ახალი ამბები

განათლების საერთაშორისო ცენტრის პროგრამების პრეზენტაცია ჩატარდა ბათუმის შოთა რუსთაველის სახელმწიფო უნივერსიტეტში. საქართველოს მთავრობის ადმინისტრაციის წარმომადგენელმა, პროგრამების კოორდინატორმა ნინო სულავამ სტუდენტებს საერთაშორისო სამაგისტრო და სადოქტორო პროგრამასა და საჯარო დაწესებულებაში დასაქმებულ პირთა კვალიფიკაციის ამაღლებისა და გადამზადების პროგრამაში მონაწილეობა შესთავაზა. ცენტრი 2014 წელს პრემიერ მინისტრის ირაკლი ღარიბაშვილის ინიციატივით დაარსდა და მიზნად ისახავს სახელმწიფოს განვითარების პრიორიტეტების გათვალისწინებით საერთაშორისო სტანდარტების შესაბამისი შესაბამისი მაღალკვალიფიციური სპეციალისტების მომზადებას.

შოთა რუსთაველის ეროვნული სამეცნიერო ფონდის გრანტის “კლარჯეთი“ (საგრანტო პროექტის სამეცნიერო ხელმძღვანელი პროფესორი მამია ფაღავა, მენეჯერი - პროფესორი მალხაზ ჩოხარაძე) ფარგლებში ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ქართველოლოგიის ცენტრის XI სამეცნიერო კონფერენცია გაიმართა. უმაღლესი საგანმანათლებლო დაწესებულების პროფესორ-მასწავლებლებმა, მკვლევარებმა და დოქტორანტებმა სესიაზე აგვისტოში, ისტორიულ სამხრეთ-დასავლეთ საქართველოში წარმოებული ათდღიანი ექსპედიციის შედეგები შეაჯამეს. კლარჯეთის სოფლებში მოპოვებული ფოლკლორული, დიალექტოლოგიური, ეთნოლოგიური, ონომასტიკური და მატერიალური კულტურის ძეგლების ამსახველი ფოტო-ვიდეო მასალები სამეცნიერო მიმოქცევაში სათანადო დამუშავების შემდეგ შევა და გამოყენებული იქნება კომპლექსურ მონოგრაფიაში „კლარჯეთი“.

საქართველოს მთავარი პროკურატურის ოჯახში ძალადობის აღმოფხვრის საერთაშორისო დღისადმი მიძღვნილი კვირეულის ფარგლებში ბათუმის შოთა რუსთაველის სახელმწიფო უნივერსიტეტში სემინარი ჩატარდა. აჭარის ა.რ. უფროსმა პროკურორმა ვლადიმერ თურმანიძემ იურიდიული ფაკულტეტის სტუდენტებს ოჯახურ ძალადობაზე, არსებულ პრობლემებსა და მასთან დაკავშირებულ სამართლებრივ მხარეებზე ესაუბრა. კვირეული მთელ ქვეყნის მასშტაბით მიმდინარეობს და საზოგადოების ინფორმირებასთან ერთად, დანაშაულის პრევენციას ისახავს მიზნად.

ევროკავშირის გაცვლითი საგრანტო პროგრამის „ერასმუს მუნდუსის“ პროექტების პრეზენტაცია ჩატარდა ბათუმის შოთა რუსთაველის სახელმწიფო უნივერსიტეტში. უმაღლესი საგანმანათლებლო დაწესებულების საგარეო ურთიერთობათა სამსახურის უფროსმა, პროგრამა EUROEAST-ის კოორდინატორმა ნანა ყურშუბაძემ სტუდენტებსა და პროფესორ-მასწავლებლებს 15 გაცვლითი პროგრამა წარუდგინა და კონკურსში მონაწილეობის პირობები გააცნო. უცხოეთში სწავლის შესაძლებლობა ეძლევა ყველა საფეხურის სტუდენტს, აკადემიურ პერსონალსა და მკვლევარს.

ბათუმის შოთა რუსთაველის სახელმწიფო უნივერსიტეტის ისტორიის, არქეოლოგიის და ეთნოლოგიის დეპარტამენტის, სტუდენტთა მხარდაჭერის და მომსახურების სამსახურისა და სტუდენტთა სამეცნიერო ცენტრის ერთობლივი პროექტის „მოგზაურობა საქართველოს ისტორიულ რუკაზე“ ფარგლებში, ზენდიდის ციხის ნანგრევებთან ციალა ბეჟანიძის წიგნის „ზენდიდის ციხე“ წარდგინება ჩატარდა. წიგნი ბეჟანიძეთა გვარსა და მათ საგვარეულო ციხეს ეძღვნება. ისტორიულ წყაროებსა და დოკუმენტებზე დაყრდნობით ნაშრომში აღწერილია გვარის ისტორია, ეტიმოლოგია და აჭარის ერისთავ-ერისთავი აბუსერიძეების საგვარეულო.