თურქეთის რესპუბლიკის საქარაის უნივერსიტეტის ლიტერატურის ფაკულტეტის თურქული ენისა და ლიტერატურის მასწავლებელმა, ასისტენტ-პროფესორმა მუჰარემ იოჩალინიმ ბათუმის შოთა რუსთაველის სახელმწიფო უნივერსიტეტში საჯარო ლექცია გამართა თემაზე: „ დიალექტების კვლევის მნიშვნელობა კულტურასა და ენათმეცნიერებაში და თურქეთის თურქულის დიალექტების კვლევები’’. საჯარო ლექციას პროფესორ-მასწავლებლებსა სტუდენტებთან ერთად თბილისის იუნუს ემრეს თურქული კულტურის ცენტრის დირექტორი ბატონი ზექერია გიულთექინი და თურქეთის რესპუბლიკის გენერალური კონსული ქალაქ ბათუმში იასინ თემიზქანი ესწრებოდა.

ლექციის დასასრულს, თურქოლოგიის სპეციალობის სტუდენტებმა ყოველწლიური შემაჯამებელი ღონისძიება გამართეს სახელწოდებით „სამშობლო’’, რომლის ფარგლებშიც ქართული და თურქული სამზარეულოს გამოფენა-დეგუსტაცია გაიმართა. ღონისძიება შემაჯამებელი კონცერტით დასრულდა.

25 მაისს, ბათუმის შოთა რუსთაველის სახელმწიფო უნივერსიტეტში საქართველოს დამოუკიდებლობის დღისადმი მიძღვნილი ღონისძიება გაიმართა. ფილოსოფიის დოქტორმა, პროფესორმა ლალი ზაქარაძემ წაიკითხა საჯარო ლექცია თემაზე: - „ახალი რუსული იმპერიალიზმი და საქართველო“. ღონისძიებას ესწრებოდნენ საქართველოს თავდაცვის სამინისტროს შეიარაღებული ძალების მე-3 ქვეითი ბრიგადის 31-ე ბატალიონის სამხედრო მოსამსახურეები.

ბათუმის შოთა რუსთაველის სახელმწიფო უნივერსიტეტში პოლონელი პროფესორის ჯოანა შერშუნოვიჩის საჯარო ლექცია გაიმართა თემებზე:

• საჯარო საუბრის ხელოვნება;
• აკადემიური ტექსტი და მისი სპეციფიკა;
• კულტურათაშორისი კომუნიკაცია: მნიშვნელოვანი განსხვავებები;

ლექციის მიზანი იყო აუდიტორიისათვის ეფექტური საჯარო გამოსვლის თანამედროვე მეთოდების გაცნობა და აკადემიური სტილის, როგორც წერილობითი კომუნიკაციის განსაკუთრებული ტიპის დახასიათება. შეხვედრის დროს, ჯოანა შერშუნოვიჩმა კომუნიკაციის იმ მსგავსება-განსხვავების ანალიზი მიმოიხილა, რომელიც ლინგვისტური და კულტურათაშორის კომუნიკაციის დროს არსებობს.

ბათუმის შოთა რუსთაველის სახელმწიფო უნივერსიტეტის ქართველოლოგიის ცენტრში გრანტის პრეზენტაცია გაიმართა. ჰუმანიტარულ მეცნიერებათა ფაკულტეტის ასოცირებულმა პროფესორმა ზაზა შაშიკაძემ და ისტორიის აკადემიურმა დოქტორმა რუსლან ბარამიძემ სტუდენტებს და პროფესორ-მასწავლებლებს შოთა რუსთაველის ეროვნული სამეცნიერო ფონდის მიერ დაფინანსებული სამეცნიერო გრანტის „ქართველ მუსლიმთა მატერიალური და სულიერი მემკვიდრეობა თურქეთში“ (საგრანტო ხელშეკრულება #57/06) ფარგლებში მიმდინარე წლის მაისში თურქეთის რესპუბლიკაში, კერძოდ, მარმარილოს ზღვის რეგიონში ჩატარებული საველე სამუშაოების შედეგები გააცნეს.

პროექტის „ქართველი ხალხის ეთნოგრაფიული ლექსიკონი - აჭარა“ პრეზენტაცია გაიმართა ბათუმის შოთა რუსთაველის სახელმწიფო უნივერსიტეტში. პროექტის მონაწილეებმა დამსწრე საზოგადოებას პირველ სამუშაო წელს გაწეული საქმიანობის ანგარიში, ლექსიკონის მნიშვნელობა, პროექტის განხორციელების ეტაპები და მიღწევები გააცნეს. ნაშრომი „ქართველი ხალხის ეთნოგრაფიული ლექსიკონი - აჭარა“ შოთა რუსთაველის ეროვნული სამეცნიერო ფონდის საგრანტო პროგრამის ფარგლებში ხორციელდება. კვლევის ობიექტი აჭარის ტრადიციული კულტურული ფასეულობები, სამეურნო ყოფა , სულიერი კულტურა და ხალხური შემოქმედებაა. პროექტის ფარგლებში დაგეგმილია ეთნოგრაფიული, ფოლკროლურ-დიალექტური ნაშრომების დამუშავება და ვიზუალური მასალის მომზადება, რომელიც საბოლოოდ თავს ლექსიკონში მოიყრის.