„დედამიწის საათის“ საერთაშორისო აქციის ეგიდით, ბათუმის შოთა რუსთაველის სახელმწიფო უნივერსიტეტის ბიოლოგიის დეპარტამენტმა და აჭარის გარემოს დაცვისა და ბუნებრივი რესურსების სამმართველომ საინფორმაციო შეხვედრა ჩაატარეს. ღონისძიება მიზნად ისახავდა საზოგადოებაში პასუხისმგებლობის ცნობიერების ამაღლებას კლიმატის გლობალური ცვლილების გამომწვევ მიზეზებზე. ბიოლოგიის სპეციალობის სტუდენტებმა შეხვედრაზე კლიმატის ცვლილებების აქტუალურ საკითხებზე მოხსენებები წარმოადგინეს, კინოჩვენება მოაწყეს და დისკუსია გამართეს. საერთაშორისო აქციის ფარგლებში სასტუმრო ,,შერატონ ბათუმმა“ აჭარის გარემოს დაცვისა და ბუნებრივი რესურსების სამმართველოსთან ერთად სტუდენტებსა და მოსწავლე-ახალგაზრდობის სასახლის აღსაზრდელებს უმასპინძლა. „დედამიწის საათის“ მეცხრე რაუნდი მსოფლიოში - 2015 წლის 28 მარტს, ადგილობრივი დროით საღამოს 20:30-21:30-მდე აღინიშნა. 20:30 საათზე გამოირთო ქალაქის არასასიცოცხლო ობიექტები, გარე განათებები და ,,შერატონ ბათუმის“ ფოიეში სანთლის შუქზე ტორტი გაიჭრა.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის ეკოლოგიისა და ტექნოლოგიური ფაკულტეტის სატყეო საქმის სპეციალობის სტუდენტები პროფესორ–მასწავლებლებთან ერთად აჭარის ა.რ. გარემოს დაცვისა და ბუნებრივი რესურსების სამმართველოსა და სსიპ სატყეო სააგენტოს მიერ ორგანიზებულ გამწვანების აქციაში მონაწილეობდნენ. ხელვაჩაურის რაიონის სოფელ აგარის სატყეოს ფართობზე, გამეჩხრებული ტყის ტერიტორიის შესავსებ–აღსადგენად 300–მდე კაკლის ხე დაირგო. აქცია ტყის მნიშვნელობაზე საზოგადოების ცნობიერების ამაღლებას ითვალისწინებდა. 21 მარტი ტყის (ტყის დაცვის) საერთაშორისო დღე გაეროს გენერალურმა ასამბლეამ აღიარა და 1971 წლიდან აღინიშნება.

ტყის დაცვის საერთაშორისო დღე ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ბიოლოგიის სპეციალობის I კურსის სტუდენტებმა სემინარით აღნიშნეს. ბათუმის ბოტანიკურ ბაღში ფლორისა და კონსერვაციის განყოფილების მთავარმა სპეციალისტმა დავით ხარაზიშვილმა ტრენინგი ჩაატარა თემაზე: ,,აჭარის ტყის ეკოსისტემები". ახალგაზრდები გაეცნენ ტყის ეკოსისტემის მრავალფეროვნებას, იშვიათ და ქრობად სახეობებს, კონსერვაციულ ღონისძიებებს და პრობლემებს. სემინარის დასრულების შემდეგ ახალგაზრდებმა ამიერკავკასიის ტენიანი სუბტროპიკების ფიტოგეოგრაფიული განყოფილება დაათვალიერეს.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის აკრედიტებული სამაგისტრო საგანმანათლებლო პროგრამის „საზოგადოებრივი ჯანდაცვა“ პრეზენტაცია გაიმართა. პროგრამის ხელმძღვანელმა ასოცირებულმა პროფესორმა სალომე ღლონტმა აკადემიურ პერსონალთან და მოწვეულ პედაგოგებთან ერთად, სტუდენტებსა და მედიცინის სხვადასხვა დარგის სპეციალისტებს „საზოგადოებრივი ჯანდაცვის“ მიზნები და ამოცანები გააცნო. სამაგისტრო პროგრამის კურსდამთავრებულს შესაძლებლობა ექნება დასაქმდეს ჯანდაცვის სფეროს სხვადასხვა სტრუქტურაში, შრომის, ჯანმრთელობისა და სოციალური დაცვის სამინისტროში, სამედიცინო დაწესებულებებში, საზოგადოებრივი ჯანმრთელობის ეროვნულ ცენტრში, დაავადებათა კონტროლისა და საზოგადოებრივი ჯანდაცვის ეროვნული ცენტრში, კორპორაციულ, არასამთავრობო და საერთაშორისო ორგანიზაციებში.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ბიოლოგიის II კურსის სტუდენტებმა კურატორი ლალი ჟღენტის ხელმძღვანელობით ბათუმის წმინდა მოწამე ეკატერინეს სახელობის სათნოების სახლში მოაწყვეს საქველმოქმედო აქცია დევიზით - ”ჩვენც დავბერდებით”. ახალგაზრდებმა სათნოების სახლში მცხოვრებ ქალბატონებს ქალთა საერთაშორისო დღე - 8 მარტი მიულოცეს და ტკბილეულთან ერთად ყვავილები მიართვეს.