კომპიუტერულ მეცნიერებათა დეპარტამენტის ხელმძღვანელს, პროფესორ დავით დევაძეს დაბადებიდან 60 წელი შეუსრულდა. ზუსტ მეცნიერებათა და განათლების ფაკულტეტის მთელი შემადგენლობა ვულოცავთ ბატონ დავითს საიუბილეო თარიღს და ვუსურვებთ ჯანმრთელ, დღეგრძელ სიცოცხლეს, წარმატებებს პირად და საზოგადოებრივ საქმიანობაში.

ერასმუს+-ის პროექტის „კურიკულუმის რეფორმა სამოქალაქო განათლებისა და დემოკრატიული პრინციპების განვითარების ხელშეწყობისათვის ისრაელსა და საქართველოში“ („Curriculum Reform for Promoting Civic Education and Democratic Principles in Israel and in Georgia“ – CURE) თანამშრომლობითი შეფასების ფარგლებში, ბათუმის შოთა რუსთაველის სახელმწიფო უნივერსიტეტს CURE-ს ესტონელი პარტნიორები ეწვივნენ. იან ტონისონის ინსტიტუტის სამოქალაქო განათლების ცენტრის წარმომადგენლები, CURE-ს ინსტიტუციური მენეჯერი ესტონეთში სულევ ვალდმაა და კურიკულუმის ექსპერტი ურვე ლაანემეტსი პროექტის მონაწილეებს შეხვდნენ და პროექტის მიმდინარე შედეგები განიხილეს. სამდღიანი ვიზიტის ფარგლებში დაგეგმილია შეხვედრები სხვადასხვა სამიზნე ჯგუფთან, მათ შორის სპეციალური (სმს) მობილობის მონაწილეებთან. სტუმრები „სამოქალაქო განათლების მეთოდიკის“ სასწავლო კურსის ფარგლებში ჩატარებულ პრაქტიკულ მეცადინეობას დაესწრნენ.

სასწავლო კურსის „გეოგრაფიისა და ასტრონომიის ელემენტები“ ფარგლებში, ასისტენტ პროფესორ ცირა ქამადაძის ორგანიზებით ბათუმის შოთა რუსთაველის სახელმწიფო უნივერსიტეტის დაწყებითი განათლების სპეციალობის სტუდენტები აჭარის სახელმწიფო მუზეუმს ეწვივნენ. ვიზიტის ფარგლებში მომავალი პედაგოგები გაეცნენ ძვ. წ. XII – IX საუკუნეებისა და VII - IV საუკუნეების უნიკალურ არქეოლოგიურ მასალებს, ბუნების იშვიათი ძეგლებსა (მათ შორის 25 მლნ. წლის გაქვავებული ხე), და XIX-XX სს-ის მიჯნის ეთნოგრაფიული, ხალხური და გამოყენებითი ხელოვნების ნიმუშებს.

რაოდენობრივი რისკის მართვის საკითხებზე ნორვეგიულ-ქართულ-რუმინულ-მოლდავურ-უკრაინული საზაფხულო სკოლა გაიხსნა ბათუმის შოთა რუსთაველის სახელმწიფო უნივერსიტეტში. ორი კვირის განმავლობაში ქართველი და უცხოელი პროფესორები ლექციებს წაიკითხავენ რისკის მენეჯმენტთან დაკავშირებულ საკითხებზე, განიხილება რისკის მართვა სოციალური და პოლიტიკური ორგანიზაციების, ხელოვნების, განათლების, ეკოლოგიის, ბიზნესისა და სხვადასხვა მეცნიერების მიმართულებაში. ქართველი, უკრაინელი და მოლდოველი სტუდენტები განიხილავენ კონკრეტულ შემთხვევებს, სამაგისტრო და სადოქტორო პროგრამების დონეზე შეისწავლიან და გაანალიზებენ რისკის მართვას. სწავლების დასასრულს მონაწილეები საზაფხულო სკოლის მუშაობის ანგარიშს და სახელმძღვანელოს წარმოადგენენ.