აჭარის ავტონომიური რესპუბლიკის ჯანმრთელობისა და სოციალური დაცვის მინისტრის მოადგილემ ლევან გორგილაძემ, ეკონომიკისა და ბიზნესის ფაკულტეტის სტუდენტებისათვის საჯარო ლექცია გამართა. ლექცია სოციალურ პოლიტიკას, საზოგადოების სოციალური დაცვის მექანიზმს და იმ სოციალურ პროექტებს შეეხებოდა, რომლებიც მთლიანად ქვეყანასა და აჭარის ა/რ რესპუბლიკაში ხორციელდება. სტუდენტებმა, უშუალოდ მინისტრის მოადგილისაგან მიიღეს ინფორმაცია სოციალურ სფეროში არსებულ პრობლემებსა და მიღწევებზე, აგრეთვე პასუხები მათთვის საინტერესო კითხვებზე.

ეკონომიკისა და ბიზნესის ფაკულტეტის პროფესორები მონაწილეობას მიიღებენ პროფესორების კვირეულში, რომელიც მაისში, ვროცლავში გაიმართება-გადაწყვეტილება ეკონომიკისა და ბიზნესის ფაკულტეტის დეკანის, პროფესორი ვლადიმერ ღლონტის ვროცლავის საბანკო უმაღლეს სკოლაში ვიზიტის დროს მიიღეს. ვიზიტის ფარგლებში, ვლადიმერ ღლონტი ვროცლავის საბანკო უმაღლესი სკოლის (აკადემიის) კანცლერს, პროფესორ მარეკ ნატალის, მენეჯმენტისა და ფინანსების ფაკულტეტის დეკანს, პროფესორ თომას კოპისკანსკის და აკადემიის საგარეო ურთიერთობათა დეპარტამენტის ხელმძღვანელს, ბატონ იაროსლავ ტომაშევსკს შეხვდა. დაიგეგმა კონკრეტული თანამშრომლობა ეკონომიკისა და ბიზნენის ფაკულტეტსა და აკადემიას შორის, რომელიც ითვალისწინებს პროფესორებისა და სტუდენტების მობილობას, სწავლა-სწავლების გამოცდილების და მეთოდების გაზიარებას, სამეცნიერო თანამშრომლობის გაძლიერებას და თანამედროვე სიმულაციური პროგრამების დანერგვას სასწავლო პროცესში.

აჭარის ა/რ ეკონომიკისა და ფინანსთა მინისტრის მოადგილემ რამაზ ბოლქვაძემ ეკონომიკისა და ბიზნესის ფაკულტეტის სტუდენტებისათვის ლექცია გამართა. საჯარო ლექცია საფინანსო პოლიტიკის აქტუალურ საკითხებს შეეხებოდა და სალექციო კურსის ეკონომიკური პოლიტიკის ფარგლებში (პროფ. ნ.წიკლაშვილი) ჩატარდა. სტუდენტებმა მათთვის საინტერესო კითხვებზე მიიღეს პასუხები. სალექციო კურსის თემების მიხედვით შეხვედრები დაგეგმილია აჭარის ავტონომიური რესპუბლიკის სხვა სამინისტროების პასუხისმგებელ პირებთან.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებმა საბაჟო გამშვები პუნქტი „სარფი“, გაფორმების ეკონომიკური ზონა „ბათუმი" (ადლია) და ბათუმის სერვისცენტრები მოინახულეს. გაცნობითი ხასიათის ვიზიტ-სემინარი საქართველოს ფინანსთა სამინისტროს შემოსავლების სამსახურის ინიციათივით ჩატარდა და მიზნად ისახავდა საზოგადოებაში საგადასახადო ცნობიერების ამაღლებასა და სტუდენტების დახმარებას პროფესიულ ორიენტაციაში. შემოსავლების სამსახურის საბაჟო და მომსახურების დეპარტამენტების თანამშრომლების დახმარებით, სტუდენტებს შესაძლებლობა მიეცათ, უშუალოდ გაცნობოდნენ საბაჟო გამშვებ პუნქტზე მგზავრებისა და ტვირთების გატარების პროცესს, დათვალიერებისა და გაფორმების სპეციფიკას, სკანირების თავისებურებებს. ასევე, ინფორმაცია მიიღეს. ბათუმის სერვისცენტრის მიერ დანერგილი მომსახურების შესახებ. სემინარი კითხვა-პასუხის რეჟიმში წარიმართა. ეკონომიკისა და ბიზნესის ფაკულტეტსა და შემოსავლების სამსახურს შორის თანამშრომლობის სამომავლო ღონისძიებებიც დაიგეგმა.

1 აპრილს, ბათუმის შოთა რუსთაველის სახელმწიფო უნივერსიტეტში, აჭარის ა/რ მთავრობის, საქართველოს ეკონომიკურ მეცნიერებათა აკადემიისა და ბათუმის შოთა რუსთაველის სახელმწიფო უნივერსიტეტის ორგანიზებით გაიმართა მრგვალი მაგიდა თემაზე: “საქართველოში მიმდინარე ეკონომიკური რეფორმები და მისი სრულყოფის გზები.”