ახალი ამბები

მწერალმა დათო ტურაშვილმა, ივანე ჯავახიშვილის სახელობის თბილისის სახელმწიფო უნივერსიტეტისა და კომპანია „ჯეოსელის“ წარმომადგენლებმა ბათუმის შოთა რუსთაველის სახელმწიფო უნივერსიტეტის სტუდენტებს სალიტერატურო კონკურსი „შემოდგომის ლეგენდა“ წარუდგინეს. კონკურსი მეექვსედ ჩატარდება და მასში საქართველოს სხვადასხვა უმაღლესი საგანმანათლებლო დაწესებულების შემოქმედებითი ნიჭით დაჯილდოებული და ლიტერატურის მოყვარული სტუდენტები ჩაერთვებიან. „შემოდგომის ლეგენდა“ ილიას მთაზე მდებარე საქართველოს იუსტიციის სასწავლო ცენტრში 15 სექტემბერს დაიწყო და ორ ეტაპად ჩატარდება. კონკურსის მონაწილეებმა ჟიურის პროზაული ნაშრომი 12 ოქტომბრის ჩათვლით უნდა წარუდგინონ. პრეზენტაციის დასასრულს მწერალმა დათო ტურაშვილმა ახალგაზრდების შეკითხვებს უპასუხა.

საქართველოს მეცნიერებათა აკადემიის აკადემიკოსმა ელგუჯა ხინთიბიძემ ბათუმის შოთა რუსთაველის სახელმწიფო უნივერსიტეტის სტუდენტებისა და პროფესორ მასწავლებლებისათვის საჯარო ლექციების ციკლი წაიკითხა. ღვაწლმოსილმა პროფესორმა სამი დღის განმავლობაში ყურადღება გაამახვილა ისეთ მნიშვნელოვან საკითხებზე, როგორიცაა: „ვეფხისტყაოსანი“ შუასაუკუნებრივი და რენესანსული აზროვნების კონტექსტში, „ვეფხისტყაოსნის“ სიყვარული - ახალი ფილოსოფიური კონცეფცია (ტრუბადურები, დანტე, პეტრარკა) და „ვეფხისტყაოსანი“ შექსპირის ეპოქაში და მისი თანამედროვე დრამატურგიის ლიტერატურული წყარო. ფილოლოგიის დოქტორის, პროფესორ ელგუჯა ხინთიბიძის კვლევის საგანია შუასაუკუნეების ქართული ლიტერატურა და ქართულ-ბიზანტიური ლიტერატურული ურთიერთობები, რუსთველოლოგია და წყაროთმცოდნეობის დარგები. საჯარო ლექციები აჭარის ა.რ. განათლების, კულტურისა და სპორტის სამინისტროს “უმაღლესი განათლების ხელშეწყობის პროგრამის” ფარგლებში გაიმართა.

უნივერსიტეტის სააქტო დარბაზში პროექტ „მოტივატორის“ გამარჯვებულთა დაჯილდოება გაიმართა. სტუდენტური პროექტი ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის მარკეტინგის მიმართულების პროფესორ-მასწავლებელთა და სტუდენტთა ინიციატივით შექმნილი მარკეტინგული საკონსულტაციო კომპანია „რევოლუციის“ ორგანიზებით განხორციელდა. 24 კონკურსანტიდან კომპანიამ 6 გამარჯვებული სტუდენტი დაასაქმა და პროექტში მონაწილე კომპანიების წარმომადგენლებმა საუკეთესო მონაწილეებს სამახსოვრო საჩუქრები გადასცეს. ორთვიანი პროექტი „მოტივატორი“ 4 ეტაპისგან შედგებოდა, ახალგაზრდები ამ დროის განმავლობაში სხვადასხვა ორგანიზაციაში მუშაობდნენ. სტუდენტებმა მარკეტინგის თეორიული, პრაქტიკული ცოდნა მიიღეს და ბიზნესისა და სახელმწიფო სექტორებში არსებული გამოცდილება გაიზიარეს. მათ ასევე გამოუმუშავდათ ლიდერობის, გაყიდვების, დროის კონტროლისა და ფინანსების ოპტიმალურად გამოყენების უნარ-ჩვევები.

“სკოლა-უნივერსიტეტის“ თანამშრომლობის ფარგლებში, ბათუმის შოთა რუსთაველის სახელმწიფო უნივერსიტეტისა და ბათუმის #2 საჯარო სკოლის ერთობლივი პროექტი „ერთი დღე უნივერსიტეტში“ განხორციელდა. უმაღლეს საგანმანათლებლო დაწესებულებაში გაიმართა კონფერენცია თემაზე: „ჩემი რუსთაველი“ და კონფერენცია-დისპუტი: „რატომ არის საამაყო ატარო დავით აღმაშენებლის სახელი“. შედგა კლუბებისა და პროექტების წარდგინება: „დემოკრატია იწყება შენით“, „კაცი კაცითაო“, „ალტერნატივა“, „თანადგომა“, გაცვლითი პროგრამა და „საგანმანათლებლო დებატები პროგრესისათვის“. გაიხსნა მოსწავლეების ნამუშევრების გამოფენა. უნივერსიტეტის პროფესორ-მასწავლებლებმა და სკოლის მასწავლებლებმა საჯარო ლექციები და გაკვეთილები ჩაატარეს. გაიმართა საჩვენებელი შეხვედრა მკლავჭიდში.

ბათუმის შოთა რუსთაველის სახელმწიფო უნივერსიტეტს ნახჭევანის სახელმწიფო უნივერსიტეტის პროფესორ-მასწავლებლები ეწვივნენ. უმაღლესი საგანმანათლებლო დაწესებულების რექტორის მოადგილესთან, პროფესორ ნათია წიკლაშვილთან გამართულ შეხვედრაზე სტუმრებმა გაცვლით პროგრამასა და ერთობლივ სასწავლო-საგანმანათლებლო პროექტებზე ისაუბრეს. ნახჭევანის სახელმწიფო უნივერსიტეტთან გაფორმებული მემორანდუმის ფარგლებში სექტემბრიდან ბსუ-ს ჰუმანიტარულ მეცნიერებათა ფაკულტეტის სპეციალობაზე 4 აზერბაიჯანელი სტუდენტი ისწავლის, ხოლო ქართველი სტუდენტები სასწავლებლად ნახჭევანში მარტში გაემგზავრებიან. სამი წლის განმავლობაში გაცვლით პროგრამაში 24-მა ახალგაზრდამ მიიღო მონაწილეობა.