ახალი ამბები

გარდაიცვალა ცნობილი მეცნიერი და საზოგადო მოღვაწე, ისტორიის მეცნიერებათა დოქტორი, პროფესორი მალხაზ სიორიძე. მალხაზ სიორიძე დაიბადა 1957 წლის 2 მაისს. უმაღლესი განათლება მიიღო ბათუმის პედაგოგიურ ინსტიტუტში ისტორიისა და ფრანგული ენის სპეციალობით. 1984-1986 წლებში სწავლობდა საქართველოს მეცნიერებათა აკადემიის ივანე ჯავახიშვილის სახელობის ისტორიის, არქეოლოგიისა და ეთნოგრაფიის ინსტიტუტის ასპირანტურაში. 1986 წელს მიენიჭა ისტორიის მეცნიერებათა კანდიდატის, ხოლო 2001 წელს - ისტორიის მეცნიერებათა დოქტორის ხარისხი. მისი სადოქტორო დისერტაციის თემა იყო „სამხრეთ–დასავლეთ საქართველო 1914–1918 წლებში (სოციალურ–ეკონომიკური და პოლიტიკური ვითარება)“.

II საერთაშორისო სამეცნიერო-პრაქტიკულმა კონფერენციამ „ტურიზმი: ეკონომიკა და ბიზნესი“ მაღალმთიანი აჭარის ტურისტული პოტენციალის პოპულარიზაციის მიზნით მუშაობა ქედის რაიონში განაგრძო. კონფერენციის მომხსენებლებმა ახალი ტურისტული პროდუქტის „ღვინის ტურის“ ფარგლებში ისტორიული ძეგლები დაათვალიერეს, საოჯახო მარნები მოინახულეს და ყურძნის სხვადასხვა უნიკალური ჯიშისგან დამზადებული ღვინოები დააგემოვნეს. სტუმრებს შესაძლებლობა მიეცათ ასევე გაცნობოდნენ ადილობრივ სამზარეულოსა და ხალხურ შემოქმედებას.

II საერთაშორისო სამეცნიერო-პრაქტიკული კონფერენციის „ტურიზმი: ეკონომიკა და ბიზნესის“ ფარგლებში ხელი მოეწერა თანამშრომლობის მემორანდუმს შოთა რუსთაველის სახელმწიფო უნივერსიტეტსა და ვილნიუსის სამართლისა და ბიზნესის საერთაშორისო სკოლას შორის. ხელშეკრულება ხელს შეუწყობს სტუდენეტთა და პროფესორ-მასწავლებლებლთა გაცვლითი პროგრამების განხორციელებას, აკადემიური პროგრამების შემუშავებას, ერთობლივი კონფერენციების, სემინარებისა და ვორქშოფების ჩატარებასა და ბიბლიოთეკის ონლაინრეჟიმში გამოყენებას.

შოთა რუსთაველის სახელმწიფო უნივერსიტეტის ტურიზმის ფაკულტეტისა და აჭარის ა.რ. ტურიზმისა და კურორტების დეპარტამენტის ორგანიზებით გაიმართა II საერთაშორისო სამეცნიერო-პრაქტიკული კონფერენცია „ტურიზმი: ეკონომიკა და ბიზნესი“. კონფერეცნიაზე საქართველოს, თურქეთის, უკრაინის, გერმანიის, ლიტვის, ნორვეგიის, ამერიკისა და აზერბაიჯანის წამყვანი უმაღლესი სასწავლებლების პროფესორ-მასწავლებლებმა, ექსპერტებმა და ტურიზმის ინდუსტრიის წარმომადგენლებმა 150 მოხსენება წარმოადგინეს. ორი დღის განმავლობაში მეცნიერები, დარგის სპეციალისტები და ბიზნესმენები ერთობლივად მუშაობდნენ ტურიზმის ინდუსტრიის განვითარების აქტუალურ საკითხებზე. კონფერენციის მონაწილეებმა რეკომენდაციები შეიმუშავეს, რომელიც შესაბამის სამსახურებს გადაეგზავნება.

საქართველოს დამოუკიდებლობის აღდგენის 20 წელს მიეძღვნა შოთა რუსთაველის სახელმწიფო უნივერსიტეტისა და თბილისის ივანე ჯავახიშვილის სახელობის სახელმწიფო უნივერსიტეტის ერთობლივი კონფერენცია: ”საქართველო - დამოუკიდებლობის აღდგენის 20 წელი: მიღწევები, პრობლემები, პერსპექტივები”. კონფერენციაზე პროფესორ-მასწავლებლებმა და სტუდენტებმა ისეთი მნიშვნელოვანი საკითხები განიხილეს, როგორიცაა ქვეყნის დემოკრატიული განვითარება, სამოქალაქო საზოგადოების მშენებლობა და მოდერნიზაცია, დემოკრატიული ინსტიტუტების დამკვიდრება, საერთაშორისო ავტორიტეტის ამაღლება, მსოფლიო თანამეგობრობაში ინტეგრაცია, თანამედროვე განათლების ასპექტები და ეროვნული ფასეულობები. კონფერენციამ მუშაობა მრგვალ მაგიდასთან დაასრულა.