10-13 დეკემბერს, ასტანაში, ყაზახეთის იურიდიულ ჰუმანიტარული უნივერსიტეტის, OSCE-სა სოროსის ფონდის ორგანიზებით გაიმართა IV საერთაშორისო ახალგაზრდული იურიდიული ფორუმი “ადამიანის საყოველთაო უფლებები და ნაციონალური უშიშროება“. კონფერენციაში მონაწილეობა მიიღო ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის მეოთხე სასწავლო წლის სტუდენტმა ლიანა ნიჟარაძემ. კონფერენციაში მონაწილე 40 სტუდენტის ნაშრომებს ლიანა ნიჟარაძის მოხსენებამ მესამე ადგილი მოიპოვა, რომელიც დაჯილდოვდა საერთაშორისო ხარისხის დიპლომითა და ფულადი საჩუქრით.

29 ნოემბრიდან 2 დეკემბრის ჩათვლით ბსუ-ს საზოგადოებრივ და პოლიტიკურ მეცნიერებათა დეპარტამენტის ხელმძღვანელმა ლაშა ბაჟუნაშვილმა მონაწილეობა მიღო ვარშავის უნივერსიტეტის საერთაშორისო ურთიერთობათა ინსტიტუტის მიერ დაგეგმილ 10 ევროპული უნივერსიტეტისგან შემდგარი კონსორციუმის საერთაშორისო ვორქშოპში. ღონისძიება მიზნად ისახავდა ერასმუს+-ის ახალი საგრანტო პროექტის "სტრატეგიული კავშირები ევროკავშირსა და აღმოსავლეთის სამეზობლო ქვეყნებს შორის“ ფარგლებში საერთაშორისო ურთერთობებსა და ევროპისმცოდნეობაში ერთობლივი სამაგისტრო კურიკულუმის შემუშავება და მათი პარტნიორ უნივერსიტეტებში დანერგვა (Strategic Bridges between the European Union and the Eastern Neighborhood – development of MA curricula in International Relations and European Studies in Partner Countries HEI’s). ვორქშოპის მონაწილეებმა ერთობლივად შეიმუშავეს საპროექტო წინადადება, რომელიც 2019 წლის თებერვალში დაფინანსების მოპოვების მიზნით წარედგინება ევროკომისიას.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის დეკანი ადამ მახარაძე საქართველოს ფსიქიკური ჯანმრთელობის კოალიციის აღმასრულებელ დირექტორს, ექიმ–ფსიქიატრ მარინე კურატაშვილს შეხვდა. მხარეებმა შეხვედრაზე თანამშრომლობის მიმართულებებსა და სამომავლო გეგმებზე ისაუბრეს. დაიგეგმა უნივერსიტეტის ფსიქოლოგიური კლინიკაში ფსიქიკური აშლილობის მქონე პირთათვის ფსიქო-სოციალური რეაბილიტაციის ცენტრის გახსნა. შეხვედრის დასასრულს ფაკულტეტის დეკანმა სტუმარს სამახსოვრო საჩუქრები გადასცა.

ბათუმის შოთა რუსთაველის სახელმწიფო უნივერსიტეტში ტრენინგი დაიწყო თემებზე: „ჯგუფური ფსიქოგანათლება მძიმე ფსიქიკური აშლილობის მქონე პაციენტებისათვის“ და „კოგნიტური ფუნქციების ტრენინგი ფსიქიკური აშლილობების მქონე პაციენტებისათვის“. ექიმი–ფსიქიატრი მარინე კურატაშვილი სამი დღის განმავლობაში მსმენელებს ჯგუფური ფსიქოგანათლების ტრენინგზე მძიმე ფსიქიკური აშლილობების მქონე პაციენტებთან ჯგუფური თერაპიის ჩატარების ზოგად წესებს გააცნობს. სწავლების მიზანია, ხელი შეუწყოს ფსიქიკური ჯანმრთელობის სფეროში მომუშავე სპეციალისტების ცოდნის გაღრმავებასა და მომავალი სპეციალისტების განათლებას მკურნალობის ფსიქო–სოციალურ მეთოდებში.

საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის პროფესორებმა, ელჩებმა ლევან ბოძაშვილმა და თეიმურაზ შარაშენიძემ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხეს თემაზე: „საქართველოს საგარეო პოლიტიკა და პრიორიტეტები“. მომხსენებლებმა ისაუბრეს ქვეყნის სამეზობლო პოლიტიკაზე, სამხედრო უსაფრთხოებაზე, საერთაშორისო ურთიერთობებსა და ჩრდილოატლანტიკურ სივრცეში საქართველოს ინტეგრაციის პროცესზე. ლექციის დასასრულს, დიპლომატებმა ლევან ბოძაშვილმა და თეიმურაზ შარაშენიძემ სტუდენტების შეკითხვებს უპასუხეს.