ახალი ამბები

ბათუმის შოთა რუსთაველის სახელმწიფო უნივერსიტეტში აბიტურიენტებისათვის ღია კარის დღე და კონცერტი გაიმართა. უმაღლესი საგანმანათლებლო დაწესებულების რექტორის მოადგილემ ირაკლი ბარამიძემ და სტუდენტებმა: ქრისტინე თოფურიამ და გიგა ფარტენაძემ ახალგაზრდებს უნივერსიტეტის 80-წლიანი ისტორია, საგანმანათლებლო პროგრამები, სტიპენდიები, სოციალური პროგრამები, გაცვლითი პროგრამები და სიახლეები გააცნეს. 2015-2016 სასწავლო წელს ბსუ-ში 1380 პირველკურსელი ჩაირიცხება. 40-მდე საბაკალავრო საგანმანათლებლო პროგრამიდან 10 სრული სახელმწიფო დაფინანსებით განხორციელდება. წარდგინების დასასრულს მომავალ სტუდენტებს უნივერსიტეტის საინფორმაციო ბუკლეტებთან ერთად, სამახსოვრო საჩუქრები დაურიგდათ. ღია კარის დღის ფარგლებში უნივერსიტეტისა და სკოლების თანამშრომლობის ეგიდით გამართული ფუტსალის აჭარის რეგიონული სასკოლო ჩემპიონატის მონაწილე 38 გუნდს სერტიფიკატები გადაეცათ.

უნივერსიტეტის რექტორობის 7 კანდიდატი 55-ე აუდიტორიაში სტუდენტებთან ერთად პროფესორ-მასწავლებლებს შეხვდა და სამოქმედო გეგმა გააცნო. ღონისძიება დიალოგის რეჟიმში წარიმართა, რექტორობის კანდიდატებმა: რამაზ ხალვაშმა, ირაკლი ბარამიძემ, მალხაზ ნაკაშიძემ, მანუჩარ ლორიამ, ბესიკ ბერიძემ, მარინა გიორგაძემ და როსტომ ბერიძემ აუდიტორიის შეკითხვებს უპასუხეს. დისკუსია „თავისუფალ ჟურნალისტთა სახლის“ პროექტის - „ახალგაზრდებში დემოკრატიული იდეების პოპულარიზაცია“ ფარგლებში გაიმართა. ბათუმის შოთა რუსთაველის სახელმწიფო უნივერსიტეტის რექტორის არჩევნებში მონაწილეობის მისაღებად რეგისტრაცია 8 კანდიდატმა გაიარა.

ძვირფასო ქალბატონებო, ბათუმის შოთა რუსთაველის სახელმწიფო უნივერსიტეტი გილოცავთ 3 მარტს - დედის დღესა და 8 მარტს - ქალთა საერთაშორისო დღეს. გისურვებთ ჯანმრთელობას, ბედნიერებას, სიკეთეს და წარმატებებს პედაგოგიურ, სამეცნიერო და შემოქმედებით საქმიანობაში.

ბათუმის ხელოვნების ცენტრში ბათუმის შოთა რუსთაველის სახელმწიფო უნივერსიტეტის ორგანიზებითა და მეუფე დიმიტრის ლოცვა-კურთხევით საქველმოქმედო კონცერტი გაიმართა სახელწოდებით „ეს გზა ტაძართან მიგვიყვანს“. ღონისძიებიდან შემოსული თანხა რურუას ქუჩაზე მიმდინარე ეფრემ ასურის სახელობის ტაძრის მშენებლობას მოხმარდება. კონცერტში უმაღლესი საგანმანათლებლო დაწესებულების გოგონათა ფოლკლორული ანსამბლი, შემოქმედებითი ჯგუფები, მუსიკოსი ვაჟა ტუღუში, ანსამბლები „ბათუმი“ და „ფერისცვალება“, კვარტეტი „ნოტა“, ზაზა ზოიძე, ბათუმის მერიასთან არსებული ქორეოგრაფიული და მოსწავლე-ახალგაზრდობის სასახლესთან არსებული ვაჟთა ფოლკლორული ანსამბლები მონაწილეობდნენ. უნივერსიტეტის სტუდენტებისა და პროფესორ-მასწავლებლების მხარდაჭერით სამლოცველო რურუას ქუჩაზე მეოთხე წელია შენდება.

აჭარის ავტონომიური რესპუბლიკის განათლების, კულტურისა და სპორტის სამინისტროს „უმაღლესი განათლების ხელშეწყობის“ ქვეპროგრამის პრეზენტაცია გაიმართა ბათუმის შოთა რუსთაველის სახელმწიფო უნივერსიტეტში. მინისტრის მოადგილემ სულიკო თებიძემ განათლების დეპარტამენტის წარმომადგენლებთან ერთად, სტუდენტებსა და პროფესორ-მასწავლებლებს პროგრამის პრიორიტეტები და მასში მონაწილეობის მიღების წესები გააცნეს. პროექტი ითვალისწინებს საზღვარგარეთ სწავლას, სამეცნიერო ღონისძიებებში მონაწილეობას, კვალიფიკაციის ამაღლებას, კონფერენციის ჩატარებას, საზაფხულო სკოლისა და საჯარო ლექციების მოწყობას.