ბათუმის შოთა რუსთაველის სახელმწიფო უნივერსიტეტი „მე-12 საერთაშორისო ტურიზმისა და სასტუმრო აღჭურვილობის და მე-2 საერთაშორისო სამედიცინო ტურიზმის გამოფენაში“ მონაწილეობს. გამოფენაზე საბუნებისმეტყველო მეცნიერებათა და ჯანდაცვის ფაკულტეტისა და ტურიზმის ფაკულტეტის სტუდენტები, პროფესორ-მასწავლებლები დამთვალიერებლებს ქართულენოვან საგანმანათლებლო პროგრამებთან ერთად, დიპლომირებული მედიკოსის ერთსაფეხურიან ინგლისურენოვან საგანმანათლებლო პროგრამას გააცნობენ. ასევე წარუდგენენ უნივერსიტეტში სწავლების პირობებს, სერვისებსა და სტუდენტურ ცხოვრებას. ბსუ-ში დიპლომირებული მედიკოსის ერთსაფეხურიან ინგლისურენოვან საგანმანათლებლო პროგრამაზე 625 ინდოელი სტუდენტი სწავლობს. საერთაშორისო გამოფენა სამ დღეს გაგრძელდება და მასში 13 ქვეყნის 80-ზე მეტი ქართული და უცხოური კომპანია მონაწილეობს.

მედიცინის პროგრამაში თანამედროვე მეთოდების დანერგვისა და გამოყენების ხელშეწყობის მიზნით 2019 წლის 5-6 მაისს ბათუმის შოთა რუსთაველის სახელმწიფო უნივერსიტეტის, ბაუ ბათუმის საერთაშორისო უნივერსიტეტისა და საქართველოს ეროვნული უნივერსიტეტის ორგანიზებითა და ჩართულობით ჩატარდა ტრენინგი-თემაზე: „პრობლემაზე და კლინიკურ შემთხვევაზე დაფუძნებული სწავლების მეთოდები სამედიცინო განათლებაში“-PBL, CBL. ტრენინგი ჩაატარეს ვესტმინსტერის უნივერსიტეტის პროფესორებმა - პიტერ ლიდიარდმა და ნინო ფორაქიშვილმა. ტრენინგს ესწრებოდნენ სამედიცინო მიმართულების პროგრამის ხელმძღვანელები, პროგრამაში ჩართული აკადემიური პირები და სტუდენტები.

დედამიწის საერთაშორისო დღე საბუნებისმეტყველო მეცნიერებათა და ჯანდაცვის ფაკულტეტის სტუდენტებმა რამდენიმე ღონისძიებით აღნიშნეს. ეკოლოგიის სპეციალობის პირველი კურსის სტუდენტებმა მდინარე აჭარისწყლის ხეობაში ეკოტურის მოწყვეს. ღონისძიების მიზანი იყო ხელვაჩაურისა და ქედის მუნიციპალიტეტებში მდინარე აჭარისწყლის ხეობის ეკოსისტემების გაცნობა, კასკადური ჰესების მშენებლობასთან დაკავშირებული სამშენებლო და საექსპლუატაციო საქმიანობით გამოწვეული ზემოქმედების შესწავლა, ბიომრავალფეროვნების მოსალოდნელი საფრთხეების პროგნოზირება. სტუდენტებმა სოფელ მირვეთში მოინახულეს „ბზის სიდამწვრის“ სახელით ცნობილი სოკოვანი დაავადებით განადგურებული ბზის ხეივანი. ეკოტური მდინარე აჭარისწყლის ხეობაში BSU Eco Club-ის ეგიდით ჩატარდა.

ბათუმის შოთა რუსთაველის სახელმწიფო უნივერსიტეტში დედამიწის საერთაშორისო დღე აშშ-ის საერთაშორისო განვითარების სააგენტოს (USAID) და CENN-ის ორგანიზებით პროგრამის „ნარჩენების მართვის ტექნოლოგია რეგიონებში, ფაზა II“ (WMTR II) ფარგლებში ნარჩენების სეპარაციის სტენდის გახსნით აღინიშნა. სეპარაციის სტენდის გახსნის ცერემონიაში მონაწილეობა მიიღეს რექტორმა მერაბ ხალვაშმა, ბათუმის მერმა ლაშა კომახიძემ, USAID-ის მისიის ეკონომიკური განვითარების ოფისის დირექტორმა ვერონიკა ლიმ და CENN-ის აღმასრულებელმა დირექტორმა ნანა ჯანაშიამ. ბსუ პირველი უმაღლესი საგანმანათლებლო დაწესებულებაა აჭარაში, სადაც ნარჩენების სეპარაციის სტენდი განთავსდა. სტუდენტებმა და მოწვეულმა სტუმრებმა სეპარაციის სტენდში სიმბოლურად განათავსეს დახარისხებული ნარჩენები.

ბათუმის შოთა რუსთაველის სახელმწიფო უნივერსიტეტის ქიმიის დეპარტამენტის პროფესორმა ალეკო კალანდიამ და ასოცირებულმა პროფესორმა მაია ვანიძემ გაცვლითი პროგრამის „ერასმუს +“-ისა და ზაარლენდის უნივერსიტეტის ბიოორგანული ქიმიის ინსტიტუტის პროფესორის კლაუს ჯაკობის მიწვევით მონაწილეობა მიიღეს ზაარლენდის უნივერსიტეტში გამართულ ერთკვირიან საერთაშორისო სემინარში. სწავლება მიზნად ისახავდა ბუნებრივ ნაერთთა ბიოლოგიური აქტიურობის, ტექნოლოგიური პროცესების ნარჩენების ნანოტექნოლოგიური გადამუშავებისა და მიღებული პროდუქტების აქტივობის დადგენის საკითხების გაცნობას. ვიზიტის ფარგლებში დაიგეგმა მასპინძელი უნივერსიტეტის მონაწილეობით ერთობლივი სადოქტორო, სამაგისტრო და საგრანტო კვლევითი პროექტების განხორციელება.