ახალი ამბები

აჭარის განათლების, კულტურისა და სპორტის მინისტრმა გია აბულაძემ და აჭარის განათლების ფონდის დირექტორმა ირაკლი თავბერიძემ ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს TOEFL-ის შემსწავლელი უფასო კურსები გააცნეს. სწავლება განათლების ფონდის ორგანიზებით წარიმართება და პირველ ეტაპზე 2 ჯგუფი გაიხსნება. სწავლის მსურველები კონკურსის წესით შეირჩევიან და სასწავლო პროცესს კვალიფიცირებული პედაგოგები წარუძღვებიან. TOEFL-ის სერტიფიკატი მსოფლიოს 130 ქვეყნის 8500 უმაღლეს საგანმანათლებლო დაწესებულებაშია აღიარებული.

ბათუმის მერიის ახალგაზრდობის საქმეთა განყოფილების უფროსმა თამაზ დარჩიძემ ბათუმის შოთა რუსთაველის სახელმწიფო უნივერსიტეტის სტუდენტებს სტუდენტთა დასაქმების მუნიციპალური პროგრამა წარუდგინა. პროგრამის ფარგლებში ქალაქის ავტორიზებული უმაღლესი საგანმანათლებლო დაწესებულებების 500 სოციალურად დაუცველი, ობოლი, დევნილის სტატუსის მქონე, წარჩინებული სტუდენტი დასაქმდება და 200-ლარიან ანაზღაურებას მიიღებს. პროგრამის პირველი ეტაპი ივნისში დაიწყება და ახალგაზრდები ყოველ შაბათ-კვირას სანაპირო ზოლის, ქალაქის ცალკეული უბნების დასუფთავებისა და გამწვანების აქციებში მიიღებენ მონაწილეობას. დასაქმების მსურველთა რეგისტრაცია 17 აპრილს დაიწყება და მონაწილეები 100-ქულიანი სისტემით, უმაღლესი სასწავლებლისთვის დადგენილი კვოტის გათვალისწინებით შეირჩევიან.

1989 წლის 9 აპრილს მთავრობის სასახლესთან საქართველოს დამოუკიდებლობისათვის დაღუპული გმირები ტრადიციულად გაიხსენეს ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებმა და სტუდენტებმა. 23 წლის წინ განვითარებული ტრაგიკული მოვლენების ამსახველი ფოტოქრონიკის ჩვენების შემდეგ პატივი მიაგეს მათ ხსოვნას და კიდევ ერთხელ შეაფასეს ამ დღის მნიშვნელობა და შედეგები. დაღუპულთა უკვდასაყოფად ახალგაზრდებმა ზღვისპირა პარკში 21 მანათობელი ფრანი გაუშვეს, მემორიალი ყვავილებით შეამკეს და სანთლები დაანთეს. 1989 წლის 9 აპრილს ქვეყნის დამოუკიდებლობას 21 ადამიანის სიცოცხლე შეეწირა. 1991 წლის 9 აპრილს უზენაესი საბჭოს გადაწყვეტილებით ეს თარიღი საქართველოს დამოუკიდებლობის აღდგენის დღედ გამოცხადდა. ღონისძიება უმაღლესი სასწავლებლის სტუდენტური თვითმმართველობისა და სპორტისა და ახალგაზრდობის საქმეთა დეპარტამენტის ორგანიზებით ჩატარდა.

სტუდენტთა საინიციატივო ჯგუფის ორგანიზებით, სტუდენტური თვითმმართველობისა და სამეცნიერო ცენტრის მხარდაჭერით ბათუმის შოთა რუსთაველის სახელმწიფო უნივერსიტეტის ფრანგული ენის სპეციალობის სტუდენტებისათვის პროექტი "ფრანგული ოდისეა" განხორციელდა. პროექტის ფარგლებში ფრანგული კულტურის საღამო გაიმართა, მოეწყო საფრანგეთის ღირსშესანიშნაობებისა და კულტურულ ძეგლებისადმი მიძღვნილი სლაიდ-შოუ, ჩატარდა სხვადასხვა სახის ინტელექტუალურ-შემეცნებითი თამაშები. საღამოს სტუდენტებთან ერთად ევროპეისტიკის დეპარტამენტის ხელმძღვანელი მარინა გიორგაძე და ფრანგული ენის პროფესორ-მასწავლებლები ესწრებოდნენ.

ნორვეგიის ტელემარკისა და ბათუმის შოთა რუსთაველის სახელმწიფო უნივერსიტეტების ერთობლივი პროექტის ,,ნორვეგიაში, საქართველოსა და ყირგიზეთში ტურიზმის მდგრადი განვითარებისა და ინოვაციების სფეროში განათლება“ პირველი ეტაპის განხორციელება დაიწყო. პროექტი ითვალისწინებს ყოველწლიურად ტურიზმის ფაკულტეტის 3 სტუდენტის ერთწლიან სწავლებას პარტნიორ უმაღლეს სასწავლებელში ,,ტურიზმის მენეჯმენტის“ სპეციალობაზე. მონაწილეები კომპეტენტურმა ჟიურიმ ინგლისური ენის ცოდნის, მაღალი აკადემიური მოსწრებისა და კულტურათაშორისი კომუნიკაციის უნარის მიხედვით შეარჩია. 45 კონკურსანტიდან მეორე ეტაპზე 10 სტუდენტი გადავიდა, რომელთაც ნორვეგიის ტელემარკის უნივერსიტეტის პროფესორებმა თემურ აბესაძემ და ფრუდე ლენგიმ 26 მარტიდან 6 აპრილამდე ტრენინგები ჩაუტარეს. მათგან სამი საუკეთესო სტუდენტი თამთა ქარცივაძე, თამაზ მახარაძე და ეთერ ჯინჭარაძე 2012 წლის 15 აგვისტოდან სწავლას ნორვეგიაში განაგრძობენ.