ახალი ამბები

შეფასებისა და გამოცდების ეროვნული ცენტრის დირექტორი მაია მიმინოშვილი ბათუმის შოთა რუსთაველის სახელმწიფო უნივერსიტეტის სტუდენტებს შეხვდა და ორგანიზაციის - ,,მოქალაქე“ პროექტი ,,სტუდენტები თვითმმართველობისათვის“ გააცნო. პროექტი მიზნად ისახავს ახალგაზრდების ჩართვას სამოქალაქო საზოგადოების განვითარების პროცესში, ადგილობრივი დემოკრატიის გაძლიერებას და თვითმმართველობის იდეის პოპულარიზაციას. პროგრამა ითვალისწინებს საზოგადოებრივ პროცესებში სტუდენტების თანამონაწილეობის მნიშვნელობის გაზრდას, მოქალაქეობრივი მოვალეობებისა და როლის გაცნობიერების ხელშეწყობას. პროექტი ხელს შეუწყობს თვითმმართველობის საკითხებში ახალგაზრდა პროფესიონალების მომზადებას და მათი ჩართულობით მხარს დაუჭერს ადგილობრივი თვითმმართველობის განვითარებას. ,,სტუდენტები თვითმმართველობისათვის“ წარდგინების დასასრულს, შეფასებისა და გამოცდების ეროვნული ცენტრის დირექტორმა მაია მიმინოშვილმა სტუდენტების შეკითხვებს უპასუხა.

ჰაინრიხ ბიოლის ფონდის სამხრეთ კავკასიის რეგიონალური ბიუროს პროექტის ფარგლებში, ბათუმის შოთა სახელმწიფო უნივერსიტეტში ლექციების ციკლი „ვის ეშინია ფემინიზმის“ დაიწყო. შოთა რუსთაველის დარბაზში ფილოსოფოსმა, ქალის უფლებების დამცველმა ლელა გაფრინდაშვილმა საჯარო ლექცია წაიკითხა თემაზე: „ფემინიზმი და ქალთა უფლებები, მოძრაობა ნაპირიდან ცენტრისკენ“. მომხსენებელმა ისაუბრა ქალის უფლებების მოპოვების ისტორიასა და მის ძირითად მოქმედ პირებზე. მსმენელები გაეცნენ ფემინისტური იდეების დასავლურ ისტორიასა და ქართულ სინამდვილესთან არსებულ კავშირს. საუბრისას ასევე ყურადღება გაამახვილა თანასწორობის იდეასა და იმ ქართველ ქალებზე, რომელთაც გზა გაუკვალეს მომავალი თაობის ქალებისათვის. საჯარო ლექციების 13 დეკემბრამდე გაგრძელდება და ყოველ პარასკევს 17:00 საათზე ჩატარდება.

ბათუმის შოთა რუსთაველის სახელმწიფო უნივერსიტეტში I საერთაშორისო სამეცნიერო-პრაქტიკული კონფერენცია „თანამედროვე მენეჯმენტის თეორია და პრაქტიკა“ გაიხსნა. ასზე მეტი ქართველი, რუსი, უკრაინელი, პოლონელი, აზერბაიჯანელი, ლიტველი, ყაზახი მკვლევარი და ექსპერტი მოხსენებას წარმოადგენს მენეჯმენტის თეორიისა და პრაქტიკის აქტუალურ პრობლემებზე. მომხსენებლები განიხილავენ უახლეს მიღწევებს ორგანიზაციის მენეჯმენტის, სტრატეგიული მენეჯმენტისა და კორპორაციული მართვის, პროექტების და ადამიანური რესურსების მენეჯმენტის, ინოვაციების მენეჯმენტისა და ცვლილებათა მართვის მიმართულებით. ორდღიანი კონფერენცია უნივერსიტეტის ეკონომიკისა და ბიზნესის ფაკულტეტის, სოხუმის სახელმწიფო უნივერსიტეტისა და არასამთავრობო ორგანიზაციის „ლიდერთა კლუბის“ ორგანიზებით იმართება.

საქართველოს ფრანგული ინსტიტუტის საუნივერსიტეტო თანამშრომლობის ასისტენტმა, ორგანიზაცია კამპუს ფრანსის წარმომადგენელმა თბილისში ანა ლოლუამ პრეზენტაცია გამართა თემაზე: „სწავლა საფრანგეთში“. ბათუმის შოთა რუსთაველის სახელმწიფო უნივერსიტეტის სტუდენტები გაეცნენ საფრანგეთში სწავლის გაგრძელების შესაძლებლობებს, საფრანგეთის მთავრობის სტიპენდიებსა და ენის შემსწავლელ კურსებს. ორგანიზაციის წარმომადგენელმა ასევე ისაუბრა კონკურსის ჩატარების პირობებსა და მონაწილეთა შეფასების კრიტერიუმებზე

III საერთაშორისო-სამეცნიერო კონფერენცია „კომპიუტინგი/ინფორმატიკა, განათლების მეცნიერებები, მასწავლებლის განათლება“ ტარდება ბათუმის შოთა რუსთაველის სახელმწიფო უნივერსიტეტში. სხვადასხვა ქვეყნის მეცნიერები სამი დღის განმავლობაში კომპიუტინგის, ინფორმატიკის, განათლების მეცნიერებებისა და მასწავლებლის განათლების აქტუალურ საკითხებსა და სამომავლო პერსპექტივებზე იმსჯელებენ. მკვლევარები ბოლო პერიოდში წარმოებული კვლევის შედეგებს წარმოადგნენ შემდეგი სექციების მიმართულებით: საინფორმაციო სისტემების პროგრამული ინჟინერია, ბიზნეს პროცესების ინტეგრაცია და ავტორიზაცია, საინფორმაციო სისტემები ტექნოლოგიები, ეკონომიკური ინფორმატიკა, ინფორმატიკის დიდაქტიკა, განათლების მეცნიერებები, მასწავლებლის განათლება და შავი ზღვის ბიომრავალფეროვნების შენარჩუნებისა და კონვენსაციის საგანმანათლებლო მნიშვნელობა.