ახალი ამბები

საგრანტო პროექტის „გარემოს რადიო სპექტრალური დიაგნოსტიკა სიგნალისა და გარემოს დისპერსიულ მახასიათებლებს შორის კორელაციური ურთიერთკავშირის’’ დასკვნითი სამეცნიერო ანგარიში გაიმართა ბათუმის შოთა რუსთაველის სახელმწიფო უნივერსიტეტში. დასკვნით ანგარიშზე წარმოდგენილი იქნა სამეცნიერო პროექტის ფარგლებში შესრულებული სამუშაოები და შედეგები. პროექტი 3 წლის განმავლობაში მიმდინარეობდა და მასში 10 მეცნიერ-თანამშრომელი მონაწილეობდა. აღსანიშნავია, რომ პროექტის ფარგლებში შესრულებული სამეცნიერო ნაშრომები დაიბეჭდა ინგლისურენოვან სამეცნიერო ჟურნალებში, შეძენილი მატერიალურ-ტექნიკური ბაზა კი გამოყენებული იქნება ფიზიკა-მათემატიკისა და კომპიუტერულ მეცნიერებათა ფაკულტეტზე სასწავლო პროცესში. აგრეთვე, ფიზიკის დოქტორმა მირანდა ხაჯიშვილმა სადოქტორო დისერტაცია პროექტის ფარგლებში დაიცვა.

ბათუმის შოთა რუსთაველის სახელმწიფო უნივერსიტეტის ინოვაციურ ლაბორატორია FAB LAB BSU- ში ტექნოლოგიური ფაკულტეტის სტუდენტთა ნამუშევრების გამოფენა-პრეზენტაცია მოეწყო. სტუდენტებმა თანამედროვე ციფრული ტექნიკით, 3 D პრინტერსა და ლაზერულ მჭრელებზე დამზადებული ნამუშევრები ფართო საზოგადოებას წარუდგინეს. აქვე მოეწყობა სამუშაო პროცესის პრეზენტაცია. მომავლის სამრეწველო ინოვაციების ლაბორატორია (FAB LAB) თანამედროვე ციფრული და კომპიუტერული ტექნიკით აღჭურვილი ლაბორატორიაა უახლესი დაზგა-დანადგარებით (3D პრინტერებით, 3D სკანერებით, ლაზერული მჭრელებით, პროგრამირებადი ჩარხებით და სხვა დანადგარებით), რაც სტუდენტებსა და ნებისმიერ დაინტერესებულ პირს საკუთარი იდეისა და პროექტის განხორციელების საშუალებას აძლევს.

დღეს, არასამთავრობო ორგანიზაცია ‘’შშმ პირთა უფლებებისათვის’’ და ბათუმის შოთა რუსთაველის სახელმწიფო უნივერსიტეტს შორის ურთიერთანამშრომლობის მემორანდუმი გაფორმდა. მემორანდუმი უნივერსიტეტსა და არასამთავრობო ორგანიზაციას შორის თანამშრომლობის კიდევ უფრო გაღრმავებას , სტუდენტების მეტ ჩართულობას სხვადასხვა პროექტებში და პრაქტიკას ითვალისწინებს. აგრეთვე, მემორანდუმის ფარგლებში, უნივერსიტეტი ვალდებულებას იღებს გაითვალისწინოს ის რეკომენდაციები, რომელსაც არასამთავრობო ორგანიზაცია წარმოადგენს შშმ პირებისათვის ადაპტირებული გარემოს შესაქმნელად.

საქართველოს საუნივერსიტეტო სპორტის ფედერაციის „საუნივერსიტეტო თასი - 2016“-ის ტურნირის მორიგი მატჩი ბათუმის შოთა რუსთაველის სახელმწიფო უნივერსიტეტის გამარჯვებით დასრულდა. უმაღლესი საგანმანათლებლო დაწესებულების ფუტსალის ნაკრებმა საქართველოს უნივერსიტეტის გუნდი დაამარცხა ანგარშით 4:3.თამაშს უნივერსიტეტის ადმინისტრაციის წარმომადგენლები ესწრებოდნენ. ბსუ-ს სტუდენტები „საუნივერსიტეტო თასი - 2016“-ის მოსაპოვებლად მეხუთე ტურს საქართველოს მოქმედ ჩემპიონთან, საქართველოს ეროვნულ უნივერსიტეტის ნაკრებთან (სეუ) 17 აპრილს, ბსუ-ს სპორტულ დარბაზში გამართავენ.

კვლევითი პროგრამის ‘’კარნეგის’’ პრეზენტაცია გაიმართა ბათუმის შოთა რუსთაველის სახელმწიფო უნივერსიტეტში. ევრაზიისა და აღმოსავლეთ ევროპის ეროვნული საბჭოს წარმომადგენელმა, ალექსეი ხარლამოვმა კვლევითი პროგრამის პირობები და წესები წარმოადგინა. ‘’კარნეგის’’ სასტიპენდიო პროგრამა 2016-2017 სასწავლო წლისათვის ამერიკის შეერთებულ შტატებში კვლევას ითვალისწინებს. პროგრამა განკუთვნილია ჰუმანიტარულ და სოციალურ სფეროში მოღვაწე მეცნიერებისათვის. პროგრამაში მონაწილეობის მიღების უფლება აქვთ საქართველოს, აზერბაიჯანის, სომხეთის, ბელორუსიის, უკრაინისა და მოლდოვეთის მოქალაქეებს. სასტიპენდიო პროგრამაში საბუთების შეტანის ბოლო ვადაა 30 აპრილი.