ახალი ამბები

ქირურგთა სამეცნიერო კონფერენცია გაიმართა შოთა რუსთველის დარბაზში. ერთდღიან სამეცნიერო სესიაზე ქირურგებმა დარგის აქტუალურ საკითხებზე იმსჯელეს და ბოლო პერიოდში წარმოებული კვლევა-ძიების შედეგები შეაჯამეს. სხვადასხვა წამყვანი კლინიკებისა და საავადმყოფოების ექიმებმა მოხსენებები წარმოადგინეს ისეთ მნიშვნელოვან თემებზე, როგორიცაა: „საქართველოში ღვიძლის პირველი ტრანსპლანტაციის გამოცდილება“, „ღვიძლის ჰემაგიომების ქირურგიული მკურნალობის გამოცდილება“, „პანკრეატო - დუედონალური რეზექციები და მისი ვარიანტები“ და „ღვიძლის ქირურგიული ანატომია“. სამეცნიერო კონფერენცია ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტისა და საქართველოს აკადემიკოს გრიგოლ მუხაძის სახელობის ქირურგთა სამეცნიერო საზოგადოების ორგანიზებით ჩატარდა.

„Erasmus+“-ის ეროვნული სააგენტოს საქართველოს ოფისის ხელმძღვანელმა ლიკა ღლონტმა ბათუმის შოთა რუსთაველის სახელმწიფო უნივერსიტეტში საინფორმაციო შეხვედრა გამართა და ახალი საკონკურსო პროგრამები წარმოადგინა. ტემპუსის, ერაზმუს მუნდუსისა და ჟან მონეს პროგრამები 2015 წლიდან ახლად შექმნილი გაერთიანებული პროგრამის Erasmus+ის ეგიდით ხორციელდება. ბსუ-ს სხვადასხვა საფეხურის სტუდენტებსა და პროფესორ-მასწავლებლებს შეუძლიათ მონაწილეობა მიიღონ Degree Mobility-ს,Credit Mobility-სა და Capacity Building for Higher Education-ის გაცვლით პროგრამებში.

ბათუმის შოთა რუსთაველის სახელმწიფო უნივერსიტეტმა საქართველოს საუნივერსიტეტო სპორტის ფედერაციის „საუნივერსიტეტო თასი - 2015“ -ის ტურნირის პირველი ეტაპი წარმატებულად დაიწყო. უმაღლესი საგანმანათლებლო დაწესებულების ფუტსალის ნაკრებმა წმიდა ანდრია პირველწოდებულის ქართული უნივერსიტეტის ნაკრები დაამარცხა ანგარიშით 9:3 და შემდეგ ეტაპზე გადავიდა. საუნივერსიტეტო თასის მოსაპოვებლად ქვეყნის სხვადასხვა უნივერსიტეტის 28 გუნდი იბრძვის. პირველობამ სტარტი 27 ოქტომბერს აიღო და 18 დეკემბერს დასრულდება. გამარჯვებული გუნდები და საუკეთესო მოთამაშეები თასით, მედლებით, სიგელებითა და ფასიანი საჩუქრებით დაჯილდოვდებიან. შეჯიბრს საქართველოს საუნივერსიტეტო სპორტის ფედერაცია საქართველოს სპორტისა და ახალგაზრდობის სამინისტროსა და კომპანია „მაგთის“ მხარდაჭერით ატარებს.

შოთა რუსთაველის დარბაზში ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა და ბათუმის სპორტულ-ახალგაზრდული ცენტრის დირექტორმა ირაკლი ბერიძემ თანამშრომლობის მემორანდუმს მოაწერეს ხელი. ხელშეკრულების მიზანია სპორტის, კულტურის განვითარებისა და ჯანსაღი თაობის აღზრდის ხელშეწყობა. მემორანდუმის ფარგლებში ჩატარდება სპორტულ-კულტურული ღონისძიებები და განხორციელდება ერთობლივი პროექტები. სტუდენტები მონაწილეობას მიიღებენ საქალაქო, საერთაშორისო და ეროვნულ შეჯიბრებებში. მხარეებს შესაძლებლობა ექნებათ ისარგებლონ შესაბამისი ინფრასტრუქტურითა და მატერიალურ-ტექნიკური ბაზით. მემორანდუმის გაფორმების შემდეგ, ბათუმის მერიის სპორტისა და ახალგაზრდობის განყოფილების უფროსმა ია შალამბერიძემ სტუდენტებს მერიის 2016 წლის ახალგაზრდული პროექტები წარუდგინა.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტები ბათუმის საქალაქო სასამართლოს ეწვივნენ. მომავალ სამართალმცოდნეებს ბათუმის საქალაქო სასამართლოს თავმჯდომარემ დავით მამისეიშვილმა სასამართლოს მუშაობის ატმოსფერო, სასამართლო სხდომის მიმდინარეობის პროცესი, სასამართლოს ცალკეული სტრუქტურების ფუნქციონირების სპეციფიკა და აქტუალური საკითხები გააცნო. შეხვედრის დასასრულს, სამართალმცოდნეობის სპეციალობის სტუდენტები სასამართლო პროცესს დაესწრნენ. ღონისძიება მიზნად ისახავდა ახალგაზრდებში საფუძვლიანი განათლების მიღების მოტივაციის ამაღლებასა და პროფესიული უნარ-ჩვევების ჩამოყალიბებას.