ახალი ამბები

არასამთავრობო ორგანიზაცია „შეზღუდული შესაძლებლობის მქონე პირების უფლებებისთვის“ ხელმძღვანელმა თამაზ მჟავანაძემ ბათუმის შოთა რუსთაველის სახელმწიფო უნივერსიტეტის სტუდენტებისათვის ლექცია წაიკითხა თემაზე: „შეზღუდული შესაძლებლობის მქონე პირები, საზოგადოება და სახელმწიფო“. მომხსენებელმა განსაკუთრებული საჭიროების მქონე პირთა პრობლემებზე, მათი მოგვარებს გზებზე, ადაპტირებული გარემოსა და ფსიქოლოგიური ცენტრების შექმნის აუცილებლობაზე ისაუბრა. საჯარო ლექცია სამართალმცოდნეობის სპეციალობის პირველი კურსის სტუდენტების ორგანიზებით პროექტის - „დემოკრატია და მოქალაქეობა“ ფარგლებში გაიმართა.

ბათუმის შოთა რუსთაველის სახელმწიფო უნივერსიტეტში ევროკავშირის გაცვლითი საგრანტო პროგრამის „ერასმუს მუნდუსის“ პროექტების წარდგინება გაიმართა. არასამთავრობო საერთაშორისო სტუდენტური ორგანიზაციის - „Erasmus Student Network (ESN) Tbilisi ISU“ წარმომადგენლებმა სხვადასხვა სპეციალობის სტუდენტებს კონკურსში მონაწილეობის პირობები და საჭირო დოკუმენტაციის შედგენის წესები გააცნეს. ღონისძიების ფარგლებში „საქართველოში Erasmus+“ ოფისის მხარდაჭერით „ერასმუს მუნდუსის“ პროგრამების ცნობადობის კვლევა ჩატარდა.

უმაღლეს სასწავლებლებს შორის აჭარის ღია პირველობა ფუტსალში ბსუ-ს გუნდის გამარჯვებით დასრულდა. ფინალურ შეხვედრაში ბათუმის შოთა რუსთაველის სახელმწიფო უნივერსიტეტის ნაკრებმა ანგარიშით 6:1 ბათუმის სახელმწიფო საზღვაო აკადემიის გუნდი დაამარცხა. ჩემპიონატი აჭარის ფუტსალისა და საპლაჟო ფეხბურთის ფედერაციის ორგანიზებითა და აჭარის სპორტისა და ახალგაზრდობის საქმეთა დეპარტამენტის მხარდაჭერით ჩატარდა. ბათუმის შოთა რუსთაველის სახელმწიფო უნივერსიტეტი ულოცავს ნაკრებს ღირსეულ გამარჯვებას და წარმატებებს უსურვებს.

ბათუმის შოთა რუსთაველის სახელმწიფო უნივერსიტეტს ფათიჰის უნივერსიტეტის რექტორი, პროფესორი შერიფ ალი თექალანი, ბიონანო ტექნოლოგიის ცენტრის დირექტორი, პროფესორი აიჰან ბოსკურტი, შავი ზღვის საერთაშორისო უნივერსიტეტის რექტორი, პროფესორი ილიას ჩილოღლუ, სულეიმან შაჰის უნივერსიტეტის მენეჯმენტის, ადმინისტრირების და საერთაშორისო ურთიერთობების ფაკულტეტის დეკანი, პროფესორი ერჰან ბირგილი და ოზალის (ანკარა) უნივერსიტეტის პროფესორ-მასწავლებლები ეწვივნენ. დელეგაციის წევრები უნივერსიტეტის რექტორს, პროფესორ ალიოშა ბაკურიძეს, დეკანებსა და პროფესორ-მასწავლებლებს შეხვდნენ. მხარეები უმაღლესი საგანმანათლებლო დაწესებულებების წარდგინების შემდეგ, სამომავლო თანამშრომლობის მიმართულებებსა და ერთობლივი სასწავლო-საგანმანათლებლო პროექტების შემუშავებაზე შეთანხმდნენ. ასევე დაიგეგმა სტუდენტებისა და პროფესორ-მასწავლებლების გაცვლითი პროგრამების განხორციელება და ერთობლივი კვლევების წარმოება.

საერთაშორისო ფესტივალში - „ნიღაბი 2014“ ბათუმის შოთა რუსთაველის სახელმწიფო უნივერსიტეტის სტუდენტურმა თეატრმა „დასმა“ ქალის საუკეთესო როლის შემსრულებლის ნომინაციაში გაიმარჯვა. ბათუმელი სტუდენტები მაყურებლის წინაშე რეჟისორ როინ დვალის მიერ დადგმული კომედიური ჟანრის სპექტაკლით - „ნაფტალინი“ წარსდგნენ. კომპეტენტური ჟიურის გადაწყვეტილებით, ქალის საუკეთესო როლის შემსრულებლად ჰუმანიტარულ მეცნიერებათა ფაკულტეტის ქართული ფილოლოგის სპეციალობის მეორე კურსის სტუდენტი ნინო გაბეჩავა დასახელდა. ფესტივალი „მოყვარულ სტუდენტურ თეატრთა ასოციაციის“ ორგანიზებით თბილისის სახელმწიფო სამედიცინო უნივერსიტეტის თეატრალურ დარბაზში გაიმართა და მასში საქართველოს უმაღლესი საგანმანათლებლო დაწესებულებების თეატრალურ დასებთან ერთად, სხვადასხვა ქვეყნის სტუდენტური თეატრებიც მონაწილეობდნენ. უნივერსიტეტი სტუდენტურ თეატრ „დასს“ ულოცავს გამარჯვებას და უსურვებს წარმატებებს.