ახალი ამბები

საქართველოს განათლებისა და მეცნიერების მინისტრმა თამარ სანიკიძემ, ათასწლეულის გამოწვევის ფონდის აღმასრულებელმა დირექტორმა მაგდა მაღრაძემ, აჭარის განათლების, კულტურისა და სპორტის მინისტრმა გიორგი თავამაიშვილმა და აშშ-ის სან დიეგოს სახელმწიფო უნივერსიტეტის (SDSU) საქართველოს დეკანმა კენ უოლშმა ბათუმის შოთა რუსთაველის სახელმწიფო უნივერსიტეტში პროექტ „სან დიეგოს სახელმწიფო უნივერსიტეტი და საქართველო 2020“ წარდგინება გამართეს. 30-მილიონიან პროექტს 2014 წლიდან ათასწლეულს გამოწვევის ფონდი საქართველოსა და ამერიკის ათასწლეულის გამოწვევის კორპორაციის (MCC) ფარგლებში ახორციელებს და მიზნად ისახავს ამერიკული საბაკალავრო პროგრამების ამოქმედებას. სან დიეგოს სახელმწიფო უნივერსიტეტი 2015-2016 სასწავლო წლიდან მსურველებს საგანმანათლებლო პროგრამებს სთავაზობს ქიმიის, ბიოლოგიის, ელექტრონული ინჟინერიის, კომპიუტერული ინჟინერიის, ხოლო მომავალი სასწავლო წლიდან კომპიუტერული მეცნიერების, სამრეწველო და სამოქალაქო მშენებლობის მიმართულებით.

ბათუმის შოთა რუსთაველის სახელმწიფო უნივერიტეტისა და ორგანიზაციის „შეზღუდული შესაძლებლობების მქონე პირთა უფლებებისათვის“ თანამშრომლობის ეგიდით უმაღლეს საგანმანათლებლო დაწესებულებაში საჯარო ლექცია ჩატარდა გენდერის მედიაცენტის მუშაობის პრიინციპებისა და ქალთა უფლერბრივი მდგომარეობის შესახებ. გენდერის მედიაცენტრის ხელმძვანელმა თამილა დოლიძე მახოს, ერგეს, თხილნარისა და ახალსოფლის საჯარო სკოლების მოსწავლებს სამოქალაქო განათლებაზე, გენდერული თანასწორობის საკითხებსა და კვოტირების მექანიზმის ამოქმედებაზე ესაუბრა. ღონისძიება პროექტ "ლიდერთა თაობის" ფარგლებში "სასკოლო კლუბ მოსწავლები შშმ პირებისათვის" და ორგანიზაციის „შეზღუდული შესაძლებლობების მქონე პირთა უფლებებისათვის“ ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტის ფუტსალის ნაკრებმა სტუდენტურ უმაღლეს ლიგაში ასპარეზობა წარმატებით დაიწყო. ივანე ჯავახიშვილის სახელობის თბილისის სახელმწიფო უნივერსიტეტთან შეხვედრა ბსუ-ს გამარჯვებით, ანგარიშით 5:3 დასრულდა. პირველობამ სტარტი 23 მარტს აიღო და 29 მაისს დასრულდება. გამარჯვებული გუნდი ევროპის საუნივერსიტეტო ჩემპიონატის პირველობისათვის იბრძოლებს. შეჯიბრს საქართველოს საუნივერსიტეტო სპორტის ფედერაცია საქართველოს სპორტისა და ახალგაზრდობის საქმეთა სამინისტროს მხარდაჭერით ატარებს და მასში სხვადასხვა აკრედიტებული უნივერსიტეტის 12 გუნდი მონაწილეობს.

გაეროს განვითარების პროგრამის ENPARD Ajara წარმომადგენლებმა ბათუმის შოთა რუსთაველის სახელმწიფო უნივერსიტეტში საგრანტო პროექტის პრეზენტაცია გამართეს. პროგრამა ევროკავშირისა და აჭარის მთავრობის ფინანსური მხარდაჭერით ხორციელდება და აჭარაში სოფლის მეურნეობის ხელშეწყობას, მოგებაზე ორიენტირებული ფერმერებისგან ბიზნეს-ჯგუფების ჩამოყალიბებას, კოოპერატივებად რეგისტრაციასა და განვითარებას ითვალისწინებს. ENPARD Ajara სტუდენტებს საშუალებას აძლევს ჩაერთონ სოფლის მეურნეობის განვითარების პროცესებში კოოპერატივებისთვის საგრანტო ბიზნეს პროექტების შემუშავების კუთხით. პროექტისთვის გრანტის სახით 20 000 აშშ დოლარია გამოყოფილი.

ქალაქ ბათუმის მერი გიორგი ერმაკოვი უნივერსიტეტში ბსუ-ს ტექნოლოგიური ფაკულტეტის სტუდენტებს შეხვდა და ახალი მუნიციპალური პროგრამა ,,უმაღლესი განათლების ხელშეწყობა“ გააცნო. პროგრამა წარმატებული სტუდენტებისთვის ლუკა ასათიანის სახელობის სტიპენდიის გაცემას ითვალისწინებს. 150 და 200-ლარიანი სტიპენდია 2014 წელს ჩარიცხული უმაღლესი აკადემიური განათლების პირველი და მეორე საფეხურის საგანამანათლებლო პროგრამების იმ სტუდენტებზე გაიცემა, რომლებიც რეგისტრირებულნი არიან ქ. ბათუმის მუნიციპალიტეტის ტერიტორიაზე. კონკურსში მონაწილეობა შეუძლიათ მშენებლობისა და არქიტექტურის მიმართულების სტუდენტებს, რომელთაც მიღებული აქვთ დადებითი შეფასება არანაკლებ 81-90 ქულა. პროგრამის ფარგლებში 30 სტუდენტი დაფინასდება.