ახალი ამბები

ტემპუსის საგრანტო პროექტის ფარგლებში - „სტუდენტთა კარიერული განათლების ცენტრის შექმნა საქართველოში“ ბათუმის შოთა რუსთაველის სახელმწიფო უნივერსიტეტში შეხვედრა გაიმართა. პარტნიორი უნივერსიტეტებისა და ორგანიზაციების წარმომადგენლები, ქართველი, ინგლისელი, უნგრელი და ლიტველი ექსპერტები სამი დღის განმავლობაში სტუდენტების სასწავლო პროგრამასა და პერსონალის ტრენინგის პროგრამას გაეცნობიან. შედგება „ეროვნული დისკუსია“, სადაც პროექტის მონაწილეები პროგრამების საბოლოო ვარიანტზე შეთანხმდებიან. საგრანტო პროექტი ორწლიანია და მიზნად ისახავს სტუდენტთა კარიერული განვითარების ხელშეწყობას. ასევე ითვალისწინებს უმაღლესი განათლების რეფორმასა და მოდერნიზაციის ხელშეწყობას პარტნიორი ქვეყნების უმაღლესი სასწავლებლების საუნივერსიტეტო მენეჯმენტისა და სტუდენტთა მომსახურების სფეროებში. პროგრამის ფარგლებში უმაღლესი საგანმანათლებლო დაწესებულების ბაზაზე მომზადდებიან ტრენერები, რომლებიც სტუდენტებს დაეხმარებიან სამსახურის არა ერთჯერადად მოძებნაში, არამედ დამსაქმებლებთან სწორი კომუნიკაციის წარმოებაში, საკუთარი შესაძლებლობების წარმოჩენაში, კარიერის უკეთ დაგეგმვაში, გუნდური მუშაობის და გასაუბრებისათვის საჭირო უნარ-ჩვევების შეძენაში.

საქართველოს აგრარული უნივერსიტეტის მიხეილ საბაშვილის ნიადაგმცოდნეობის, აგროქიმიის და და მელიორაციის ინსტიტუტში ჩატარდა სტუდენტთა რესპუბლიკური ოლიმპიადა თემაზე: „ნიადაგი - ერის საუნჯე“. ოლიმპიადაში ქვეყნის სხვადასხვა უმაღლესი სასწავლებლის სტუდენტებთან ერთად ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის აგროეკოლოგიისა და აგრონომიის მეორე კურსის სტუდენტები მონაწილეობდნენ. ოლიმპიადაზე ქრისტინე ლომიამ და გელა ძირკვაძემ პირველი ადგილი მოიპოვეს, ხოლო პაატა ლომაძემ მეორე ადგილი დაიკავა. გამარჯვებულ სტუდენტებს საპატიო სიგელები და სამახსოვრო საჩუქრები გადაეცათ.

წიგნისა და საავტორო უფლებების საერთაშორისო დღე ბათუმის შოთა რუსთაველის სახელმწიფო უნივერსიტეტის სტუდენტებმა საქველმოქმედო აქციით აღნიშნეს. სტუდენტური თვითმმართველობის ინიციატივით, ახალგაზრდებმა 300-მდე წიგნი შეაგროვეს და გაყიდეს. შემოსული თანხა წარმატებული და სოციალურად დაუცველი სტუდენტების მხარდაჭერის ფონდში გადაირიცხება. ის წიგნები კი, რომლებიც ერთდღიანი აქციის ფარგლებში არ გაიყიდება, სასჯელაღსრულების დაწესებულების მსჯავრდებულებს საჩუქრად გადაეცემა. წიგნისა და საავტორო უფლებების საერთაშორისო დღე იუნესკოს გადაწყვეტილებით 1996 წლიდან აღინიშნება.

ამერიკელმა პროფესორმა ჯეიმს თორსონმა ბათუმის შოთა რუსთაველის სახელმწიფო უნივერსიტეტის სტუდენტებისა და პროფესორ-მასწავლებლებისათვის ღია ლექცია წაიკითხა თემაზე: „ლიტერატურის სწავლება“. ცნობილმა მეცნიერმა ამერიკული და ინგლისური ლიტერატურისადმი გაზრდილი ინტერესისა და იმ თანამედროვე ამერიკელი მწერლების შესახებ ისაუბრა, რომელთა შემოქმედებაც შეტანილია სასწავლო პროგრამებში. ხაზი გაუსვა ასევე ლესლი მარმონ სილკოს, კურტ ვონეგუტის, კარლ სენდბერგის, სტივენ კრეინისა და ამერიკელი ინდიელი მწერლების მნიშვნელობას. ლექციის დასასრულს, ნიუ მექსიკოს უნივერსიტეტის ემერიტუს პროფესორმა სტუდენტების შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტის სტუდენტურმა თვითმმართველობამ რიგით მეექვსე თავმჯდომარედ ზურაბ მესხიძე აირჩია. სტუდენტური თვითმმართველობის თავმჯდომარეობისთვის თავდაპირველად ოთხი კანდიდატი: ლევან დუაძე, გულო თურმანიძე, ზურაბ მესხიძე და გოჩა სურგულაძე იბრძოდა. გულო თურმანიძემ და ლევან დუაძემ საკუთარი კანდიდატურები გოჩა სურგულაძის სასარგებლოდ მოხსნეს. სტუდენტური თვითმმართველობის ცენტრალური საარჩევნო კომისიის ინფორმაციით, 87 წევრიდან სტუდენტური მოძრაობა "აპოლიტიკის" თავმჯდომარეს ზურაბ მესხიძეს 49 სტუდენტმა დაუჭირა მხარი, ხოლო სტუდენტური გაერთიანება "ალერნატივას" ხელმძღვანელს გოჩა სურგულაძეს - 38 ამომრჩეველმა.