თბილისში გამართულ საუნივერსიტეტო დებატებში ბსუ-ს გუნდმა ჩემპიონობა მოიპოვა. კარლ-პოპერის ფორმატის საუნივერსიტეტო ტურნირში ბსუ-ს სტუდენტებმა საკვალიფიკაციო თამაშში სულხან-საბასა და საქართველოს ტექნიკური უნივერსიტეტების გუნდებს სძლიეს, ნახევარფინალში- თსუ-ს, ფინალში კი ილიას უნივერსიტეტის ნაკრები დაამარცხეს. სადებატო რეზოლუცია საქართველოში ადამიანთა უფლებების დაცვას შეეხებოდა.
ბათუმის შოთა რუსთაველის სახელმწიფო უნივერსიტეტში FAB LAB BSU -ს გამოფენა-პრეზენტაცია გაიმართა.
გამოფენაზე ბსუ-ს ტექნოლოგიური ფაკულტეტის სტუდენტების მიერ საინჟინრო გადაწყვეტილებების მოდელირებით, სასწავლო პროცესში განხორციელებული პროექტები, შენობა-ნაგებობის მაკეტები, მოძრავი მექანიზმები, კონსტრუქციები, დეკორაციული ნივთები და სხვადასხვა სახის სუვენირები იყო წარმოდგენილი. ექსპოზიციაზე ასევე სტუდენტების ბიზნეს სტარტაპის პროექტი -„პირველი ლონგბოარდი საქართველოში“ გამოიფინა.
ღონისძიების ფარგლებში გაიმართა პრეზენტაცია, სადაც ყველა დაინტერესებულ პირს ფაბლაბის მუშაობის პროცესის, ძირითადი მიზნების, ფუნქციებისა და შესაძლებლობების გაცნობა შეეძლო. დამთვალიერებელს საშუალება ჰქონდა, დეტალური ინფორმაცია მიეღო თუ როგორ განეხორციელებინა იდეები ფაბლაბთან ერთად, შეემუშავებინა ერთობლივი პროექტები, განევითარებინა ინოვაციური კუთხით და ექცია იგი კონკრეტულ პროდუქტად.
დღეს, ბავშვთა დაცვის საერთაშორისო დღესთან დაკავშირებით, ბათუმის შოთა რუსთაველის სახელმწიფო უნივერსიტეტმა ბათუმის საბავშვო ბაღების აღსაზრდელებს უმასპინძლა. უნივერსიტეტის ეზოში 500-მდე აღსაზრდელმა სპეციალურად მომზადებული ცეკვისა და სიმღერის ნომრები წარმოადგინა. სხვადასხვა სახის შეჯიბრებებთან და სპორტულ აქტივობებთან ერთად, მონაწილეებს ფერადი საღებავებით საყვარელი ზღაპრის გმირების სახეზე მოხატვა შეეძლოთ.
ბავშვთა დაცვის საერთაშორისო დღე პატარებს რექტორის მოვალეობის შემსრულებელმა მერაბ ხალვაშმა მიულოცა, მათ სრულფასოვანი განათლების მიღება და ბედნიერი მომავალი უსურვა.
ბათუმის შოთა რუსთაველის სახელმწიფო უნივერსიტეტის თანამშრომლობის კლუბის, სკოლა-უნივერსიტეტი“ ფარგლებში IV სამეცნიერო კონფერენცია გაიმართა თემაზე: „სწავლებისა და აღზრდის აქტუალური პრობლემები“. სესიაში სტუდენტებთან ერთად, აჭარის საჯარო და კერძო სკოლების 400-მდე მოსწავლე მონაწილეობდა.
მომხსენებლებმა თემები პედაგოგიკის, განათლების, საბუნებისმეტყველო მეცნიერებების მიმართულებით წარმოადგინეს და ისეთი აქტუალური საკითხები განიხილეს, როგორიცაა: თანამედროვე ტექნოლოგიების როლი სწავლა-სწავლების პროცესში, დისტანციური სწავლება, მოზარდთა გენეტიკური დაავადებები, ატმოსფეროს გლობალური გაჭუჭყიანება და ა.შ. კონფერენციის დასასრულს მონაწილეებს სერტიფიკატები გადაეცათ.
საქართველოს დამოუკიდებლობის დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. უნივერსიტეტის ფოიეში საქართველოს დამოუკიდებლობის აღდგენის დღისადმი მიძღვნილი თემატური გამოფენა მოეწყო და დოკუმენტური ფილმების ჩვენება შედგა. ჰუმანიტარულ მეცნიერებათა ფაკულტეტის დეკანმა პროფესორმა მარინა გიორგაძემ დამთვალიერებლებს ასევე 1996 წელს ლევილში გადაღებული ფოტოები წარუდგინა. ქვეყნის დამოუკიდებლობის დღეს მიძღვნა ისტორიის დეპარტამენტის მიერ ორგანიზებული სტუდენტთა სამეცნიერო კონფერენცია - „26 მაისი - საქართველოს სახელმწიფოებრივი დამოუკიდებლობის აღდგენის დღეა“. სამეცნიერო სესია რექტორის მოვალეობის შემსრულებელმა მერაბ ხალვაშმა გახსნა და ისტორიული დღის მნიშვნელობაზე ისაუბრა.სტუდენტებმა მოხსენებები წაიკითხეს 1918-1921 წლებში განვითარებულ მოვლენებზე.
