6-12 მაისს ტურიზმის ფაკულტეტის სტუდენტებისათვის მუგლას უნივერსიტეტის პროფესორმა ონურ აკბულტმა თემაზე: ,,მსოფლიო ტურიზმის განვითარების თანამედროვე ტენდენციები და ბოდრუმის გამოცდილება“ მასტერკლასი ჩაატარა. ონურ აკბულტი ტურიზმის ფაკულტეტს მევლანას გაცვლითი პროგრამის ფარგლებში სტუმრობდა.

სასწავლო-პრაქტიკული ხასიათის ტური ისტორიულ ტაო-კლარჯეთში - ასე ეწოდა ტურიზმის ფაკულტეტის სტუდენტთა ორდღიან მოგზაურობას ისტორიულ ტაოში. ფაკულტეტის 70 სტუდენტმა იშხნის, ოშკის, ხახულის, ოთხთას, პარხალის, დოლისყანის ტაძრები და სამონასტრო კომპლექსები მოინახულეს, კულტურულ ტურიზმსა და საექსკურსიო საქმეში პროფესიული უნარ-ჩვევების პირველი გამოცდა იქ, ისტორიულ საქართველოში ჩააბარეს.

სასტუმრო ,,DIVAN ბათუმის“ გენერალური მენეჯერი ბულენთ ავქუთ სუზერი ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებს შეხვდა. სასტუმროს გენერალურმა მენეჯერმა ახალგაზრდებს საერთაშორისო ბრენდი ,,,DIVAN ბათუმი“ წარუდგინა და ტურიზმის ფაკულტეტთან პარტნიორობის სტრატეგიის მნიშვნელობასთან ერთად დასაქმების შესაძლებლობებზე ესაუბრა. ივლისში 10 სტუდენტი ბოდრუმში სასტუმრო „DIVAN“-ის ქსელში ორთვიან პრაქტიკას გაივლის და ანაზღაურებას მიიღებს 500 აშშ დოლარის ოდენობით. დღემდე თანამშრომლობის ფარგლებში სხვადასხვა საერთაშორისო ბრენდის კომპანიებში ტურიზმის ფაკულტეტის 200-მდე სტუდენტია დასაქმებული. სასტუმრო ,,DIVAN“ ბათუმი მეოთხე საერთაშორისო ბრენდია, რომელთანაც ბსუ-ს ტურიზმის ფაკულტეტი აქტიურად თანამშრომლობს.

ბათუმის შოთა რუსთაველის სახელმწიფო უნივერსიტეტის სტუდენტებს 'ჰილტონ ბათუმში' დასაქმების საშუალება ეძლევათ. 12 სხვადასხვა პოზიციაზე არსებულ ვაკანსიაზე რეგისტრაცია 300-მა სტუდენტმა გაიარა, მათგან დასაქმების შანსი 150 ახალგაზრდას მიეცემა. კონკურსის ფარგლებში სასტუმროში გახსნილი კაზინო ,,აუსტრიის“ თანამშრომლებიც შეირჩევა. აპლიკანტებთან გასაუბრება მიმართულებების მიხედვით ტურიზმის ფაკულტეტის აუდიტორიებში ჩატარდა. "ჰილტონ ბათუმის" გახსნა 2015 წლის მაისში იგეგმება.

ტურიზმის ფაკულტეტის მესამე და მეოთხე კურსის 20 სტუდენტი სასწავლო პრაქტიკას გერმანიაში ტურიზმის ინდუსტრიის ორგანიზაციებში გადის. სტუდენტებს 2 თვის განმავლობაში საშუალება ექნებათ გაეცნონ სასტუმროს ყველა ძირითადი სტრუქტურული ერთეულის ფუნქციონირებას. თეორიულ ცოდნის მიღებასთან ერთად, სტუდენტები აქტიურად იქნებიან ჩართული სასტუმროს ყოველდღიურ საქმიანობაში. სასწავლო პრაქტიკა უზრუნველყოფილია გერმანიის შვერინის ბალტიკის კოლეჯთან გაფორმებული მემორანდუმის საფუძველზე.