ახალი ამბები

ბათუმის შოთა რუსთაველის სახელმწიფო უნივერსიტეტის სააქტო დარბაზში ლიტერატურული კომპოზიცია „ვეფხისტყაოსანი“ გაიმართა. საქართველოს შოთა რუსთაველის თეატრისა და კინოს სახელმწიფო უნივერსიტეტის სტუდენტებმა ბსუ-ს სცენაზე უკვდავი პოემის „ვეფხისტყაოსნის“ რამდენიმე ეპიზოდი თეატრალური მოქმედებებით გააცოცხლეს. რეჟისორმა თამარ ხიზანიშვილმა კომპოზიცია საქართველოს შოთა რუსთაველის თეატრისა და კინოს სახელმწიფო უნივერსიტეტის, საქართველოს საპარტიარქოსა და კულტურისა და ძეგლთა დაცვის სამინისტროს ერთობლივი პროექტის ფარგლებში წარმოადგინა.

ბათუმის შოთა რუსთაველის სახელმწიფო უნივერსიტეტოს საზოგადოებრივ და პოლიტიკურ მეცნიერებათა დეპარტამენტის ასოცირებული პროფესორმა ირაკლი გორგილაძემ და ასისტენტ პროფესორმა ლაშა ბაჟუნაიშვილმა მონაწილეობა მიიღეს საერთაშორისო კონფერენციაში „ნატო მსოფლიოს თანამედროვე გამოწვევების წინაშე 2016 წლის ვარშავის სამიტის შემდეგ“. ქართველმა მომხსენებლებმა ორდღიან საერთაშორისო სესიაზე მოხსენება წარადგინეს თემაზე: ნატოს შავი ზღვის რეგიონის ჰორიზონტები და „ახალი გეოპოლიტიკური“ არქიტექტურა. ბსუ-ს პროფესორებმა საკუთარი მოსაზრებები წარმოადგინეს ასევე კონფერენციის ფარგლებში გამართულ დისკუსიებში, სემინარებსა და სხვა სამეცნიერო ღონისძიებებში. სამეცნიერო კონფერენცია გაიმართა ვუჯის უნივერსიტეტის (პოლონეთი) საერთაშორისო ურთიერთობებისა და პოლიტიკის მეცნიერების ფაკულტეტის ორგანიზებით.

ბათუმში აზერბაიჯანის რესპუბლიკის გენერალური კონსული რაშად ფაილ ოღლუ ისმაილოვი ბათუმის შოთა რუსთაველის სახელმწიფო უნივერსიტეტს ეწვია. დიპლომატი რექტორს, მერაბ ხალვაშს შეხვდა და ორ ქვეყანას შორის საგანმანათლებლო-სამეცნიერო თანამშრომლობის კიდევ უფრო გაღრმავებაზე ესაუბრა. შეხვედრის ფარგლებში, გენერალურმა კონსულმა, რექტორთან ერთად, უნივერსიტეტის სტომატოლოგიური კლინიკა, ზოოლოგის კაბინეტი, კრიმინალისტიკის ცენტრი, იურიდიული კლინიკა, სასამართლო საიმიტაციო დარბაზი და დასავლეთ დასავლეთ საქართველოს რეგიონული ქრომატოგრაფიული ცენტრი მოინახულა.

მასწავლებელთა პროფესიული განვითარების ეროვნული ცენტრის ტრენერმა ია ფირანიშვილი-გიგიბერიამ ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებისათვის ტრენინგი ჩაატარა მოდულური სწავლების აქტუალურ საკითხებზე. სწავლების მონაწილეები ორი დღის განმავლობაში მოდულური პროგრამების შემუშავებისათვის საჭირო დოკუმენტის თეორიულ მასალას, პროფესიული საგანმანათლებლო პროგრამების სტრუქტურასა და სწავლების თანამედროვე მეთოდებს გაეცნენ.

ბათუმის შოთა რუსთაველის სახელმწიფო უნივერსიტეტში საზაფხულო სკოლა „კრიტიკული აზროვნება სოციალურ მეცნიერებებში’’ დასრულდა. პროექტი 4 დღის განმავლობაში მიმდინარეობდა და მას სოციოლოგი იაგო კაჭკაჭიშვილი და ფსიქოლოგი გაგა ნიჟარაძე უძღვებოდნენ. საზაფხულო სკოლის მიზანი სტუდენტებში კრიტიკული აზროვნების განვითარება იყო და მასში აჭარის რეგიონში მოქმედი უმაღლესი საგანმანათლებლო დაწესებულებების განათლების, ჰუმანიტარულ, სოციალურ და პოლიტიკურ მეცნიერებათა ფაკულტეტის მაგისტრატურის სტუდენტები ღებულობდნენ მონაწილეობას.