ახალი ამბები

შეფასებისა და გამოცდების ეროვნული ცენტრის წარმომადგენლებმა ირინა ჟვანიამ და თამარ აბაშიძემ ბათუმის შოთა რუსთაველის სახელმწიფო უნივერსიტეტის სტუდენტებს პროექტი „სტუდენტები თვითმმართველობისათვის“ წარუდგინა. პროექტს ორგანიზაცია „მოქალაქე" ახორციელებს და მიზნად ისახავს ახალგაზრდების ჩართვას სამოქალაქო საზოგადოების განვითარების პროცესში და თვითმმართველობის იდეის პოპულარიზაციას. პროგრამა ასევე ითვალისწინებს ადგილობრივი თვითმმართველობის განვითარების მხარდაჭერას თვითმმართველობის საკითხებში ახალგაზრდა პროფესიონალების მომზადებისა და ჩართულობის ხელშეწყობით. პროექტის მონაწილე სტუდენტები კონკურსის წესით შეირჩევიან, რომელიც სამ ეტაპად ჩატარდება.

საფრანგეთის საგანმანათლებლო პროგრამების „სწავლა საფრანგეთში“ პრეზენტაცია ჩატარდა ბათუმის შოთა რუსთაველის სახელმწიფო უნივერსიტეტში. საქართველოს ფრანგული ინსტიტუტის საუნივერსიტეტო თანამშრომლობის ასისტენტმა და სტუდენტთა მობილობის ორგანიზაცია კამპუს ფრანსის წარმომადგენელმა თბილისში ანა ლოლუამ სხვადასხვა ფაკულტეტის სტუდენტებს სასტიპენდიო პროგრამები, საზაფხულო სკოლები და საკონკურსო პირობები წარუდგინა. საფრანგეთში სწავლის მსურველებს შეუძლიათ მონაწილეობა მიიღონ შემდეგ პროგრამებში: საფრანგეთის მთავრობის პროგრამა, ეიფელის სასტიპენდიო პროგრამა, პარიზის კაშანის უმაღლესი სკოლის პროგრამა, ევროპის კოლეჯის პროგრამა და ფრანკოფონიის საუნივერსიტეტო სააგენტოს (AUF-ის) სასტიპენდიო პროგრამები.

ბათუმის შოთა რუსთაველის სახელმწიფო უნივერსიტეტის 80 წლის იუბილე სასტუმრო „შერატონ ბათუმში“ საზეიმოდ აღინიშნა. საიუბილეო ღონისძიება უნივერსიტეტის რექტორის მოვალეობის შემსრულებელმა მერაბ ხალვაშმა გახსნა და უმაღლესი საგანმანათლებლო დაწესებულების 80-წლიან ისტორიაზე, მიღწევებზე, განვითარების პერსპექტივებზე ისაუბრა. საქართველოს განათლებისა და მეცნიერების მინისტრმა თამარ სანიკიძემ, აჭარის ა.რ. მთავრობის თავმჯდომარემ არჩილ ხაბაძემ, აჭარის ა.რ. უმაღლესი საბჭოს თავმჯდომარემ ავთანდილ ბერიძემ, აჭარის ა.რ. განათლების კულტურისა და სპორტის მინისტრმა გიორგი თავამაიშვილმა, ქ. ბათუმის მერმა გიორგი ერმაკოვმა, აჭარის მთავრობისა და უმაღლესი საბჭოს წევრებმა, სხვადასხვა უნივერსიტეტის რექტორებმა, კურსდამთავრებულებმა, სტუდენტებმა, ფონდების, საერთაშორისო ორგანიზაციების, დიპლომატიური კორპუსისა და საზოგადოების წარმომადგენლებმა იუბილარ უნივერსიტეტს ღირსშესანიშნავი თარიღი მიულოცეს, წარმატებები უსურვეს და სამახსოვრო საჩუქრები გადასცეს.

საპატიო დოქტორების არჩევის საზეიმო ცერემონია გაიმართა ბათუმის შოთა რუსთაველის სახელმწიფო უნივერსიტეტის 80 წლის იუბილესადმი მიძღვნილი ღონისძიებების ფარგლებში. უმაღლესი საგანმანათლებლო დაწესებულების აკადემიური საბჭოს გადაწყვეტილებით, საპატიო დოქტორის წოდება მიენიჭა შვიდ აღიარებულ ქართველ და უცხოელ პროფესორს: საქართველოს მეცნიერებათა აკადემიის აკადემიკოსს, სამხედრო და ტექნიკურ მეცნიერებათა დოქტორს, საქართველოს ტექნიკური უნივერსიტეტის პროფესორ ელგუჯა მეძმარიაშვილს, შვერინის ბალტიკის უნივერსიტეტის პროფესორ გერალდ ვეტცელს, საქართველოს საინჟინრო აკადემიის წევრს, საქართველოს სამთო საზოგადოების პრეზიდენტს, ტექნიკის მეცნიერებათა დოქტორს, პროფესორ რევაზ სტურუას, დიდი ბრიტანეთის და ჩრდილოეთ ირლანდიის გაერთიანებული სამეფოს სურსათისა და გარემოს კვლევის სააგენტოს ემერეტუსს, ინოვაციების ცენტრის აღმასრულებელ დირექტორს, ფილოსოფიის დოქტორ რობერტ ედვარდ ბოლტონს, ფრანგ ქართველოლოგს, ემერეტუს პროფესორ შარლ რენუს, ბერლინის შარიტეს ფიზიოლოგიის შემსწავლელი ლაბორატორიის ხელმძღვანელს, პროფესორ თენგიზ გლოველსა და ყაზანის ფედერალური უნივერსიტეტის პროფესორ თომას კრუსმანს.

საზეიმოდ აღინიშნება ბათუმის შოთა რუსთაველის სახელმწიფო უნივერსიტეტის 80 წლის იუბილე. ორი დღის განმავლობაში უმაღლესი საგანმანათლებლო დაწესებულების საიუბილეო ღონისძიებების ფარგლებში იმართება საუნივერსიტეტო ცხოვრების ამსახველი საზოგადოებისთვის უცნობი ფოტოებისა და აკადემიური და სამეცნიერო პერსონალის მიღწევების გამოფენა (მონოგრაფიები, სახელმძღვანელოები და სხვ.). სააქტო დარბაზში უნივერსიტეტის რექტორის მოვალეობის შემსრულებელი მერაბ ხალვაში უნივერსიტეტის პროფესორებს, მეცნიერებს, თანამშრომლებსა და სტუდენტებს შეხვდა, ღირსშესანიშნავი თარიღი მიულოცა და სიგელებითა და მედლებით დააჯილდოვა. შედგა უნივერსიტეტის საიუბილეო წიგნის - „ბათუმის შოთა რუსთაველის სახელმწიფო უნივერსიტეტი საგანმანათლებლო კერა - 80“ პრეზენტაცია. ორენოვან საიუბილეო წიგნში წარმოდგენილია უნიკალური საარქივო მასალა უნივერსიტეტის ისტორიასა და მიღწევებზე. ასევე ჩატარდა ბსუ-ს ჰიმნის (ტექსტის ავტორი დავით თედორაძე, კომპოზიტორი ანა ქასრაშვილი) წარდგინება ანსამბლ „ბათუმის“ შესრულებით. საიუბილეო საღამო ბსუ-ს ქორეოგრაფიულ ანსამბლ “ტბეთისა“ და ქალაქის სხვადასხვა ფოლკლორული ანსამბლების ერთობლივი კონცერტით დასრულდა.