსიტეტის პროფესორმა ქეთევან მუხიგულმა საჯარო ლექცია-სემინარი წაიკითხა თემაზე: „ადამიანის უფლებები, თავისუფლება და მოვალეობა დემოკრატიულ და არადემოკრატიულ პოლიტიკურ რეჟიმებში“. ჰუმანიტარულ მეცნიერებათა ფაკულტეტის არაფორმალური განათლების ცენტრის მიერ ორგანიზებული ორდღიანი საჯარო ლექცია აჭარის ა.რ. განათლების, კულტურისა და სპორტის სამინისტროს „უმაღლესი განათლების ხელშეწყობის“ ქვეპროგრამის ფარგლებში ტარდება. სემინარის დასასრულს მონაწილე სტუდენტებს სერტიფიკატები გადაეცათ.

27 აპრილს, ბათუმის შოთა რუსთაველის სახელმწიფო უნივერსიტეტის ფილოსოფიის სპეციალობის სტუდენტებთან პროექტის „სტუმარი ლექტორის ვიზიტი“-ს ფარგლებში სამუშაო შეხვედრა გაიმართა თსუ-ს პროფესორ ქეთევან მუხიგულთან. შეხვედრის თემა ეროვნულ და ეთნიკურ უმცირესობათა უფლებებს შეეხებოდა, კერძოდ კი სახელმწიფო ენის სწავლების და მასთან დაკავშირებულ პრობლემებს. სტუდენტებს საშუალება მიეცათ უფრო ღრმად გაცნობოდნენ ეროვნულ უმცირესობებთან არსებულ პრობლემებს და სახელმწიფოს ვალდებულებებს საერთაშორისო ორგანიზაციებთან.

ბათუმის შოთა რუსთაველის სახელმწიფო უნივერსიტეტის საგამოცდო ცენტრში ზოგადი უნარების იმიტირებული გამოცდები გაიმართა. ერთიანი ეროვნული გამოცდების იმიტირებულ ტესტირებაში ბათუმისა და რეგიონის 400-მდე აბიტურიენტი მონაწილეობდა. გამოცდები ჰუმანიტარული ფაკულტეტზე არსებული „არაფორმალური განათლების ცენტრის’’ ორგანიზებით ჩატარდა და ერთი კვირის განმავლობაში მიმდინარეობდა. ტესტირების მიზანი აბიტურიენტების ერთიანი ეროვნული გამოცდებისათვის მომზადება იყო.

თურქეთის რესპუბლიკის აბანთ იზეთ ბაისალის უნივერსიტეტის თურქული ენის მიმართულების ხელმძღვანელმა დოქტორმა ჰალით ქარათაიმ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა. ჰალით ქარათაიმ აღმოსავლეთმცოდნეობის დეპარტამენტის პროფესორ-მასწავლებლებსა და თურქეთისმცოდნეობის სპეციალობის სტუდენტებს კალიგრაფიის ხელოვნება და მისი ასახვა პოეზიაში გააცნო.