ახალი ამბები

საქართველოს სახელმწიფოებრივი დამოუკიდებლობის აღდგენის დღისადმი მიძღვნილი კონფერენცია ჩატარდა ბათუმის შოთა რუსთაველის სახელმწიფო უნივერსიტეტში. სესია რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა გახსნა და ისტორიული დღის მნიშვნელობაზე ისაუბრა. ჰუმანიტარულ მეცნიერებათა ფაკულტეტის დეკანმა პროფესორმა მარინა გიორგაძემ სესიის მონაწილეებს 1997 წელს ლევილში გადაღებული ფოტოები წარუდგინა, ხოლო პროფესორმა ოთარ გოგოლიშვილმა 1918-1921 წლების მოვლენების ამსახველი საარქივო ვიდეომასალა გააცნო. კონფერენციაზე ჰუმანიტარულ მეცნიერებათა ფაკულტეტის სტუდენტებმა მოხსენებები წაიკითხეს 1918-1921 წლებში განვითარებულ მოვლენებზე.

ბათუმის შოთა რუსთაველის სახელმწიფო უნივერსიტეტში ქართული კულტურული მემკვიდრეობის დაცვის თანამედროვე პრობლემებისადმი მიძღვნილი კონკურსის „ქვათა ღაღადის“ გამარჯვებულთა დაჯილდოება გაიმართა. კომპეტენტური ჟიურის გადაწყვეტილებით 50-მდე კონკურსანტს შორის საუკეთესოდ შემდეგი ხუთი ავტორი დასახელდა: მე-9 საჯარო სკოლის X კლასის მოსწავლე თამთა სურმანიძე, მე-10 საჯარო სკოლის X კლასის მოსწავლე მაკა ვაშაკიძე, მე-8 საჯარო სკოლის XI კლასის მოსწავლე მარიტა გორგილაძე, ფილოსოფიის სპეციალობის III კურსის სტუდენტი მედეა ართმელაძე და ისტორიის სპეციალობის II კურსის სტუდენტი თამაზ დავითაძე. გამარჯვებულებს აჭარის კულტურული მემკვიდრეობის დაცვის სააგენტოს დირექტორი მირანდა ჩარკვიანი შეხვდა, წარმოდგენილი ესეების პრობლემატიკას გაეცნო, სამომავლო თანამშრომლობაზე ისაუბრა და საჩუქრად წიგნები გადასცა. უნივერსიტეტის დაფინანსებით კონკურსის საუკეთესო ავტორები ერთდღიანი ისტორიულ-შემეცნებითი ტურით მცხეთაში გაემგზავრებიან. ესეების კონკურსი ბსუ-ს სტუდენტთა სამეცნიერო ცენტრის ორგანიზებით ჩატარდა.

,,სტუდენტური დღეები აჭარა 2015"-ის გამარჯვებული ნომინაციაში -,,მის სტუდენტი" ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის 1-ლი კურსის სტუდენტი ლოლიტა ცინცაძე გახდა, ხოლო ბსუ-ს ფუტსალის ნაკრებმა პირველობა სპორტულ აქტივობაში მოიპოვა. სტუდენტური დღეები აჭარის სპორტისა და ახალგაზრდობის საქმეთა დეპარტამენტის ორგანიზებით ჩატარდა და მასში ხუთი უმაღლესი საგანმანათლებლო დაწესებულება მონაწილეობდა. დასკვნითი ღონისძიება ბათუმის საზაფხულო თეატრში ჯგუფ ,,გამოუვალი მდგომარეობის“ კონცერტით დასრულდა.

შოთა რუსთაველის ეროვნული სამეცნიერო ფონდის 2014 წლის სამეცნიერო გრანტების და დოქტურანტურის საგანმანათლებლო პროგრამების კონკურსში გამარჯვებული პროექტების ხელმძღვანელებთან და დოქტორანტებთან შეხვედრა გაიმართა. ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა და რექტორის მოადგილემ, პროფესორმა ნათია წიკლაშვილმა კონკურსანტებს გამარჯვება მიულოცეს და წარმატებები უსურვეს. წელს საგრანტო კონკურსში გამარჯვება მოიპოვა ბსუ-ს პროფესორ-მასწავლებლების, მკვლევარებისა და დოქტორანტების ცხრა სამეცნიერო პროექტმა და სამმა სადოქტორო საგანმანათლებლო პროგრამამ.

ბილკენტის უნივერსიტეტის პროფესორმა, ბათუმის შოთა რუსთაველის სახელმწიფო უნივერსიტეტის საპატიო დოქტორმა დომენიკ კასაბ-თეზგორმა საჯარო ლექცია წაიკითხა თემაზე: „მუზეუმების ისტორია საუკუნეების მანძილზე“. მომხსენებელმა სტუდენტებსა და პროფესორ-მასწავლებლებს მუზეუმისა და მუზეოლოგიის კონცეფცია გააცნო. ისაუბრა მესოპოტამიაში პირველი მუზეუმის შექმნის, პირველი საზოგადოებრივი ვატიკანისა და რენესანსის პერიოდის კაპიტოლიუმის, XVI-XVII საუკუნეების საოცრებათა კაბინეტისა და განმანათლებლობის ხანის ენციკლოპედიის მუზეუმების ისტორიაზე. ცნობილმა მეცნიერმა ყურადღება გაამახვილა ასევე პოსტმოდერნული მუზეუმებისათვის დამახასიათებელ მეწარმეობისა და მარკეტინგის იდეაზე. საჯარო ლექცია აჭარის ა.რ. განათლების, კულტურისა და სპორტის სამინისტროს ,,უმაღლესი განათლების ხელშეწყობა“ ქვეპროგრამების ფარგლებში ჩატარდა.