“პანდემიას ასრულებ შენ!“ – ამ დევიზით ვაქცინაციის წამახალისებელ ექვსთვიან საინფორმაციო კამპანიაში ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის მედიცინის მიმართულების სტუდენტები ერთვებიან. კამპანია გაეროს ბავშვთა ფონდისა და იმუნიზაციისა და ვაქცინოლოგიის ასოციაციის (AIVA) მიერ USAID-ის მხარდაჭერით მიმდინარეობს და Covid 19-ის შესახებ საზოგადოების ინფორმირებას ისახავს მიზნად.
საინფორმაციო კამპანიის ფარგლებში,ბათუმის შოთა რუსთაველის სახელმწიფო უნივერსიტეტში თანამშრომლობის მემორანდუმი გაფორმდა, რომელსაც ხელი ბსუ-ს რექტორმა მერაბ ხალვაშმა, გაეროს ბავშვთა ფონდის წარმომადგენელმა საქართველოში (UNICEF) ღასან ხალილიმ და იმუნიზაციისა და ვაქცინოლოგიის ასოციაციის (AIVA) წარმომადგენელმა მარიამ ჯაშმა მოაწერეს.

აჭარის ა.რ. სოფლის მეურნეობის მინისტრი გიორგი სურმანიძე ბსუ-ს ტექნოლოგიური ფაკულტეტის აგრარული მიმართულების და საბუნებისმეტყველო მეცნიერებათა და ჯანდაცვის ფაკულტეტების სტუდენტებს შეხვდა და პროგრამის „აგროსექტორის მდგრადი განვითარების“ ქვეპროგრამა „საგანმანათლებლო და სამეცნიერო პრაქტიკის დანერგვა“ წარუდგინა. ღონისძიების ფარგლებში, ასევე გაიმართა სამინისტროს აგროსერვის ცენტრსა და გარემოს დაცვისა და ბუნებრივი რესურსების სამმართველოში ანაზღაურებადი, ექვსთვიანი სტაჟირების პროგრამის მონაწილე სტუდენტების შემაჯამებელი პრეზენტაცია. სოფლის მეურნეობის მინისტრმა გიორგი სურმანიძემ და ბსუ-ს რექტორმა, პროფესორმა მერაბ ხალვაშმა ახალგაზრდებს მადლობა გადაუხადეს სტაჟირების პროგრამაში წარმატებული მონაწილეობისთვის და წარმატებები უსურვეს.

ბათუმის შოთა რუსთაველის სახელმწიფო უნივერსიტეტმა სამედიცინო სკოლების მსოფლიო დირექტორატის აღიარება - „Sponsor Notes“ მიიღო. უმნიშვნელოვანესი სიახლე ბსუ-ს სამედიცინო მიმართულების პროგრამების კურსდამთავრებულებს შესაძლებლობას აძლევს დარეგისტრირდნენ USMLE-ის გამოცდებზე, რომლის წარმატებით ჩაბარების შემდეგ, ამერიკის შეერთებული შტატების კლინიკებში დასაქმების უფლებას მოიპოვებენ, რაც ხელს შეუწყობს მათი მსოფლიო დონის სპეციალისტად ჩამოყალიბებას. ვულოცავთ ბსუ-ს კურსდამთავრებულებს სამედიცინო სკოლების მსოფლიო დირექტორატის აღიარებას და ვუსურვებთ პროფესიულ წინსვლას.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტი გიორგი ლორთქიფანიძე ევრაზიის ჩემპიონია ძალისმიერ სამჭიდში. ევრაზიის თასის გათამაშება სამჭიდში ქალაქ კიევში გაიმართა და მასში 5 ქვეყნის სპორტსმენები მონაწილეობდნენ. გიორგი ლორთქიფანიძე პირველი ადგილის მფლობელი გახდა 20-23 წლის ასაკში, 100 კგ. წონით კატეგორიაში. ბათუმის შოთა რუსთაველის სახელმწიფო უნივერსიტეტი გიორგი ლორთქიფანიძეს ულოცავს გამარჯვებას და უსურვებს წარმატებებს.

ევროკავშირის პროექტის „ლაბორატორიული ჯანმრთელობისა და უსაფრთხოების უწყვეტი განათლების კურსები ახალგაზრდა პროფესიონალებისთვის დასავლეთ და აღმოსავლეთ საქართველოში“ ეგიდით, ბსუ-ში პროექტის მონიტორინგის ჯგუფის სამუშაო შეხვედრა გაიმართა. ჯგუფის წევრებმა - ევროკავშირის, საქართველოს განათლებისა და მეცნიერების სამინისტროს, დასაქმების ეროვნული სააგენტოს და ახალგაზრდობის სააგენტოს წარმომადგენლებმა შეხვედრაზე პროგრამის მიმდინარეობა და განხორციელებული აქტივობები შეაფასეს. პროექტის ფარგლებში ბსუ-ში თანამედროვე აპარატურით აღჭურვილი ლაბორატორიული უსაფრთხოების სპეციალისტთა გადამზადების ცენტრი გაიხსნება.