ახალი ამბები

ბათუმის შოთა რუსთაველის სახელმწიფო უნივერსიტეტს ქუთაისის N26-ე, ავთანდილ დეკანოიძის სახელობის N32-ე, ტყიბულის სოფელ გელათის, სოფელ კურსების, აფხაზეთის N5-ე საჯარო სკოლების დამამთავრებული კლასის მოსწავლეები ეწვივნენ. ბსუ-ს რექტორის მოადგილემ თამარ სირაძემ ახალგაზრდებს საუნივერსიტეტო ცხოვრება, საგანმანთლებლო პროგრამები და სტუდენტური სერვისები გააცნო. მოსწავლეებმა უმაღლესი საგანმანათლებლო დაწესებულების მატერიალურ-ტექნიკური ბაზა, ბიბლიოთეკა, ლაბორატორიები, სასამართლო საიმიტაციო დარბაზი, კრიმინალისტიკის ლაბორატორია დაათვალიერეს და სახალისო ცდებში მიიღეს მონაწილეობა. შეხვედრისას სკოლის მოსწავლეებს სამახსოვრო საჩუქრები გადაეცათ.

ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში, რექტორის მოადგილე ანზორ ბერიძე, ტურიზმის ფაკულტეტის დეკანი ირაკლი კორძაია, საბუნებისმეტყველო მეცნიერებათა და ჯანდაცვის ფაკულტეტის დეკანი რუსუდან ხუხუნაიშვილი და ასოცირებული პროფესორი ლია ჭყონია საპასუხო ვიზიტით ორდუს უნივერსიტეტს ეწვივნენ. ვიზიტის ფარგლებში ორდუს უნივერსიტეტის რექტორთან, პროფესორ ორჰან ბაშთან გამართულ შეხვედრაზე დელეგაციის წარმომადგენლებმა ისაუბრეს უნივერსიტეტებს შორის თანამშრომლობის განვითარებაზე, ერთობლივი საგანმანათლებლო-სამეცნიერო პროექტების განხორციელებასა და გაცვლითი პროგრამების შემუშავებაზე. მხარეთა შეთანხმებით, 28 მაისიდან 1 ივნისამდე ბათუმში ჩატარდება ერთობლივი საერთაშორისო კონგრესი.

საქართველოს ეკონომიკისა და მდგრადი განვითარების სამინისტროს ენერგეტიკული პოლიტიკისა და საინვესტიციო პროექტების დეპარტამენტის წარმომადგენლებმა ბათუმის შოთა რუსთაველის სახელმწიფო უნივერსიტეტის სტუდენტებს ანაზღაურებადი სტაჟირების პროგრამა წარუდგინეს. საქართველოს ენერგეტიკულ საწარმოებში ანაზღაურებად სტაჟირებას მაღალი აკადემიური მოსწრების მქონე სტუდენტები სამინისტროსთან გაფორმებული თანამშრომლობის მემორანდუმის ფარგლებში გაივლიან. პროგრამით სარგებლობა არა მხოლოდ ენერგეტიკული მიმართულების, არამედ სხვადასხვა ფაკულტეტის სტუდენტებს შეუძლიათ.

15-19 აპრილს ბათუმის შოთა რუსთაველის სახელმწიფო უნივერსიტეტს „ერაზმუს+“-ის ადმინისტრაციული პერსონალის გაცვლითი პროგრამის ფარგლებში სამხრეთ დასავლეთ უნივერსიტეტის „ნეოფიტ რილსკის“ სამეცნიერო და საგანმანათლებლო საქმეთა ხელმძღვანელი, პროფესორი ივანკა სტანკოვა, სამართლისა და ისტორიის ფაკულტეტის დეკანი, საერთაშორისო გაცვლითი პროგრამის (ICM) ინიციატორი სამართლის დარგში პროფესორი გაბრიელა ბელოვა და პროფესორი ფილოსოფიის მიმართულებით ბორის მანოვი ეწვივნენ.

ბათუმის შოთა რუსთაველის სახელმწიფო უნივერსიტეტში „Erasmus+“ის საგრანტო პროექტის „პროფესიული განათლებისა და სტუდენტების ჩართულობის ხელშეწყობა მენტორინგისა და ტუტორინგის სისტემით უმაღლეს საგანმანათლებლო დაწესებულებებში" (PROMENT) საგაზაფხულო სკოლა ჩატარდა. პროექტი მიზნად ისახავს სტუდენტების უნარების გაუმჯობესებასა და აქტიურ ჩართულობას სამოქალაქო ცხოვრებაში, მათი დასაქმების ხელშეწყობას შესაბამისი პროფესიული კომპეტენციების განვითარებით, უმაღლეს სასწავლებლებს შორის თანამშრომლობისა და ინტერნაციონალიზაციის გაღრმავებას.