ახალი ამბები

პროექტ „სტუდენტური ბიზნეს ოლიმპიადის“ წარდგინება შედგა უნივერსიტეტის შოთა რუსთაველის დარბაზში. არასამთავრობო ორგანიზაციის „ახალგაზრდული ინიციატივებისა“ და საქართველოს ბიზნესის განვითარების ცენტრის „კავკასიის“ წარმომადგენლებმა ახალგაზრდებს პროექტის მისია, მიზნები და ამოცანები გააცნეს. პროგრამა აჭარის უმაღლესი საგანმანათლებლო დაწესებულებების სტუდენტებს დაეხმარება ბიზნესგეგმების შედგენაში, პროექტების წერასა და მენეჯმენტის უნარ-ჩვევების ჩამოყალიბებაში. „სტუდენტური ბიზნეს ოლიმპიადის“ ფარგლებში, კონკურსის წესით გამოვლინდება საუკეთესო ბიზნესპროექტები. პროექტი ითვალისწინებს სტუდენტების დასაქმების ხელშეწყობას წამყვან სამთავრობო და არასამთავრობო დაწესებულებებში.

ცნობილი პუბლიცისტისა და საზოგადო მოღვაწის ჰაიდარ აბაშიძის 120 წლისთავისადმი მიძღვნილი საიუბილეო საღამო გაიმართა ბათუმის შოთა რუსთაველის სახელმწიფო უნივერსიტეტში. უმაღლესი საგანმანათლებლო დაწესებულების რექტორმა, პროფესორმა ალიოშა ბაკურიძემ, აჭარის მწერალთა კავშირის ხელმძღვანელმა დავით თედორაძემ, პროფესორებმა: შორენა მახაჭაძემ, შუშანა ფუტკარაძემ, იური ბიბილეიშვილმა, მწერალმა რამაზ სურმანიძემ, პოეტებმა: ვახტანგ ღლონტმა, ცისანა ანთაძემ, ბელა ქებურიამ, საზოგადოების წარმომადგენლებმა და მწერლის შთამომავლებმა კიდევ ერთხელ გაიხსენეს ღვაწლმოსილი მამულიშვილის ცხოვრება და მოღვაწეობა. ჰაიდარ აბაშიძე იყო საქართველოს ეროვნული საბჭოს, ამიერკავკასიის სეიმის, საქართველოს პარლამეტის და დამფუძნებელი კრების „სამუსლიმანო საქართველოს განმათავისუფლებელი კომიტეტის“ წევრი, ტრაპიზონის საზავო კონფერენციის მონაწილე, საქართველოს აღმასრულებელი კომიტეტისა და საქართველოს მწერალთა კავშირის წევრი. საიუბილეო საღამო ბათუმის შოთა რუსთაველის სახელმწიფო უნივერსიტეტისა და აჭარის მწერალთა კავშირის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და ტერნოპილის ეროვნული ეკონომიკური უნივერსიტეტის რექტორმა, პროფესორმა ანდრეი კრისოვატოვმა თანამშრომლობის მემორანდუმს მოაწერეს ხელი. ხელშეკრულება მიზნად ისახავს სტუდენტთა, პროფესორ-მასწავლებელთა და მკვლევართა გაცვლითი პროგრამების განხორციელებას, ერთობლივი კვლევების წარმოებას, საერთაშორისო სამეცნიერო და პრაქტიკული კონფერენციების, სემინარების, სიმპოზიუმების, კონგრესებისა და ტრენინგების ჩატარებას. მხარეთა შეთანხმებით, შემუშავდება საგანმანათლებლო პროგრამები და ხელი შეეწყობა ერთობლივი ცენტრების, ლაბორატორიების, ტექნიკური პარკების შექმნას. მემორანდუმის გაფორმების შემდეგ პროფესორი ანდრეი კრისოვატოვი სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებთან ერთად პროფესორ-მასწავლებლებს შეხვდა და სამომავლო თანამშრომლობის მიმართულებებზე ისაუბრა.

რეფერატულ ნაშრომთა კონკურსისა და სტუდენტთა სამეცნიერო კონფერენციის მონაწილეთა დაჯილდოება გაიმართა შოთა რუსთაველის დარბაზში. სტუდენტთა სამეცნიერო ცენტრის ორგანიზებით გამართულ კონკურსსა და კონფერენციაში ბათუმის შოთა რუსთაველის სახელმწიფო უნივერსიტეტის სხვადასხვა სპეციალობის 239 სტუდენტი მონაწილეობდა. პროექტ „განათლების სივრცის“ ფარგლებში რეფერატულ ნაშრომთა კონკურსში საკუთარი შესაძლებლობები წარმოაჩინა ასევე ბათუმის საჯარო სკოლების 160-მა მოსწავლემ. ახალგაზრდებმა რეფერატული ნაშრომები 18 სექციის, ხოლო სამეცნიერო მოხსენებები - 22 სექციის მიმართულებით წარმოადგინეს.

"შეაჩერე ანექსია" - ამ მოწოდებით ბათუმის შოთა რუსთაველის სახელმწიფო უნივერსიტეტის სტუდენტებმა ცოცხალი ჯაჭვით მცოცავი ოკუპაცია გააპროტესტეს და დაგმეს. სტუდენტური თვითმმართველობის ორგანიზებით, ახალგაზრდები ილია ჭავჭავაძის ძეგლთან შეიკრიბნენ, ცოცხალი ჯაჭვით იაკობ გოგებაშვილის ქუჩის მიმართულებით გაემართნენ და წუთიერი დუმილით პატივი მიაგეს იუნკერების ხსოვნას. სტუდენტური აქცია ქვეყნის მასშტაბით 15:00 საათზე დაიწყო, ერთდროულად შვიდ ქალაქში: თბილისში, ბათუმში, რუსთავში, თელავში, გორში, ქუთაისსა და ზუგდიდში მიმდინარეობდა და მასში სხვადასხვა უმაღლესი საგანმანათლებლო დაწესებულების სტუდენტები მონაწილეობდნენ. ახალგაზრდების განცხადებით, აქციის მიზანია დაანახონ საერთაშორისო საზოგადოებას, როგორც პოლიტიკურ მოკავშირეებს, ისე მოწინააღმდეგეებს, რომ პოლიტიკური და იდეოლოგიური განსხვავებების მიუხედავად, საქართველოს მოქალაქეების აბსოლიტური უმრავლესობა არ ეგუება და ერთიანი ძალებით იბრძვის მცოცავი ოკუპაციის წინააღმდეგ.