ახალი ამბები

მაგდებურგის უნივერსიტეტმა ბათუმის შოთა რუსთაველის სახელმწიფო უნივერსიტეტსა და საქართველოს ტექნიკურ უნივერსიტეტთან თანამშრომლობის მემორანდუმი გააფორმა. ხელშეკრულება სხვა მნიშვნელოვან ასპექტებთან ერთად, პროფესიული განათლების მასწავლებელთა მოსამზადებელი ორმხრივი პროგრამის შექმნას გულისხმობს. მემორანდუმის ფარგლებში, მომზადდება ერთობლივი პროფესიული განათლების მასწავლებლების მოსამზადებელი პედაგოგიკის კურსი, შესაძლებელი გახდება, აგრეთვე, მსურველთათვის პროფესიული განათლების ადმინისტრირებისა და მართვის ორმხრივი სამაგისტრო პროგრამის შეთავაზება, რომლის ფარგლებშიც სტუდენტები მაგისტრატურის ერთ ნაწილს გერმანიაში, ხოლო მეორე ნაწილს საქართველოში გაივლიან.

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა და ვალენსიის (ესპანეთი) პოლიტექნიკურ უნივერსიტეტის რექტორის აპარატის უფროსმა პროფესორმა ხუან მიგელ მარტინეს რუბიოსმა შეთანხმების მემორანდუმს მოაწერეს ხელი.
მემორანდუმი ორ უმაღლეს სასწავლებელს შორის გამოცდილების გაზიარებას, აკადემიური პერსონალის ურთიერთგაცვლას და საერთო ინტერესის სფეროებში მრავალხმრივი კვლევების განვითარებას ითვალისწინებს.

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელი მერაბ ხალვაში ბათუმში თურქეთის რესპუბლიკის გენერალურ საკონსულოს ეწვია და იქ გახსნილ სამძიმრის წიგნში ჩანაწერი დატოვა. მერაბ ხალვაშმა თურქეთის კონსულს ბათუმში იასინ თემიზქანს მიუსამძიმრა. „უნივერსიტეტის სახელით გამოვთქვამთ ღრმა მწუხარებას და შეშფოთებას ამ დღეებში თურქეთის რესპუბლიკაში, სტამბოლში დატრიალებული ტრაგიკული მოვლენების გამო. თანავუგრძნობთ თურქეთის ყველა მოქალაქეს და მთელ ცივილიზებულ მსოფლიოს. ჩვენ, ყველამ ერთად, ერთიანი ძალისხმევით უნდა დავამარცხოთ ტერორიზმი“, - აღნიშნულია სამძიმრის წერილში.

ბათუმის შოთა რუსთაველის სახელმწიფო უნივერსიტეტში უახლესი ტექნიკით აღჭურვილი საუნივერსიტეტო სტომატოლოგიური კლინიკა „ბსუ დენტი“ გაიხსნა. კლინიკაში სტომატოლოგიის სპეციალობის დამამთავრებელი კურსისა და რეზიდენტურის სტუდენტები კლინიკურ მეცადინეობებს გაივლიან.

„ბსუ დენტში’’ სტუდენტთა პრაქტიკული უნარ-ჩვევების ჩამოყალიბებისათვის სასწავლო ორთოპედიის, ოდონტოლოგიის, საფანტომო, თერაპიის, რადიოვიზიოგრაფიისა და დეკონტამინაციის კაბინეტებია განთავსებული. კლინიკა აღჭურვილია თანამედროვე აპარატურით: პორტატული სტომატოლოგიური დანადგარებით, ფანტომებით, მულაჟებით, აუდიო-ვიდეო მონიტორებითა და კომპიუტერული ტექნიკით.

ბათუმის შოთა რუსთაველის სახელმწიფო უნივერსიტეტს რუსეთის ტურიზმისა და სერვისების სახელმწიფო უნივერსიტეტის დელეგაცია სტუმრობს. დელეგაციის ვიზიტის ფარგლებში ორ უმაღლეს სასწავლებლებს შორის თანამშრომლობის მემორანდუმს მოეწერა ხელი. თანამშრომლობა ბსუ-ს ტურიზმის ფაკულტეტსა და რუსეთის ტურიზმის უმაღლეს სასწავლებელს შორის სამეცნიერო-პრაქტიკული კონფერენციების ორგანიზებას და საზაფხულო სკოლების ერთობლივად ჩატარებას ითვალისწინებს.