პროექტის „საზოგადოების ინფორმირებულობის ამაღლება და საზღვაო ნარჩენების შემცირება შავი ზღვის ეკოსისტემის დასაცავად“ ფარგლებში ბსუ-ს საბუნებისმეტყველო მეცნიერებათა და ჯანდაცვის ფაკულტეტის სტუდენტებისათვის ტრენინგი ჩატარდა. პროგრამის წარმომადგენლებმა ახალგაზრდებს ისეთი აქტუალური საკითხები გააცნეს, როგორიცაა: საზღვაო ნარჩენები - მსოფლიო ოკეანის მდგომარეობას, გარემოსდაცვითი ღონისძიებები და კვლევები, ნარჩენების მართვა - გამოწვევები და განვითარების პერსპექტივები, ნარჩენების მართვის ტექნოლოგიები. პროექტს საერთაშორისო ბიზნესის და ეკონომიკური განვითარების ცენტრი შავი ზღვის აუზის საზღვრისპირა თანამშრომლობის პროგრამა 2014-20-ის ფარგლებში ახორციელებს.

ბიომრავალფეროვნების საერთაშორისო დღეს საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტის სტუდენტებმა, პროფესორ-მასწავლებლებმა და კურსდამთავრებულებმა ონლაინ სემინარი მიუძღვნეს თემაზე: „აჭარის დაცული ტერიტორიების ბიომრავალფეროვნება“. მტირალას ეროვნული პარკის ადმინისტრაციის ბუნებრივი რესურსების უფროსმა სპეციალისტმა თორნიკე ტაბატაძემ სემინარის მონაწილეებს მტირალას ეროვნული პარკის ბიომრავალფეროვნება გააცნო, კინტრიშის დაცული ტერიტორიის ბუნებრივი რესურსების უფროსმა სპეციალისტმა გიორგი ნემსაძემ კინტრიშის დაცული ტერიტორიის ბიომრავალფეროვნება, ხოლო მაჭახელას დაცული ტერიტორიის ბუნებრივი რესურსების უფროსმა სპეციალისტმა მარადი იაკობაძემ - მაჭახელას ტერიტორიის ბიომრავალფეროვნება.

ევროკავშირის მხარდაჭერით ბსუ-ში მიმდინარე პროექტის „ლაბორატორიული ჯანმრთელობისა და უსაფრთხოების უწყვეტი განათლების კურსები ახალგაზრდა პროფესიონალებისთვის დასავლეთ და აღმოსავლეთ საქართველოში" ფარგლებში ცხადდება ტრენერთა ტრენინგში მონაწილეების შესარჩევი კონკურსი. ტრენინგის წარმატებით დასრულების შემთხვევაში, სერტიფიცირებულ ტრენერებს მიეცემათ საშუალება 2021-2022 აკადემიურ წელს ჩაერთონ პროექტით გათვალისწინებული უწყვეტი განათლების კურსების განხორციელებაში საქართველოს სხვადასხვა რეგიონში (იმერეთი, კახეთი, აჭარა, თბილისი). დეტალური ინფორმაცია კონკურსის შესახებ იხილეთ დანართში.

დედამიწის დაცვის საერთაშორისო დღისადმი მიძღვნილი სემინარი „დაიცავი დედამიწა - ჩვენი სახლი“ გაიმართა ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტებისა და პროფესორ-მასწავლებლების მონაწილეობით. ბიოლოგიის დეპარტამენტის პროფესორ-მასწავლებლებმა და აჭარის ა.რ. უმაღლესი საბჭოს დეპუტატმა მარინე გვიანიძემ სტუდენტებს დედამიწის დაცვასთან დაკავშირებული აქტუალური საკითხები გააცნეს. შეხვედრა დისკუსიის რეჟიმში გაგრძელდა და მომხსენებლებმა სტუდენტების შეკითხვებს გასცეს პასუხი. დედამიწის დაცვის საერთაშორისო დღე მსოფლიოში 1970 წლიდან აღინიშნება.

დედამიწის საერთაშორისო დაცვის დღე საბუნებისმეტყველო მეცნიერებათა და ჯანდაცვის ფაკულტეტმა რამდენიმე ღონისძიებით აღნიშნა. გეოგრაფიის დეპარტამენტის ორგანიზებით ჩატარდა შეხვედრა პროფესორ-მასწავლებლების, სტუდენტების, ბათუმისა და ქუთაისის საჯარო და კერძო სკოლის მოსწავლეების მონაწილეობით. მათ მიერ წარმოდგენილი მოხსენებები გარემოსდაცვით პრობლემებს ეხებოდა. ბიოლოგიის დეპარტამენტის ინიციატივით გამართულ შეხვედრას ესწრებოდნენ „ბათუმში ფრინველთა მიგრაციის მონიტორინგის შესწავლა“ პროექტის კოორდინატორი, ესპანელი მკვლევარი რაფა ბენჯუმეა, ბიოლოგიის დეპარტამენტის პროფესორ-მასწავლებლები, ბიოლოგიის და ეკოლოგიის სტუდენტები, მაგისტრები და სკოლის მოსწავლეები.