ახალი ამბები

ბათუმის შოთა რუსთაველის სახელმწიფო უნივერსიტეტის ბიბლიოთეკამ კონკურსის საფუძველზე სტაჟირებისა და დასაქმების პროგრამის მონაწილე სტუდენტები შეარჩია. ოთხი საუკეთესო სტუდენტი რვა თვის განმავლობაში შეისწავლის საბიბლიოთეკო დოკუმენტების სისტემატიზაციას, ინვენტარიზაციას, საავტორო უფლებების დაცვას, ბეჭდური კოლექციის განლაგებას წიგნთსაცავში, ფონდების დაცვასა და ჰიგიენას, მკითხველთან ურთიერთობისა და მომსახურების წესებს. ილია ჭავჭავაძის სამკითხველო დარბაზში გამართულ შეხვედრაზე უმაღლესი საგანმანათლებლო დაწესებულების ადმინისტრაციის ხელმძღვანელმა ედიშერ ჩავლეიშვილმა და ბიბლიოთეკის დირექტორმა ლელა თურმანიძემ გამარჯვებულ კონკურსანტებს წარმატება მიულოცეს და 2013 წლის პროგრამის სტაჟიორებს სერტიფიკატები გადასცეს.

სტუდენტთა სამეცნიერო ცენტრის ორგანიზებით ბათუმის შოთა რუსთაველის სახელმწიფო უნივერსიტეტში დავით აღმაშენებლის ხსენების დღისადმი მიძღვნილი ინტელექტუალური თამაში ჩატარდა. შეჯიბრში ქალაქ ბათუმის ოცდაექვსი საჯარო და კერძო სკოლის 110-ზე მეტი მოსწავლე მონაწილეობდა. კომპეტენტური ჟიურის შეფასებით, საუკეთესოდ მეცხრე საჯარო სკოლის გუნდი „მამულიშვილნი“ დასახელდა, II ადგილი შპს მასტერკლასის გუნდმა „მასტერკლასმა“ მოიპოვა, ხოლო III ადგილი სამ გუნდს ერგო. ინტელექტუალური თამაში ბსუ-ს სტუდენტური თვითმმართველობის, ნიკო ბერძენიშვილის ინსტიტუტის, ბათუმისა და ლაზეთის ეპარქიისა და ბათუმის ბოტანიკური ბაღის მხარდაჭერით გაიმართა. გამარჯვებულ გუნდებს წიგნები, ხატები და სამახსოვრო საჩუქრები გადაეცათ.

ბათუმის შოთა რუსთაველის სახელმწიფო უნივერსიტეტის ბიბლიოთეკაში ტრენინგი ჩატარდა თემაზე: ”სწავლების მეთოდები”. სწავლება ტემპუსის საგრანტო პროექტის ”530311-TEMPUS-1-2012-1-AM-TEMPUS-JPCR: MASTER IN HIGHER EDUCATION MANAGEMENT: DEVELOPING LEADERS FOR MANAGING EDUCATIONAL TRANSFORMATION” ფარგლებში დაგეგმილი ტრენინგების მეორე ეტაპი გაიმართა და მიზნად ისახავდა სხვადასხვა უმაღლესი საგანმანათლებლო დაწესებულების პროფესორ-მასწავლებლებისათვის სწავლების თანამედროვე მეთოდების გაცნობას. პედაგოგიკურ მეცნიერებათა დეპარტამენტის პროფესორმა ლელა თავდგირიძემ ტრენინგის მონაწილეებს ორი დღის განმავლობაში სწავლება–სწავლის მიდგომები, სტრატეგიები, შეფასების თანამედროვე პრინციპები, კრიტერიუმები, კრიტიკული აზროვნებისა და გუნდური მუშაობის სპეციფიკა წარუდგინა.

სამხრეთ საქართველოდან თურქეთის შიდა პროვინციაში გადასახლებული ქართველების (მუჰაჯირებს) ისტორიას, მათ შთამომავალთა თანამედროვე ყოფას, კულტურასა და სხვა აქტუალურ საკითხებს მიეძღვნა ქართველოლოგიის ცენტრის სამეცნიერო კონფერენცია „მუჰაჯირები“. სამეცნიერო სესია ბათუმის შოთა რუსთაველის სახელმწიფო უნივერსიტეტში ჩატარდა და მის მუშაობაში საქართველოს სხვადასხვა უმაღლესი საგანმანათლებლო დაწესებულებისა და კვლევითი ცენტრის წარმომადგენლებთან ერთად, უცხოელი მკვლევრებიც მონაწილეობდნენ. „საზღვარგარეთ მცხოვრებ ქართველთა დასახლებებისა და ყოფის კვლევის“ პროგრამის ფარგლებში გამართულ კონფერენციაზე მონაწილეებმა ქართველოლოგიის ცენტრის მიერ ერთი წლის განმავლობაში წარმოებული კვლევა-ძიების შედეგები შეაჯამეს.

ტემპუსის საგრანტო პროექტის „530311-TEMPUS-1-2012-1-AM-TEMPUS-JPCR: MASTER IN HIGHER EDUCATION MANAGEMENT: DEVELOPING LEADERS FOR MANAGING EDUCATIONAL TRANSFORMATION“ ეგიდით ბათუმის შოთა რუსთაველის სახელმწიფო უნივერსიტეტში სამდღიანი ტრენინგი გაიმართა თემაზე: „ორგანიზაციული მენეჯმენტი“. ეკონომიკის დოქტორმა კონსტანტინე მეგრელიშვილმა აჭარის უმაღლესი საგანმანათლებლო დაწესებულებების წარმომადგენლებს უმაღლესი განათლების მენეჯმენტი გააცნო. ასევე ისაუბრა მენეჯმენტის საერთაშორისო გამოცდილებასა და თანამედროვე მიღწევებზე. ტემპუსის პროექტის ფარგლებში, ევროპელი პარტნიორების კონსულტაციების საფუძველზე მომზადდა სამაგისტრო პროგრამა „უმაღლესი განათლების მენეჯმენტი“. საგანმანათლებლო პროგრამის მიზანია თანამედროვე მოთხოვნების შესატყვისი კომპეტენციის მქონე მაღალკვალიფიციური და კონკურენტუნარიანი მენეჯერების მომზადება.სწავლების დასასრულს ექსპერტმა ეკონომიკის დარგში მარკ როდესმა ტრენინგის მონაწილეებს გამოცდილება გაუზიარა და სერტიფიკატები გადასცა.