ბსუ-ს ჰუმანიტარულ მეცნიერებათა ფაკულტეტის პროფესორ მამია ფაღავას საქართველოს განათლების, მეცნიერებისა და ახალგაზრდობის სამინისტრომ და შოთა რუსთაველის საქართველოს ეროვნულმა სამეცნიერო ფონდმა ქართული ენის დაცვა-განვითარებაში შეტანილი წვლილისთვის სიგელი გადასცეს. ბათუმის შოთა რუსთაველის სახელმწიფო უნივერსიტეტი ულოცავს პროფესორ მამია ფაღავას დაჯილდოებას და წარმატებებს უსურვებს.

ბათუმის შოთა რუსთაველის სახელმწიფო უნივერსიტეტში ჰუმანიტარულ მეცნიერებათა ფაკულტეტის ქართული ფილოლოგიის დეპარტამენტის ორგანიზებით, ქართული ენის დღისადმი მიძღვნილი ღონისძიება გაიმართა. ღონისძიების მონაწილეებს მიესალმნენ და სიტყვით მიმართეს ბსუ-ს ემერიტუს-პროფესორმა შუშანა ფუტკარაძემ, პროფესორმა მამია ფაღავამ, სტამბოლის შოთა რუსთაველის სახელობის კულტურის ცენტრის ხელმძღვანელმა ორჰან ბერიძემ, მწერლებმა: დავით თედორაძემ, ვახტანგ ღლონტმა, პაატა აბაშიძემ, ბელა ქებურიამ და ქალთამზე ანა სურმანიძემ.

„ფრანკოფონია-2024’’ ბათუმის შოთა რუსთაველის სახელმწიფო უნივერსიტეტში საფრანგეთში მოღვაწე ქართველი პიანისტის გიორგი ბერიაშვილის ლექცია-კონცერტით „ფრანგული მუსიკის ოთხი მწვერვალი“ დასრულდა. მუსიკათმცოდნემ და საფრანგეთის ხელოვნების აკადემიის დელ დუკას პრემიის ლაურეატმა გიორგი ბერიაშვილმა ღონისძიებაზე წარმოადგინა საგანმანათლებლო ციფრული პლატფორმა და CD-ი, ისაუბრა კლოდ დებიუსის, ჟან-ფილიპ რამოს, ოლივიე მესიანის, სეზარ ფრანკის შემოქმედებაზე და შეასრულა ფრაგმენტები კომპოზიტორების ნაწარმოებებიდან.

ბათუმის შოთა რუსთაველის სახელმწიფო უნივერსიტეტში 9 აპრილისადმი მიძღვნილი დისკუსია გაიმართა თემაზე: „9 აპრილი - ტრაგედიიდან დამოუკიდებლობის აღდგენამდე“. სტუდენტებმა, პროფესორ-მასწავლებლებმა, ბათუმის ელიტური სკოლა „გორდას“, სკოლა „მონპარნასის“, ბათუმის N2 საჯარო სკოლის პედაგოგებმა და მოსწავლეებმა გაიხსენეს 1989 წლის 9 აპრილს დატრიალებული ტრაგედია, საქართველოს დამოუკიდებლობისათვის დაღუპული გმირები და 35 წლის წინ განვითარებულ მოვლენებზე იმსჯელეს. დისკუსიას მოდერატორობას უწევდნენ ბსუ-ს პროფესორები: ჯემალ კარალიძე და ოთარ გოგოლიშვილი.

ბათუმის N7 საჯარო სკოლაში 9 აპრილისადმი მიძღვნილი საჯარო ლექცია „9 აპრილიდან 9 აპრილამდე“ წაიკითხა ბსუ-ს პროფესორმა ჯემალ კარალიძემ. მომხსენებელმა ლექციაზე განიხილა XX საუკუნეში საქართველოში ანტისაბჭოთა გამოსვლების ქრონოლოგია, 80-იან წლებში შექმნილი სოციალურ-ეკონომიკური და საზოგადოებრივ-პოლიტიკური სიტუაცია, საბჭოთა სისტემის დეგრადაცია და „პერესტროიკა“, როგორც იმპერიული სისტემის გადარჩენის მცდელობა. ასევე გაანალიზა 9 აპრილის წინაპირობები, მომიტინგეთა დარბევა და მისი შედეგები, დამოუკიდებლობის აღდგენა და მისი მნიშვნელობა. ღონისძიების მოდერატორი იყო N7 საჯარო სკოლის ისტორიის მასწავლებელი მეგი სურმანიძე. ლექციას ესწრებოდნენ N7 საჯარო სკოლის მასწავლებლები და მოსწავლეები.