ახალი ამბები

ტემპუსის პროექტის „დისტანციურ ინჟინერიასა და ვირტუალურ ინსტრუმენტებზე დაფუძნებული ინდუსტრიული თანამშრომლობა და შემოქმედებითი საინჟინრო განათლება“ ფარგლებში ბათუმის შოთა რუსთაველის სახელმწიფო უნივერსიტეტში ორდღიანი შეხვედრა გაიხსნა. პროგრამის პარტნიორი უმაღლესი საგანმანათლებლო დაწესებულებების პროფესორ-მასწავლებლები პროექტის შედეგებს შეაჯამებენ და ერთმანეთს გამოცდილებას გაუზიარებენ. პროექტის მიზანია შექმნას და დანერგოს მეთოდოლოგია, რესურსები საინჟინრო სფეროს გასავითარებლად საქართველოში, უკრაინასა და სომხეთში. შემუშავდება საგანმანათლებლო პროგრამა საინჟინრო მიმართულებით ალტერნატიული ტექნოლოგიების გამოყენებით და განისაზღვრება სასწავლო მეთოდოლოგია შრომის ბაზრის მოთხოვნების შესაბამისად. პროგრამის ეგიდით გაიხსნა სპეციალური მოწყობილობებით აღჭურვილი ლაბორატორია, სადაც წარმატებით გაიარეს თეორიული და პრაქტიკული კურსები ფიზიკის, კომპიუტერული მეცნიერებებისა და საინჟინრო სპეციალობების საგანმანათლებლო პროგრამის სტუდენტებმა.

ბათუმის შოთა რუსთაველის სახელმწიფო უნივერსიტეტში ინგლისური ენის საზაფხულო სკოლის პირველი ეტაპი დასრულდა. ღონისძიებაში მონაწილე ბათუმის კერძო და საჯარო სკოლების IX, X, XI კლასების 130 მოსწავლეს, ქართველ პროფესორ-მასწავლებლებსა და მშვიდობის კორპუსის ამერიკელ წარმომადგენლებს სერტიფიკატები გადაეცათ. სწავლება მიზნად ისახავდა ინგლისურ ენაზე თავისუფლად საუბრის უნარ-ჩვევების გამომუშავებასა და ამერიკის კულტურის შესახებ ცოდნის შეძენას. საზაფხულო სკოლა ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ევროპეისტიკის დეპარტამენტის პროფესორ-მასწავლებლებისა და ბსუ-ში მოწვეული მშვიდობის კორპუსის ინგლისური ენის მასწავლებლის მარია ინისის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტი ღრმა მწუხარებას გამოთქვამს თბილისში დატრიალებული სტიქიური უბედურების გამო. სტუდენტები, პროფესორ-მასწავლებლები და რექტორატი თანაუგრძნობს დაღუპულთა და დაზარალებულთა ოჯახებს. ბათუმის შოთა რუსთაველის სახელმწიფო უნივერსიტეტმა მათ დასახმარებლად გადაწყვიტა თანამშრომელთა ხელფასის 1% გადაირიცხოს სტიქიით დაზარალებულთა დახმარების ფონდში. ასევე დაიწყო საქველმოქმედო აქცია პირველადი მოხმარების საგნებისა და ტანსაცმლის შესაგროვებლად. სტიქიის შედეგად დაზარალებულთა დახმარების მსურველებმა მიმართეთ უნივერსიტეტში შექმნილ შტაბს. მისამართი: ბათუმი, ნინოშვილის #35, I კორპუსი, სასპორტო დარბაზი.

19-20 ივნისს, კიშინევში მოლდოვის თავისუფალ საერთაშორისო უნივერსიტეტში (ULIM) შუალედური კონფერენცია გაიმართა თემაზე: „ევროპისმცოდნეობაში სწავლების ახალი მოდერნიზირებული კურიკულუმების შემუშავება“. სესია ტემპუსის საგრანტო პროექტის Tempus INOTLES (სწავლებისა და სწავლის ინოვაციური მეთოდები ევროპისმცოდნეობის დარგში) ფარგლებში ჩატარდა. პროექტში მონაწილე უნივერსიტეტების პროფესორებმა პარტნიორი უნივერსიტეტების სამომავლო სამუშაო გეგმა განიხილეს, ევროპისმცოდნეობის სასწავლო პროგრამებს გაეცნენ და ევროპისმცოდნეობაში სწავლების ახალი მოდერნიზირებული კურიკულუმების შემუშავებაზე იმსჯელეს.

ჩერნიგოვის ნაციონალური ტექნოლოგიური უნივერსიტეტის (უკრაინა) რექტორი, პროფესორი სერგეი შკარლეტი, მიხაილ ბალუდიანსკის სამეცნიერო საზოგადოების (სლოვაკეთი) პრეზიდენტი, პროფესორი მიხაილ ვარხოლა, უკრაინის ბიორესურსებისა და ბუნებითსარგებლობის ეროვნული უნივერსიტეტის გლობალური ეკონომიკის განყოფილების ხელმძღვანელი ნატალია ვდევენკო, ჩერნიგოვის ნაციონალური ტექნოლოგიური უნივერსიტეტის საჯარო ადმინისტრირებისა და მენეჯმენტის ინსტიტუტის დირექტორი, პროფესორი ოლგა რუდენკო ამავე უნივერსიტეტის პროფესორ-მასწავლებლებთან ერთად, ბათუმის შოთა რუსთაველის სახელმწიფო უნივერსიტეტს ეწვივნენ. ბსუ-ს რექტორის მოადგილესთან, პროფესორ ნათია წიკლაშვილთან და პროფესორ-მასწავლებლებთან გამართულ შეხვედრაზე დელეგაციის წევრებმა სამომავლო თანამშრომლობის მიმართულებებზე ისაუბრეს.