ახალი ამბები

ბათუმის შოთა რუსთაველის სახელმწიფო უნივერსიტეტის ჯანდაცვის მიმართულების პროფესორებმა და ბათუმის რეფერალური საავადმყოფოს ექიმებმა, ხულოს მუნიციპალიტეტის მხარდაჭერით, „ჩემი ოჯახის კლინიკის“ ქსელში არსებულ შუახევის საავადმყოფოს ბაზაზე უფასო სამედიცინო გამოკვლევები ჩაატარეს. აქციის ფარგლებში სხალთა-ხიხაძირის ხეობის - თხილვანას, ხიხაძირის, ფუშრუკაულისა და სხალთის თემების მოსახლეობას უფასო სამედიცინო გასინჯვა, ექოსკოპიური და რენტგენოლოგიური გამოკვლევები და დამატებითი დიაგნოსტიკა (თერაპიის, პედიატრიის, კარდიოლოგიის, ენდოკრინოლოგიის, უროლოგიის, ალერგოლოგიის, ქირურგიის, ანგიოლოგიის, ონკოლოგიის, რადიოლოგიის, ნევროლოგიის, ოტორინოლარინგოლოგიის, ტრავმატოლოგიის, დერმატო-ვენეროლოგიის, გინეკოლოგიის, ორთოპედიისა და სტომატოლოგიის) მიმართულებით ჩაუტარდათ. ხიხაძირისა და ფუშრუკაულის ამბულატორიებს ბათუმის სახელმწიფო უნივერსიტეტის რექტორმა, პროფესორმა ალიოშა ბაკურიძემ უფასოდ პირველადი საჭიროების მედიკამენტები გადასცა. შუახევის საავადმყოფოში გამართული აქციის მონაწილეები აჭარის ა.რ. ჯანმრთელობისა და სოციალური დაცვის მინისტრმა ნუგზარ სურმანიძემ და ხულოს მუნიციპალიტეტის გამგებელმა ბესიკ ბაუჩაძემ მოინახულეს.

პროფესორ ჯემალ გახოკიძის წიგნის “ბეწვის ხიდზე” პრეზენტაცია გაიმართა შოთა რუსთაველის დარბაზში. ნაშრომი ბათუმის შოთა რუსთაველის სახელმწიფო უნივერსიტეტის, საქართველოს ტექნიკური უნივერსიტეტის პროფესორ-მასწავლებლებსა და სამართალდამცავი ორგანოების წარმომადგენლებს ასოცირებულმა პროფესრომა გივი აბაშიძემ წარუდგინა. “ბეწვის ხიდზე” ქვეყნის შიდა პოლიტიკასთან ერთად უშიშროების საკითხებს ეძღვნება და მასში აღწერილია ჯიხაშკარის ცნობილ მოვლენები, გოჩა ესებუას მიერ გაეროს ოთხი უცხოელი დამკვირვებლის გატაცება და ელიავას ამბოხი. წიგნში გადმოცემულია ამ პერიოდის მოვლენების ქრონიკა და ავტორის პიროვნულ პორტრეტთან დაკავშირებული ნარკვევები, სხვადასხვა დროს პრესის ფურცლებზე გამოქვეყნებული მასალები, თანამებრძოლების აზრები, შეფასებები. საქართველოს ტექნიკური უნივერსიტეტის სენატის სპიკერი, პროფესორი, ჯემალ გახოკიძე იყო საქართველოს სახელმწიფო უშიშროების მინისტრი და საქართველოს უზენაესი სასამართლოს მოსამართლე.

პროფესორმა მერაბ კილაძემ ბათუმის შოთა რუსთაველის სახელმწიფო უნივერსიტეტის პროფესორ-მასწავლებლების და სტუდენტებისათვის ლექცია წაიკითხა თემაზე: "ქირურგიული მენეჯმენტი და სამოქალაქო ჰოსპიტლის ტრანსფორმაცია ლოკალური სამხედრო კონფლიქტის დროს ("აგვისტოს 2008 წ. ომი")“. ცნობილმა ქირურგმა სამხედრო კონფლიქტის დროს სამოქალაქო ჰოსპიტლის ტრანსფორმაციასა და ქირურგიული სამსახურის ეფექტურად ფუნქციონირების საკითხებზე ისაუბრა. მომხსენებელმა ფაქტიურ მასალაზე დაყრდნობით (739 დაჭრილი და დაშავებული) განიხილა ქირურგიული მომსახურების ორგანიზების და ოპტიმიზაციის სხვადასხვა ასპექტი. სამხედრო–საველე ქირურგია ტრადიციული ქირურგიისგან განსხვავდება, რაც გულისხმობს ქირურგიული დახმარების ეტაპობრიობას და ეყრდნობა "დაზიანებათა კონტროლის ქირურგიის" პრინციპებს: სწორი ტრიაჟი და სელექცია, მინიმალური ქირურგიული პროცედურები და გადავადებული საბოლოო ქირურგიული მკურნალობა. ამ პრინციპების გამოყენებით შესაძლებელი ხდება ოპერაციული ლეტალობის, პოსტოპერაციული გართულებების მინიმიზაცია და ეფექტური ქირურგიული მენეჯმენტის უზრუნველყოფა.

ბათუმის შოთა რუსთაველის სახელმწიფო უნივერსიტეტის პროფესორ-მასწავლებლები ხულოსა და შუახევის საჯარო სკოლების მეთორმეტე კლასის მოსწავლეებს შეხვდნენ. უმაღლესი საგანმანათლებლო დაწესებულების აკადემიურმა პერსონალმა აბიტურიენტებს კონსულტაციები გაუწიეს, რაც ახალგაზრდებს ერთიანი ეროვნული გამოცდების წარმატებით ჩაბარებაში დაეხმარება. მათ მეთორმეტე კლასელებს ასევე გააცნეს უნივერსიტეტის საგანმანათლებლო პროგრამები და არსებული სიახლეები. აჭარის მაღალმთიანეთში გამართული შეხვედრები კითხვა-პასუხის რეჟიმში წარიმართა და პროფესორ-მასწავლებლებმა მოსწავლეების აქტუალურ შეკითხვებს უპასუხეს.

ჰუმანიტარულ მეცნიერებათა ფაკულტეტის ქართველოლოგიის ცენტრის ორგანიზებით ბათუმის შოთა რუსთაველის სახელმწიფო უნივერსიტეტში X სამეცნიერო კონფერენცია ჩატარდა. სესია გახსნა და სამეცნიერო პროექტების (შოთა რუსთაველის ეროვნული სამეცნიერო ფონდის გრანტი ,,კლარჯეთი” (№31/69), სამეცნიერო პროექტი ,,მუჰაჯირები...” (დამფინანსებელი აჭარის არ მთავრობა) 2013 წლის ანგარიში საზოგადოებას წარუდგინა პროექტების სამეცნიერო ხელმძღვანელმა, პროფესორმა მამია ფაღავამ. პროფესორ-მასწავლებლებმა: მალხაზ ჩოხარაძემ, თინა შიოშვილმა, ზაზა შაშიკაძემ, ნუგზარ მგელაძემ, რამაზ ხალვაშმა, მაია ბარამიძემ, დოქტორანტმა მეჰმედ ალი ქესკინმა და სხვ. მოხსენებები წარმოადგინეს ისტორიული კლარჯეთის ფოლკლორის, ეთნოლოგიის, ისტორიისა და კლარჯული კილოს პრობლემებზე. შრომები და 2013 წლის ზაფხულის კომპლექსური ექსპედიციის მიერ მოპოვებული დიალექტოლოგიური და ფოლკლორული მასალები (ლექსიკონითურთ) დაიბეჭდება ქართველოლოგიის ცენტრის ,,კრებულის” VIII ტომში.