ბათუმის შოთა რუსთაველის სახელმწიფო უნივერსიტეტმა ბრიტანეთის საზღვაო ფლოტის ადმირალ ჯეიმს მორლს, ამერიკის შეერთებული შტატების საზღვაო ქვეითთა კორპუსის კაპიტან ჯონათან ლიპსს და ამერიკის საელჩოს თავდაცვის ატაშეს პოლკოვნიკ სტეფან ბეგლის უმასპინძლა. დელეგაციის წარმომადგენლები ბსუ-ს იურიდიული და სოციალურ მეცნიერებათა ფაკულტეტის სტუდენტებს შეხვდნენ და ჩრდილოატლანტიკური ალიანსის თავდაცვისა და უსაფრთხოების საკითხებზე ესაუბრნენ. შეხვედრას მოდერაცია გაუწიეს საქართველოში აშშ-ის საელჩოს საზოგადოებასთან ურთიერთობის განყოფილების ხელმძღვანელმა ქეთრინ შვაიცერმა და საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრის დირექტორმა თამარა წულეისკირმა. შეხვედრა კითხვა-პასუხის რეჟიმში წარიმართა და სტუმრებმა სტუდენტების აქტუალურ შეკითხვებს უპასუხეს.

ბათუმის შოთა რუსთაველის სახელმწიფო უნივერსიტეტის მედიაციის მოკლევადიანი პროგრამის 13-მა მსმენელმა ესპანეთში, მურსიას უნივერსიტეტში ორკვირიანი სასწავლო სტაჟირება გაიარა. ღონისძიებას ასისტირებას უწევდა პროექტ MEDIATS-ის მკვლევარი და მენეჯერი ბსუ-ში ქეთევან დევაძე. სასწავლო სტაჟირება მოიცავდა ინტენსიურ ტრენინგებს მედიაციის დარგში, სიმულაციებს, შიდა სასწავლო ვიზიტებს, ჯგუფურ აქტივობებს, გამოცდილ მედიატორებთან თანამშრომლობასა და კულტურულ ტურებს.

ბათუმის შოთა რუსთაველის სახელმწიფო უნივერსიტეტში VI საერთაშორისო საზაფხულო უნივერსიტეტი ტარდება თემაზე: „საქართველოს აკადემიური პერსპეტივა უსაფრთხოების და გაუვრცელებლობის კვლევებში“. ღონისძიების გახსნას ბსუ-ს რექტორი, პროფესორი მერაბ ხალვაში, სტოკჰოლმის უნივერსიტეტის პროფესორი დოქტორი ტომას იონტერი, პოლიტიკის მეცნიერებათა დოქტორი ბენუა პელოპიდასი და შვედეთის მთავრობის წარმომადგენლები ესწრებოდნენ. ორდღიანი საზაფხულო უნივერსიტეტის მიზანია უმაღლესი საგანმანათლებლო დაწესებულებების აკადემიური პერსონალის კვლევითი უნარების განვითარების ხელშეწყობა.

2021 წლის 15 ოქტომებრს, ერაზმუსის დღეების ფარგლებში კავკასიის უნივერსიტეტმა უმასპინძლა „Erasmus+“-ის ეროვნული ოფისის მიერ ორგანიზებულ დისკუსიას "როგორ ვასწავლოთ და ვიკვლიოთ ევროკავშირი?". დისკუსიაში მონაწილეობა მიიღეს ჟან მონეს პროექტების განმახორციელებელმა პირებმა თბილისის, გორისა და ბათუმის ცხრა უნივერსიტეტიდან, ხუთი არასამთავრობო ორგანიზაციიდან და ორი ასოციაციიდან. დისკუსია გახსნა საქართველოში ევროკავშირის ელჩმა, ბატონმა კარლ ჰარცელმა. დისკუსიაში მონაწილეობა მიიღო ბათუმის შოთა რუსთაველის სახელმწიფო უნივერსიტეტის პროფესორმა, ჟან მონეს კათედრის ხელმძღვანელმა მალხაზ ნაკაშიძემ, რომელმაც ისაუბრა ბსუ-ში ჟან მონეს კათედრის მიერ განხორციელებული საქმიანობის, ჟან მონეს პროგრამის მნიშვნელობასა და ევროკავშირის სწავლების სფეროში არსებული გამოწვევების შესახებ.

ფსიქიკური ჯანმრთელობის მსოფლიო დღისადმი მიძღვნილი კვირეულის ფარგლებში, ბსუ-ს ფსიქოლოგიის კლინიკა E-PSY-ის პროექტის ეგიდით, რამდენიმე ღონისძიება გაიმართა. ბათუმის შოთა რუსთაველის სახელმწიფო უნივერსიტეტის ფსიქოლოგებმა სტუდენტებს კონკუსლტაციები გაუწიეს სტრესულ მდგომარეობასათან დაკავშირებულ პრობლემებზე. ასევე ჩატარდა E-PSY პროექტის წარდგენა, რომლის მიზანია სტუდენტებისთვის სოციალური და ფსიქოლოგიური დახმარების გაწევა საქართველოს უმაღლეს სასწავლებლებში ფსიქოლოგიური კონსულტაციების ცენტრების შექმნის გზით. პროგრამა ითვალისწინებს უმაღლეს საგანმანათლებლო დაწესებულებებში ფსიქოლოგიური ცენტრების შექმნას.