ახალი ამბები

ალერგოლოგიისა და კლინიკური იმუნოლოგიის საერთაშორისო კვირეულის ეგიდით შოთა რუსთაველის დარბაზში სტუდენტებისა და პროფესორ-მასწავლებლებისათვის საჯარო ლექცია გაიმართა ალერგიისა და კლინიკური იმუნოლოგიის აქტუალურ საკითხებზე. ასოცირებულმა პროფესორებმა ლეილა ახვლედიანმა და ვახტანგ ბერიძემ ატოპიური დერმატიტის, კვებითი ალერგიის, ანტიფოსფოლიპიდური სინდრომის (ანტიფოსფოლიპიდურ ანტისხეულთა კლინიკური და დიაგნოსტიკური მნიშვნელობა) თავისებურებებზე და სხვა ალერგიული დაავადებების სპეციფიკაზე ისაუბრეს. საჯარო ლექცია ბათუმის შოთა რუსთაველის სახელმწიფო უნივერსიტეტის განათლებისა და მეცნიერებათა ფაკულტეტისა და ალერგოლოგიისა და კლინიკური იმუნოლოგიის ასოციაციის აჭარის ფილიალის ორგანიზებით ჩატარდა.

20-23 აპრილს ივანე ჯავახიშვილის სახელობის თბილისის სახელმწიფო უნივერსიტეტის, შავი ზღვის საერთაშორისო უნივერსიტეტისა და კავკასიის ფონდის ორგანიზებით ქალაქ თბილისში სტუდენტთა I საერთაშორისო კონფერენცია ჩატარდა თემაზე: ,,კავკასია, როგორც ერთიანი კულტურული და ეკონომიკური სივრცე”. კონფერენციაში ბათუმის შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის მენეჯმენტის სპეციალობის მე-3 კურსის სტუდენტები - ანა გურული (თემა: ,,საქართველოს ეკონომიკური ინტერესები კავკასიის რეგიონში გლობალიზაციისა და კონკურენტუნარიანობის კონტექსტში“, მეცნიერ ხელმძღვანელი ასისტ.პროფ. ბადრი გეჩბაია); გუგული თურმანიძე და მზია დავითაძე (თემა: ,,საქართველოს ეკონომიკური ინტეგრაცია ცენტრალურ კავკასიაში” მეცნიერ ხელმძღვანელი ასოც.პროფ. ანზორ დევაძე) მონაწილეობდნენ. ბსუ-ს სტუდენტები კომპეტენტურმა ჟიურიმ ფულადი პრიზითა და ფასიანი საჩუქრებით დააჯილოდოვა.

საქართველოს სახალხო დამცველი გიორგი ტუღუში ბათუმის შოთა რუსთაველის სახელმწიფო უნივერსიტეტის სტუდენტებს შეხვდა. ომბუდსმენმა ახალგაზრდებს 2011 წლის ანგარიში წარუდგინა და სახალხო დამცველისა და მისი აპარატის საქმიანობაზე ესაუბრა. სტუდენტები ადამიანის უფლებათა და თავისუფლებათა დაცვით, სასჯელაღსრულების სისტემითა და შეზღუდული შესაძლებლობების მქონე მოქალაქეების სოციალური საკითხებით დაინტერესდნენ. შეხვედრა კითხვა-პასუხის რეჟიმში წარიმართა და ომბუდსმენმა სტუდენტების აქტუალურ შეკითხვებს უპასუხა.

აბუსერისძე ტბელის აუდიტორიაში რიგით მეოთხე სამეცნიერო კონფერენცია დაიწყო თემაზე: ,,ჩვენი სულიერების ბალავარი“. სამეცნიერო ფორუმი მიტროპოლიტმა ანანია ჯაფარიძემ, უნივერსიტეტის რექტორმა, პროფესორმა ალიოშა ბაკურიძემ, ქრისტიანული კულტურის კვლევის ცენტრის ხელმძღვანელმა, ემერიტუსმა ბიჭიკო დიასამიძემ, პროფესორებმა გურამ ლორთქიფანიძემ და ავთანდილ ნიკოლეიშვილმა გახსნეს. კონფერენცია ბათუმის შოთა რუსთაველის სახელმწიფო უნივერსიტრეტის ქრისტიანული კულტურის კვლევის ცენტრის ორგანიზებით იმართება და ქრისტიანული სარწმუნოების აქტუალურ საკითხებს ეძღვნება. ორი დღის განმავლობაში 40 ბათუმელი, თბილისელი და ქუთაისელი მკვლევარი მოხსენებებს წაიკითხავს ქართული მართლმადიდებლური ეკლესიის ისტორიაზე, რელიგიასა და კულტურაზე, ეთნიკურ და რელიგიურ ტოლერანტობაზე, კულტურათა დიალოგზე, სწავლებასა და აღზრდაზე. სამეცნიერო მოხსენებები კრებულის სახით უკვე დაიბეჭდა.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ, პროფესორ-მასწავლებლებმა და სტუდენტებმა პატივი მიაგეს 1989 წლის 19 აპრილს მაღალმთიან აჭარაში მეწყერის შედეგად დაღუპულთა ხსოვნას. აჭარის ადგილობრივი ხელისუფლებისა და საზოგადოების წარმომადგენლებთან ერთად სოფელ წაბლანაში დატრიალებული ტრაგედია გაიხსენეს და 6 მაისის პარკში მდებარე მემორიალი ყვავილებით შეამკეს. 23 წლის წინ სტიქიურ უბედურებას 23 ადამიანის სიცოცხლე შეეწირა.