ახალი ამბები

საქართველოს ფრანგული ინსტიტუტის საუნივერსიტეტო თანამშრომლობის ასისტენტმა ანა ლოლუამ ბათუმის შოთა რუსთაველის სახელმწიფო უნივერსიტეტის სტუდენტებს საფრანგეთის გაცვლითი პროგრამები და მასში მონაწილეობის პირობები გააცნო. საფრანგეთში სწავლის მსურველებს ასევე წარუდგინა საფრანგეთის უმაღლესი განათლების სისტემა, სასწავლო პროგრამები და სტიპენდიები. გაცვლით პროექტებში მონაწილეობის მიღება შეუძლიათ როგორც ფრანგული ფილოლოგიის ბაკალავრიატის, მაგისტრატურისა და დოქტორანტურის სტუდენტებს, ასევე ფრანგული ენის შემსწავლელ ახალგაზრდებს.

ბათუმის შოთა რუსთველის სახელმწიფო უნივერსიტეტში პირველობა გაიმართა ქუჩის კალათბურთში. კობა ჯინჭარაძის ხსოვნისადმი მიძღვნილ მატჩში ერთმანეთს გუნდები „შანელი“ და „გპი“ დაუპირისპირდნენ. სოციალურ და პოლიტიკურ მეცნიერებათა და ეკონომიკისა და ბიზნესის ფაკულტეტის სტუდენტებმა ტექნოლოგიური ფაკულტეტის სტუდენტები დაამარცხეს ანგარიშით 7:5. ფინალის საუკეთესო კალათბურთელად ლაშა დევაძე დასახელდა, ხოლო ტურნირის საუკეთესო თავდამსხმელად - მირიან ცინცაძე.

ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მთავარმა მეცნიერ თანამშრომელმა, ასოცირებულმა პროფესორმა ნინო კიკნაძემ წაიკითხა ღია ლექცია თემაზე: გაცვლითი პროგრამების მნიშვნელობა სწავლებასა და სამეცნიერო-კვლევითი მუშაობის პროცესში (Erasmus Mundus, სანტიაგო დე კომპოსტელას უნივერსიტეტის მაგალითზე)“. მომხსენებელმა პრეზენტაციაზე ისაუბრა ALRAKIS II-ის გაცვლითი პროგრამაში მონაწილეობისას მიღებულ გამოცდილებასა და პოსტდოქტორანტულ კვლევებზე. ასოცირებულმა პროფესორმა ნინო კიკნაძემ ასევე წარმოადგინა მობილობის პერიოდში მის მიერ განხორციელებულ აქტივობები და სანტიაგო დე კომპოსტელას უნივერსიტეტი (USC). სტუდენტებს, პროფესორ-მასწავლებლებს და მეცნიერ-თანამშრომლებს მიაწოდა ინფორმაცია საბაკალავრო, სამაგისტრო და სადოქტორო სპეციალობების, აკადემიური ხარისხების შესახებ მათთვის საინტერესო მიმართულებებით.

ბათუმის შოთა რუსთაველის სახელმწიფო უნივერსიტეტში სემიოტიკის VII საერთაშორისო სამეცნიერო კონფერენცია გაიხსნა თემაზე: „ქაოსისა და კოსმოსის სემიოტიკა“. სამეცნიერო კონფერენცია ოთხი მიმართულებით 13 სექციაში იმუშავებს. ორი დღის განმავლობაში 100-მდე ქართველი და უცხოელი პროფესორ-მასწავლებელი და მკვლევარი მოხსენებას წარმოადგენს სემიოტიკის აქტუალურ პრობლემებზე. კონფერენციის მიმდინარეობისას გაიმართება მრგვალი მაგიდა თემაზე: სინერგეტიკა - მეცნიერების მომავალი.

აჭარის ა.რ. სოფლის მეურნეობის მინისტრი ლაშა კომახიძე და აგროსერვის ცენტრის დირექტორი გოჩა ბერიძე ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს, რექტორის მოადგილეებს: ნათია წიკლაშვილსა და ინგა შამილიშვილს, აგრარული მიმართულების საგანმანათლებლო პროგრამების პროფესორ-მასწავლებლებსა და სამეცნიერო ინსტიტუტების ხელმძღვანელებს შეხვდნენ. ვიზიტი მიზნად ისახავდა აგრარული დარგების განვითარებისთვის ერთობლივი პროექტების განხორციელებასა და სამეცნიერო კვლევის შედეგების პრაქტიკაში დანერგვას. შეხვედრაზე ბსუ-ს ფიტოპათოლოგიისა და ბიომრავალფეროვნების ინსტიტუტის, აგრარული და მემბრანული ტექნოლოგიების ინსტიტუტისა და დასავლეთ საქართველოს რეგიონული ქრომატოგრაფიული ცენტრის მეცნიერ-თანამშრომლებმა ბოლო რამდენიმე წლის განმავლობაში განხორციელებული სამეცნიერო პროექტების შედეგები წარმოადგინეს. ღონისძიების დასასრულს, სტუმრები უნივერსიტეტის ბაზაზე არსებულ ლაბორატორიებს გაეცნენ.