ახალი ამბები

უნივერსიტეტში საერთაშორისო საზაფხულო სკოლა "მედია და ნაციონალიზმი“ დასრულდა.საზაფხულო სკოლის მონაწილეებს რექტორის მოადგილემ ინგა შამილიშვილმა, სოციალურ და პოლიტიკურ მეცნიერებათა ფაკულტეტის დეკანმა ქეთი ბერიძემ და საგარეო ურთიერთობათა სამსახურის უფროსმა ნანა ყურშუბაძემ სერტიფიკატები გადასცეს. 5-დღიანი ვორქშოფი პარიზის პოლიტიკურ მეცნიერებათა ინსტიტუტის (Sciences Po) საინიციატივო ჯგუფის ‘’Broader Perspective’’ ინიციატივით გაიმართა და მასში უცხოელ სტუდენტებთან ერთად ბსუ-ს სხვადასხა ფაკულტეტის სტუდენტები მონაწილეობდნენ. ერთობლივი საზაფხულო სკოლის ფარგლებში ახალგაზრდებმა იმსჯელეს მედიის აქტუალურ საკითხებსა და ომისა და მშვიდობის დროს მედიისა და პროპაგანდის როლზე.

ბელარუსიის სახელმწიფო საერთაშორისო ეკოლოგიის ინსტიტუტის დირექტორი პროფესორი სერგეი მასკევიჩი ბათუმის შოთა რუსთაველის სახელმწიფო უნივერსიტეტს ეწვია. ვიზიტის ფარგლებში ორ უმაღლეს სასწავლო დაწესებულებას შორის თანამშრომლობის მემორანდუმი გაფორმდა. თანამშრომლობის სფეროები ეკოლოგიისა და ბუნებრივი რესურსების დაცვის მიმართულებით განისაზღვრა. ორი ქვეყნის ბუნებრივი რესურსების სამინისტროების ჩართვით დაიგეგმა საზაფხულო სკოლების ამოქმედება, ერთობლივი საგანმანათლებლო პროგრამებისა და პროექტების განხორციელება.

იტალიის საგანგებო და სრულუფლებიანი ელჩი საქართველოში ანტონიო ენრიკო ბარტოლი ბსუ-ს საერთაშორისო ურთიერთობების სტუდენტებს შეხვდა. დიპლომატიური კორპუსის წარმომადგენელმა ორ ქვეყანას შორის არსებულ კულტურულ, საგანმანათლებლო და პოლიტიკურ ურთიერთობებზე ისაუბრა და სამომავლო პერსპექტივები განიხილა.
საჯარო შეხვედრაზე ელჩმა იტალიის, როგორც ევროპის წამყვანი სახელმწიფოს როლზე და მნიშვნელობაზე გაამახვილა ყურადღება მსოფლიო მასშტაბით მშვიდობის დაცვისა და სიღარიბის დაძლევის საქმეში. აგრეთვე, ბარტოლიმ ხაზი გაუსვა იტალიაში ინდუსტრიის, ტექნოლოგიებისა და მეცნიერების მაღალი განვითარების დონეს და ამ გამოცდილების საქართველოსთვის გაზიარებას.

ბათუმის შოთა რუსთაველის სახელმწიფო უნივერსიტეტს საქართველოში შვედეთის გარემოს დაცვისადმი მიძღვნილი დღეების ფარგლებში შვედეთის სრულუფლებიანი და საგანგებო ელჩი საქართველოსა და სომხეთში მარტინა ქვიქი, შვედეთის მთავრობის მრჩეველი გარემოს დაცვის საკითხებში, ტექნოლოგიური სამეფო ინსტიტუტის პროფესორი სტაფან ლაესტადიუსი ეწვივნენ. ვიზიტის ფარგლებში სტაფან ლაესტადიუსმა სტუდენტებისა და პროფესორ-მასწავლებლებისთვის საჯარო ლექცია წაიკითხა თემაზე: „კლიმატის ცვლილების გარდამავლობა - ცვლილებები, გამოცდილება და პოტენციალი მზარდი ეკონომიკისათვის“.

10 ივნისიდან 10 ოქტომბრის ჩათვლით ტურიზმის ფაკულტეტის 78 სტუდენტი 2 ეტაპად, სასწავლო პრაქტიკას გერმანიის მაღალი კლასის სასტუმროებში გაივლიან. 2 თვის განმავლობაში მათ საშუალება ექნებათ გაეცნონ სასტუმროს ყველა ძირითად სტრუქტურულ ერთეულს. თეორიულ ცოდნის მიღებასთან ერთად ჩაერთონ სასტუმროს ყოველდღიურ საქმიანობაში, მიიღონ პრაქტიკული უნარ-ჩვევები და კომპეტენციები, რაც სამომავლოდ, საერთაშორისო ტურისტული მომსახურების ბაზარზე წარმატებით დასაქმების საშუალებას მისცემს. პრაქტიკა უზრუნველყოფილია გერმანიის შვერინის ბალტიკის კოლეჯთან გაფორმებული მემორანდუმის საფუძველზე. ფინანსური მხარდამჭერები კი არიან ქ. ბათუმის მერია და აჭარის სპორტისა და ახალგაზრდულ საქმეთა დეპარტამენტი.