ახალი ამბები

დიასპორის საკითხებში საქართველოს სახელმწიფო მინისტრი პაპუნა დავითაია და ბათუმის შოთა რუსთაველის სახელმწიფო უნივერსიტეტის რექტორი, პროფესორი ალიოშა ბაკურიძე თურქ სტუდენტებს შეხვდნენ. უწყების პირველი პირი უმაღლეს საგანმანათლებლო დაწესებულებაში ერთობლივი პროგრამის "ისწავლე საქართველოში" ფარგლებში ჩარიცხულ სტუდენტებს სასწავლო პროცესზე, ცხოვრების პირობებზე, სოციალურ საკითხებსა და სხვა აქტუალურ თემებზე ესაუბრა. პროგრამას 2010 წლიდან თურქეთში მცხოვრები ეთნიკური ქართველებისთვის დიასპორის საკითხებში საქართველოს სახელმწიფო მინისტრის აპარატი, საქართველოს განათლებისა და მეცნიერების სამინისტრო და საქართველოს წამყვანი უნივერსიტეტები ახორციელებენ. სწავლება ქართულ ენაზე მიმდინარეობს და თითოეული სტუდენტის სწავლა სახელმწიფო სასწავლო გრანტით ფინანსდება.

დედაენის დღე ბათუმის შოთა რუსთაველის სახელმწიფო უნივერსიტეტეში ტრადიციულად რამდენიმე ღონისძიებით აღინიშნა. პროფესორ-მასწავლებლებმა და სტუდენტებმა უმაღლესი საგანმანათლებლო დაწესებულებიდან ტრანსპარანტებით მსვლელობა მოაწყვეს და ილია ჭავჭავაძის ძეგლი გვირგვინით შეამკეს. ლექტორებმა და მწერლებმა 1978 წლის 14 აპრილის მოვლენები გაიხსენეს და მშობლიური ენის სიწმინდის დაცვის მნიშნელობაზე ისაუბრეს, ხოლო სტუდენტებმა დედაენისადმი მიძღვნილი ლექსები წაიკითხეს. განათლებისა და მეცნიერებათა ფაკულტეტის ქართული ფილოლოგიის დეპარტამენტის ორგანიზებით სამეცნიერო კონფერენცია გაიმართა თემაზე: „სწორმეტყველება და აკადემიური წერა“. დარგის სპეციალისტებმა სტილთა აღრევაზე, აკადემიური წერის სწავლების აუცილებლობაზე, ქართული ენის უფლებების დაცვაზე და სხვა აქტუალურ საკითხებზე იმსჯელეს.

ინტელექტუალური საკუთრების მსოფლიო ორგანიზაციის (ისმო/WIPO) და საქართველოს ინტელექტუალური საკუთრების ეროვნული ცენტრის ორგანიზებით თბილისში, სასტუმრო ,,ჰოლიდეი ინში”, 11-12 აპრილს რეგიონული სემინარი გაიმართა. მსოფლიოს 18 ქვეყნის წარმომადგენელებმა გარდამავალი ეკონომიკის ქვეყნებში ტექნოლოგიების გადაცემის პრობლემების შესახებ იმსჯელეს. სემინარში შოთა რუსთაველის სახელმწიფო უნივერსიტეტის რექტორის მოადგილე სამეცნიერო დარგში, ასოცირებული პროფესორი ნათია წიკლაშვილი და სტრატეგიული განვითარებისა და საგარეო ურთიერთობათა დეპარტამენტის წამყვანი სპეციალისტი ლილით მელოიან-ფუტკარაძე მონაწილეობდნენ. ინტელექტუალური საკუთრების მსოფლიო ორგანიზაციის (ისმო/WIPO) და საქართველოს ინტელექტუალური საკუთრების ეროვნული ცენტრის ხელმძღვანელებთან კონსულტაციების შემდეგ დაისახა მჭიდრო თანამშრომლობის მიმართულებები, რომელიც ხელს შეუწყობს ბსუ-ს მეცნიერებისა და პროფესორ-მასწავლებლების კვლევების პოპულარიზაციასა და კომერციალიზაციას.

აჭარის განათლების, კულტურისა და სპორტის მინისტრმა გია აბულაძემ და აჭარის განათლების ფონდის დირექტორმა ირაკლი თავბერიძემ ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს TOEFL-ის შემსწავლელი უფასო კურსები გააცნეს. სწავლება განათლების ფონდის ორგანიზებით წარიმართება და პირველ ეტაპზე 2 ჯგუფი გაიხსნება. სწავლის მსურველები კონკურსის წესით შეირჩევიან და სასწავლო პროცესს კვალიფიცირებული პედაგოგები წარუძღვებიან. TOEFL-ის სერტიფიკატი მსოფლიოს 130 ქვეყნის 8500 უმაღლეს საგანმანათლებლო დაწესებულებაშია აღიარებული.

ბათუმის მერიის ახალგაზრდობის საქმეთა განყოფილების უფროსმა თამაზ დარჩიძემ ბათუმის შოთა რუსთაველის სახელმწიფო უნივერსიტეტის სტუდენტებს სტუდენტთა დასაქმების მუნიციპალური პროგრამა წარუდგინა. პროგრამის ფარგლებში ქალაქის ავტორიზებული უმაღლესი საგანმანათლებლო დაწესებულებების 500 სოციალურად დაუცველი, ობოლი, დევნილის სტატუსის მქონე, წარჩინებული სტუდენტი დასაქმდება და 200-ლარიან ანაზღაურებას მიიღებს. პროგრამის პირველი ეტაპი ივნისში დაიწყება და ახალგაზრდები ყოველ შაბათ-კვირას სანაპირო ზოლის, ქალაქის ცალკეული უბნების დასუფთავებისა და გამწვანების აქციებში მიიღებენ მონაწილეობას. დასაქმების მსურველთა რეგისტრაცია 17 აპრილს დაიწყება და მონაწილეები 100-ქულიანი სისტემით, უმაღლესი სასწავლებლისთვის დადგენილი კვოტის გათვალისწინებით შეირჩევიან.