ბათუმის შოთა რუსთაველის სახელმწიფო უნივერსიტეტში გაეროს ბავშვთა ფონდის წარმომადგენელმა საქართველოში ღასან ხალილიმ საჯარო ლექცია ჩაატარა თემაზე "ბავშვის უფლებებზე დაფუძნებული განათლება". ღასან ხალილიმ შეხვედრაზე ყურადღება გაამახვილა სწავლების მეთოდებსა და თანაბარ შესაძლებლობაზე, მასწავლებელთა სახლის ფუნქციებსა და მასწავლებელთა გადამზადების აუცილებლობაზე, ასევე ისაუბრა მოსწავლეთა და სტუდენტთა უფლებებსა და კომპეტენციებზე.

ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საქართველოში გაეროს ბავშვთა ფონდის წარმომადგენელს, სამართლის დოქტორ ღასან ხალილს საპატიო დოქტორის წოდება მიანიჭა. ღასან ხალილმა მნიშვნელოვანი წვლილი შეიტანა ბსუ-ს განვითარებასა და მომავალი თაობების აღზრდის საქმეში. მისი ინიციატივით, Unicef-ის საქართველოს ოფისი წლებია მხარს უჭერს უნივერსიტეტს სხვადასხვა საგანმანათლებლო აქტივობის განხორციელებაში. დოქტორ ღასან ხალილის ხელმძღვანელობით ბსუ-ში გაიხსნა ბავშვთა უფლებების ცენტრი, ჩატარდა საერთაშორისო კონფერენცია ბავშვის უფლებებზე, დაფინანსდა და ხორციელდება საგრანტო პროექტი ბავშვთა უფლებების ცენტრის გასაძლიერებლად, ტრენინგები გაირა აკადემიურმა პერსონალმა ზოგადი განათლების დაწყებითი საფეხურის მასწავლებლის მომზადებისა და სკოლამდელი განათლების საკითხებში.

ბსუ-ს USAID-ის მისიის დირექტორი პიტერ ვიბლერი ეწვია. ვიზიტის მიზანს „USAID-ის საბაზისო განათლების პროგრამაში“ ბსუ-დან ჩართულ მონაწილეებთან შეხვედრა და პროგრამის მიმდინარეობის შესახებ ინფორმაციის გაცვლა წარმოადგენდა. შეხვედრაში ქართველ და უცხოელ სტუმრებთან ერთად, ბსუ-ს რექტორის მოადგილე თამარ სირაძე, ბსუ-ში „USAID-ის საბაზისო განათლების პროგრამის“ მენეჯერი ნანა მაკარაძე, ტრენერები, საჯარო სკოლების დირექტორები და ლიდერი მასწავლებლები მონაწილეობდნენ. შეხვედრის მონაწილეებმა სკოლისა და უნივერსიტეტისთვის პროგრამის მნიშვნელობაზე, პროგრამის მიმდინარე შედეგებზე და აჭარისა და გურიის რეგიონების საჯარო სკოლებში არსებულ გამოწვევებზე იმსჯელეს. ასევე ისაუბრეს ზოგადი განათლების დაწყებითი საფეხურის მასწავლებლის მომზადების ინტეგრირებული საბაკალავრო-სამაგისტრო პროგრამის განვითარების შესაძლებლობებზე.

ბსუ-ს ზუსტ მეცნიერებათა და განათლების ფაკულტეტს გაეროს ბავშვთა ფონდმა (UNICEF) სახელმძღვანელოები გადასცა. ადრეული განათლების მიმართულებით გამოცემული უახლესი ლიტერატურა გაეროს ბავშვთა ფონდმა იმ სახელმწიფო უნივერსიტეტებისთვის და მათ შორის - ბსუ-სთვის შეიძინა, რომლებიც ადრეული და სკოლამდელი განათლების მიმართულებით საბაკალავრო საგანმანათლებლო პროგრამების მომზადებაზე მუშაობენ. შეხვედრაში, გაეროს ბავშვთა ფონდის გარდა, საქართველოს განათლებისა და მეცნიერების სამინისტროს სკოლამდელი განათლების სამმართველოს და აჭარის განათლების, კულტურისა და სპორტის სამინისტროს განათლების დეპარტამენტის წარმომადგენლებიც მონაწილეობდნენ.

საერთაშორისო სამეცნიერო კონფერენცია „ბიონანოაგენტების კვლევის თანამედროვე მეთოდები“ გაიხსნა ბათუმის შოთა რუსთაველის სახელმწიფო უნივერსიტეტში. საერთაშორისო სესიის მიზანია საქართველოში გრძელვადიანი ინოვაციური პოტენციალის გაუმჯობესება და მათი პოპულარიზაცია. კონფერენცია ხელს შეუწყობს ინტერდისციპლინარულ თანამშრომლობას (ბიო – სამედიცინო და ბიოფიზიკა, ფიზიკური კვლევა, ინფორმაციული ტექნოლოგია და სისტემები), ასევე კვლევისა და ინოვაციური პროდუქტების, ცოდნისა და იდეების გაცვლას ბაზრიდან კვლევამდე და პირიქით. სამდღიან სესიაში მონაწილეობას ღებულობენ საქართველოსა და უცხოეთის უმაღლესი საგანმანათლებო დაწესებულებების წამყვანი პროფესორ-მასწავლებლები და მკვლევრები.