ბათუმის შოთა რუსთაველის სახელმწიფო უნივერსიტეტში ტემპუსის პროექტის -„უნივერსიტეტისმართვის ინტეგრირებული სისტემა: ევროგაერთიანების გამოცდილების გაზიარება“ ფარგლებში „მართვის თანამედროვე მეთოდების პროგრამული უზრუნველყოფის ცენტრი“ გაიხსნა. ცენტრში კომპიუტერულ მეცნიერებათა დეპარტამენტის პროფესორ-მასწავლებლები მეთოდურ დახმარებას გაუწევენ უნივერსიტეტის პერსონალს მართვის ინტეგრირებული სისტემების ეფექტურ დანერგვაში, დისტანციური სწავლებისთვის მოდულების დიზაინის შემუშავებასა და გამოყენებაში. ღონისძიების ფარგლებში უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა სხვადასხვა ქვეყნის უმაღლესი საგანმანათლებლო დაწესებულებისა და განათლების სამინისტროების 18-მდე წარმომადგენელს უმასპინძლა და პროექტის კოორდინატორებთან, კობლენც ლანდაუს უნივერსიტეტის (გერმანია) პროფესორ სერგეი ჩერნიშენკოსთან, ბსუ-ს ასოცირებულ პროფესორ ლელა თურმანიძესთან ერთად საკონსკულტაციო ცენტრი გახსნა.

შოთა რუსთაველის ეროვნული სამეცნიერო ფონდის 2014 წლის „ფუნდამენტალური კვლევებისათვის სახელმწიფო სამეცნიერო გრანტების კონკურსში“ ბათუმის შოთა რუსთაველის სახელმწიფო უნივერსიტერტის ფიზიკა-მათემატიკისა და კომპიუტერულ მეცნიერებათა ფაკულტეტის ორმა პროექტმა გაიმარჯვა. პროექტი „ტოპოლოგიურ სივრცეთა და უწყვეტ ასახვათა (კო)ჰომოლოგიური ფუნქტორები და განზომილების ტიპის ფუნქციები და მათი გამოყენებანი“ (FR/233/5-103/14) პროფესორ ვლადიმერ ბალაძის ხელმძღვანელობით განხორციელდება. პროექტს „ოპტიკურად მკვრივი, შემთხვევითი ფაზური ეკრანის ფლუორესცენციული მახასიათებლების რაოდენობრივი და გაბნეული ლაზერული გამოსხივების ინტენსივობის კორელაციური ფუნქციის სტატისტიკური მომენტების სპექტრალური ანალიზი“ (FR/152/9-240/14) პროფესორი ნუგზარ ღომიძე უხელმძღვანელებს.

ბათუმის შოთა რუსთაველის სახელმწიფო უნივერსიტეტში ფიზიკის მეცნიერებათა დოქტორ ჟუჟუნა დიასამიძის 70 წლისადმი მიძღვნილი საიუბილეო სხდომა გაიმართა. ღვაწლმოსილ პედაგოგსა და მეცნიერს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორის მოვალეობის შემსრულებელმა მერაბ ხალვაშმა, კოლეგებმა, საზოგადოების წარმომადგენლებმა, და მეგობრებმა. ქალბატონი ჟუჟუნა დიასამიძე ავტორია 80-მდე ნაშრომისა და მონოგრაფიის.

შოთა რუსთაველის ეროვნული სამეცნიერო ფონდის მიერ დაფინანსებული სამეცნიერო საგრანტო პროექტის „გარემოს რადიო სპექტრალური დიაგნოსტიკა სიგნალისა და გარემოს დისპერსიულ მახასიათებლებს შორის კორელაციური ურთიერთკავშირის საფუძველზე“ (#31/33 მეცნიერ-ხელმძღვანელი ასოცირებული პროფესორი იზოლდა ჯაბნიძე) ფარგლებში გარემოს დაცვისა და ბუნებრივი რესურსების სამინისტროს კატარღით გეგმიური გასვლაში ფიზიკის სპეციალობის სტუდენტებმაც მიიღეს მონაწილეობა. სამინისტროს მეცნიერ-თანამშრომელმა მზია მუშკუდიანმა სტუდენტებს ჩაუტარა ერთსაათიანი პრაქტიკული ლექცია შავი ზღვის სანაპირო ზოლის ეკოლოგიური მდგომარეობის საკითხზე. მათ ასევე გააცნო სანაპირო ზოლიდან სინჯების აღების, მისი დამუშავებისა და ლაბორატორიული დიაგნოსტიკის წესები.

ტემპუსის MathGeAr - 543868-TEMPUS-1-2013-1-DE-TEMPUS-JPCR პროექტის ფარგლებში ბათუმის შოთა რუსთაველის სახელმწიფო უნივერსიტეტში საინფორმაციო შეხვედრა ჩატარდა ფიზიკა-მათემატიკისა და კომპიუტერულ მეცნიერებათა ფაკულტეტის აკადემიურ, ადმინისტრაციულ პერსონლათან და სტუდენტებთან. პროექტის ლოკალურმა კოორდინატორმა პროფესორმა ვლადიმერ ბალაძემ მსმენელებს პროექტის შინაარსი და მიზნები გააცნო. ასევე გერმანიის, საფრანგეთის და ფინეთის უნივერსიტეტების გამოცდილებაზე დაყრდნობით ისაუბრა საგანმანათლებლო პროგრამებში და სილაბუსებში თანამედროვე ტექნოლოგიების გამოყენების აუცილებლობაზე, რაც ხელს შეუწყობს თანამედროვე მოთხოვნების შესატყვისი კომპეტენციის მქონე მაღალკვალიფიციური და კონკურენტუნარიანი სპეციალისტის მომზადებას. მოწვეული სტუმრების წინაშე მოხსენებებით წარსდგნენ პროექტის წევრები ასოც. პროფესორები: ლ.. თურმანიძე, დ. მახარაძე, ა. ბერიძე.