გარემოს დაცვის საერთაშორისო დღე ბათუმის შოთა რუსთველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის პროფესორ-მასწავლებლებმა, სტუდენტებმა და ბათუმის №1 საჯარო სკოლის მოსწავლეებმა ბულვარის მიმდებარე ტერიტორიაზე შავი ზღვის სანაპირო ზოლის დასუფთავების აქციით აღნიშნეს. ღონისძიება USAID-ის და CENN-ის ერთობლივი პროგრამის „ნარჩენების მართვის ტექნოლოგია რეგიონებში, ფაზა II-ის“ (WMTR II) ფარგლებში ჩატარდა. 5 ივნისი გარემოს დაცვის დღედ გაეროს გენერალურმა ასამბლეამ 1972 წლის 15 დეკემბერს გამოაცხადა.

ბავშვთა დაცვის საერთაშორისო დღე საბუნებისმეტყველო მეცნიერებათა და ჯანდაცვის ფაკულტეტმა საქველმოქმედო აქციით აღნიშნა. ქიმიის სპეციალობის სტუდენტებმა და ქიმიის დეპარტამენტის პროფესორ-მასწავლებლებმა მოინახულეს საპატრიარქოსთან არსებული ფერიის წმინდა მატათა მოციქულის სახელობის ბავშვთა გიმნაზია-პანსიონი, და აღსაზრდელებს ტკბილეულთან ერთად სათამაშოები გადასცეს.

მსოფლიო კამპანიის „მაისის გაზომვების თვე“ ფარგლებში საქართველოს ჰიპერტენზიის შემსწავლელი საზოგადოების ინიციატივით და ბათუმის შოთა რუსთველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის უცხოელი სტუდენტების მონაწილეობით არტერიული ჰიპერტენზიის სკრინინგის ღონისძიება გაიმართა. აქციის მიზანი იყო მაღალი არტერიული წნევის გამოვლენა და მოსახლეობის ცნობიერების ამაღლება. არტერიული ჰიპერტენზიის სკრინინგის მსოფლიო კამპანია ერთი თვის განმავლობაში ხორციელდებოდა და საქართველომ მასში 90 ქვეყანასთან ერთად წელს მესამედ მიიღო მონაწილეობა.

20-24 მაისს, ერაზმუს+-ის აკადემიური პერსონალის გაცვლითი პროგრამის ფარგლებში პოლონეთში, კროსნოს სახელმწიფო კოლეჯში იმყოფებოდა ბსუ-ს საბუნებისმეტყველო მეცნიერებათა და ჯანდაცვის ფაკულტეტის ასისტენტ პროფესორი გუგული დუმბაძე. პროფესორმა გუგული დუმბაძემ ერთი კვირის განმავლობაში ლექციები ჩაატარა ბაკალავრიატისა საგანმანათლებლო პროგრამის სტუდენტებისთვის შემდეგ საკითხებზე: გარემოს (ჰაერი, ნიადაგი, წყალი დაბინძურება) დაბინძურება, როგორც გლობალური ეკოლოგიური პრობლემა; საქართველოს ეკოლოგიური პრობლემები; გარემოს ტოქსიკანტები, ადამიანში მათი შეღწევის გზები და ზემოქმედების ეფექტები; Haliomorpha halys, როგორც ინვაზიური მავნებელი მწერი საქართველოში.

ბიომრავალფეროვნების საერთაშორისო დღე საბუნებისმეტყველო მეცნიერებათა და ჯანდაცვის ფაკულტეტის პროფესორ-მასწავლებლებმა და სტუდენტებმა სხვადასხვა ღონისძიებით აღნიშნეს. ბიომრავალფეროვნების შენარჩუნების ორი გზა არსებობს: In situ კონსერვაცია და ex situ კონსერვაცია. ღონისძიების ფარგლებში მაჭახელას ეროვნული პარკის ბუნებრივი რესურსების მთავარმა სპეციალისტმა მარადი იაკობაძემ და ვიზიტორთა მომსახურების სპეციალისტმა ნანა ბაუჟაძე სტუდენტებს გააცნეს „მაჭახელას ეროვნული პარკის მრავალფეროვნება“, როგორც In situ კონსერვაციის მაგალითი. ასევე მოეწყო ექსპედიცია ბათუმის ბოტანიკურ ბაღში, სადაც სტუდენტებს ადგილობრივი ფლორისა და კონსერვაციის განყოფილების სპეციალისტმა მაია დარჩიძემ გააცნო „ამიერკავკასიის ტენიანი სუბტროპიკების განყოფილების მრავალფეროვნება“, როგორც ex situ კონსერვაციის მაგალითი.