ახალი ამბები

ბათუმის შოთა რუსთაველის სახელმწიფო უნივერსიტეტში ადმინისტრაციის ხელმძღვანელის არჩევნები ჩატარდა. კენჭისყრაში მონაწილეობის მისაღებად საარჩევნო კომისიას რეგისტრაციისათვის ერთმა კანდიდატმა - ჯემალ ანანიძემ მიმართა. აკადემიური საბჭოს წევრებმა სრული შემადგენლობით (8 ხმით) კანცლერად ჯემალ ანანიძე აირჩიეს და წარმომადგენლობით საბჭოს წარუდგინეს დასამტკიცებლად. ფარული კენჭისყრით, სიითი შემადგენლობის უმრავლესობით მასვე დაუჭირეს მხარი წარმომადგენლობით საბჭოს წევრებმა. ადმინისტრაციის ხელმძღვანელის უფლებამოსილების ვადაა ოთხი წელი.

ბათუმის შოთა რუსთაველის სახელმწიფო უნივერსიტეტში ინგლისური ენის საზაფხულო სკოლა გაიხსნა. ღონისძიება აშშ-ს ელჩმა საქართველოში რიჩარდ ნორლანდმა, ბსუ-ს რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა, ჰუმანიტარულ მეცნიერებათა ფაკულტეტის დეკანმა, პროფესორმა მარინა გიორგაძემ, მშვიდობის კორპუსის დირექტორის მოადგილემ კარმენ შიენმა და მშვიდობის კორპუსის ინგლისური ენის მასწავლებელმა მარია ინისმა გახსნეს. ორკვირიანი საზაფხულო სკოლა ახალგაზრდებში ინგლისურ ენაზე თავისუფლად საუბრის უნარ-ჩვევების გამომუშავებასა და ამერიკის კულტურის შესახებ ცოდნის შეძენას ითვალისწინებს. მასში პირველ ეტაპზე ბათუმის კერძო და საჯარო სკოლების IX, X, XI კლასების 130 წარმატებული მოსწავლე მიიღებს მონაწილეობას, ხოლო მეორე ეტაპზე - ბსუ-ს ინგლისური ფილოლოგიის 100-მდე სტუდენტი.

ბათუმის შოთა რუსთაველის სახელმწიფო უნივერსიტეტის 50 მოხალისე სტუდენტი თბილისში სტიქიით დაზარალებული მოსახლეობის დასახმარებლად და საყოფაცხოვრებო ნივთების გადასაცემად, აჭარის სპორტისა და ახალგაზრდობის საქმეთა დეპარტამენტის უფროსის მოვალეობის შემსრულებელ დავით მიქელაძესთან ერთად გაემგზავრა. ხუთი დღის განმავლობაში ბსუ-ს სტუდენტური თვითმმართველობის ორგანიზებით სტუდენტებმა პირველადი მოხმარების ნივთები, ტანსაცმელი, მედიკამენტები და პროდუქტები შეაგროვეს.

ბათუმის შოთა რუსთაველის სახელმწიფო უნივერსიტეტსა და საერთაშორისო სტუდენტურ ორგანიზაცია აისეკოსთან თანამშრომლობის ფარგლებში ამერიკის საერთაშორისო განვითარების სააგენტოს პროექტის „მმართველობა განვითარებისთვის“ (G4G) წარმომადგენლები სხვადასხვა სპეციალობის სტუდენტებს შეხვდნენ. G4G-ის ხელმძღვანელმა მაილო სტევანოვიჩმა ახალგაზრდებს პროექტის მიზნები, სტაჟირების პროგრამაში მონაწილეობის პირობები, პერსონალური ბრენდინგი და საკუთარი თავის კარგად წარმოჩენის შესაძლებლობები გააცნო. სასტუმრო ჰილტონის ხელმძღვანელმა სტიუარტ ნელსონმა შეხვედრაზე ბიზნესის მართვასა და წარმატებულ მენეჯმენტზე ისაუბრა, ხოლო პროექტის კომუნიკაციების მენეჯერმა მაიკ მართლმა სტუდენტებს რეზიუმეს, ინტერვიუზე სწორად წარდგენის ტექნიკასა და კარიერის დაგეგმვის წესებზე. პროექტი 4 წლის განმავლობაში გაგრძელდება და ხელს შეუწყობს სტუდენტების განვითარებასა და მათი შესაძლებლობების რეალიზებას.

ბათუმის შოთა რუსთაველის სახელმწიფო უნივერსიტეტში ნატოსა და ევროკავშირის შესახებ საინფორმაციო ცენტრის აჭარის განახლებული ბიურო გაიხსნა. ცერემონიას საქართველოს თავდაცვის მინისტრი თინა ხიდაშელი, საქართველოს საგარეო საქმეთა მინისტრი თამარ ბერუჩაშვილი, ევროპულ და ევროატლანტიკურ სტრუქტურების ინტეგრაციის საკითხებში სახელმწიფო მინისტრი დავით ბაქრაძე, ამერიკის ელჩი საქართველოში რიჩარდ ნორლანდი, უნივერსიტეტის რექტორის მოვალეობის შემსრულებელი, ასოცირებული პროფესორი მერაბ ხალვაში, ნატოსა და ევროკავშირის შესახებ საინფორმაციო ცენტრის დირექტორი ელენე გოცაძე და დიპლომატიური კორპუსის წარმომადგენლები ესწრებოდნენ. ბიუროს მიზანია აჭარის რეგიონში მცხოვრები მოსახლეობის ნატოსა და ევროკავშირის შესახებ ინფორმირება და მათი ევროპული და ევროატლანტიკური სტრუქტურების ინტეგრაციის პროცესში აქტიურად ჩართვა.