ახალი ამბები

ჰოსპისისა და პალიატიური მზრუნველობის საერთაშორისო დღისადმი მიძღვნილი სტუდენტური სამეცნიერო-პრაქტიკული კონფერენცია გაიმართა ბათუმის შოთა რუსთაველის სახელმწიფო უნივერსიტეტში. პალიატიური მზრუნველობის საქართველოს ეროვნული ასოციაციის თავმჯდომარემ, პროფესორმა დიმიტრი კორძაიამ და პალიატიური მზრუნველობის რეგიონულმა კოორდინატორმა აჭარაში მემედ ჯინჭარაძემ და მედიკოსებმა დარგის აქტუალურ საკითხებზე იმსჯელეს. კონფერენციაზე წარმოდგენილი იყო ისეთი მნიშვნელოვანი საკითხები, როგორიცაა: პალიატიური მზრუნველობა საქართველოში, პალიატიური მზრუნველობა საუნივერსიტეტო სამედიცინო განათლებაში, რეგიონული პალიატიური მზრუნველობის სამსახური - აჭარის ავტონომიური რესპუბლიკის გამოცდილება, დაზღვევა პალიატიურ მზრუნველობაში, პალიატიურ მზრუნველობას დაქვემდებარებულ პაციენტთა მონახულება სტუდენტთა მიერ ბინასა და სტაციონარში.

ბათუმის ხელოვნებისა და მუსიკის ცენტრში ბათუმის შოთა რუსთაველის სახელმწიფო უნივერსიტეტისა და საქართველოს საპატრიარქოს წმიდა თამარ მეფის უნივერსიტეტის ორგანიზებით მამა ადამისა (ვახტანგ ახალაძე) და ნანა ავალიშვილის ლიტერატურულ-მუსიკალური პერფომანსი „ზღვა კი იყო უშფოთველ“ შედგა. არქიმანდრიტ ადამის, საპატრიარქოს წმინდა თამარ მეფის სასწავლო უნივერსიტეტის რექტორის მიერ შექმნილი ლექსებისა და ჩანაწერების მიხედვით შექმნილ ლიტერატურულ-მუსიკალურ ღონისძიებაში სხვადასხვა თეატრის მსახიობები მონაწილეობდნენ.

ბათუმის შოთა რუსთაველის სახელმწიფო უნივერსიტეტს ლიტერატურული ფესტივალის „მაიაკოვსკი და საქართველოს“ მონაწილე მწერლები ეწვივნენ. სლავისტიკის დეპარტამენტის პროფესორ-მასწავლებლებთან და სტუდენტებთან ერთად ჟურნალ „დრუჟბა ნაროდოვ“-ის მთავარმა რედაქტორმა, მწერალმა ალექსანდრე ებანოიძემ, ჟურნალ „დრუჟბა ნაროდოვ“-ის რედაქტორის მოადგილემ, პროზაიკოსმა და დრამატურგმა ფარით ნაგიმოვმა, „ნოვაია გაზეტას“ რედაქტორის მოადგილემ, პოეტმა ოლეგ ხლებნიკოვმა, პოეტმა და მწერალმა ანა საედ-შაჰმა საქართველოსა და რუსეთის კულტურულ ურთიერთობებზე ისაუბრეს. შეხვედრაზე სტუმრებმა ასევე გაიხსენეს ვლადიმერ მაიაკოვსკის ცხოვრება, მოღვაწეობა და უმაღლესი საგანმანათლებლო დაწესებულების ბიბლიოთეკასა და სლავისტიკის დეპარტამენტს სამახსოვრო საჩუქრები გადასცეს.

ივანე ჯავახიშვილის სახელობის თბილისის სახელმწიფო უნივერსიტეტის ევროპული კვლევების ინსტიტუტის დირექტორმა ნინო ლაპიაშვილმა სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს ევროპისმცოდნეობაში ინგლისურენოვანი სამაგისტრო და სადოქტორო პროგრამები წარუდგინა. სამაგისტრო საგანმანათლებლო პროგრამა 2007 წელს TACIS-ის ფარგლებში შეიქმნა და ახალგაზრდებს შესაძლებლობას აძლევს დარგის წამყვანი ექსპერტების დახმარებით მიიღონ საფუძვლიანი განათლება ევროინტეგრაციის საკითხებში. მაგისტრანტები ორი წლის განმავლობაში შეისწავლიან ევროკავშირის ეკონომიკას, სამართალს, ევროპეიზაციის პოლიტიკას, ენერგოუსაფრთხოების საკითხებს და მისი ინსტიტუტების ისტორიულ განვითარებას.

DAAD-ის (გერმანიის აკადემიური გაცვლის სამსახური) ქუთაისის საინფორმაციო ცენტრის ხელმძღვანელმა როლფ ცაილერმა ბათუმის შოთა რუსთაველის სახელმწიფო უნივერსიტეტის სტუდენტებისა და პროფესორ-მასწავლებლებისათვის საინფორმაციო შეხვედრა გამართა. გერმანელმა პროფესორმა შეხვედრაზე მიმდინარე სასტიპენდიო პროგრამები წარმოადგინა, ისაუბრა საზაფხულო სკოლებზე, კვლევით და სასწავლო სტიპენდიებზე. DAAD-ის წარმომადგენელმა დეტალურად განიხილა საკონკურსო პირობები, განაცხადის შეფასების სპეციფიკა და კონკურსანტთა შერჩევის კრიტერიუმები.