ბათუმის შოთა რუსთაველის სახელმწიფო უნივერსიტეტმა (და არა მხოლოდ) დიდი დანაკლისი განიცადა. 5 ივნისს, მძიმე ავადმყოფობის შედეგად, მათემატიკის ცნობილი პროფესორი, ბატონი ვლადიმერ ბალაძე გარდაიცვალა. ბატონი ვლადიმერი რომ უდავოდ დიდი პიროვნება ბრძანდებოდა, მინიმუმ ამ დღეებში მისი ფოტოებით აცრემლებული სოციალური ქსელები ცხადყოფს. დანაკლისი დიდია, აუნაზღაურებელიც კი. წავიდა ის, ვისითაც ძალიან ვამაყობდით. მსოფლიო დონის მეცნიერ-მკვლევარი იმიერ საქართველოში გადაცხოვრდა. მშობლიური გეგელიძეები მისთვის საფიცარი იყო. გზა, ღვთისმშობლის შობის საკათედრო ტაძრიდან გეგელიძეებამდე, გრძელი, ემოციური და სევდიანია. მშვიდობით ჩვენო მასწავლებელო. დღეს ჩვენ, თქვენი მოწაფეები (თქვენ ხშირად ამბობდით სიტყვა მოწაფეს), ქედმოხრილნი, დიდ ვლადიმერ ბალაძეს ვემშვიდობებით.

ბათუმის შოთა რუსთაველის სახელობის სახელმწიფო უნივერსიტეტის ემერიტუს პროფესორ ნოდარ ბარამიძეს, დაბადებიდან 80 წელი შეუსრულდა. ფსიქოლოგიის დეპარტამენტი ულოცავს მას ამ ღისშესანიშნავ თარიღს. უსურვებს ჯანის სიმრთელეს და მხნეობას.

ბათუმის შოთა რუსთაველის სახელმწიფო უნივერსიტეტის აღმოსავლეთმცოდნეობის დეპარტამენტის ხელმძღვანელს, პროფესორ ლილე თანდილავას, დაბადებიდან სამოცდახუთი წელი შეუსრულდა.

15 თებერვალი გამოჩენილი ქართველი მეცნიერის, ბათუმის შოთა რუსთაველის სახელმწიფო უნივერსიტეტის ემერიტუს-პროფესორის - ქალბატონ შუშანა ფუტკარაძის დაბადების დღეა. ის ჩემი ლექტორიც გახლდათ და როცა მის ლექციებს ვიხსენებ, მაოცებს ის ენერგია, შრომისმოყვარეობა, პროფესიონალიზმი და საგნის სიყვარული, რითაც ის გამოირჩეოდა. სწორედ ამ თვისებებმა მისცა მას საშუალება, რომ შეექმნა უნიკალური ნაშრომი - „ჩვენებურების ქართულის“ ორტომეული.

გვაქვს პატივი საიუბილეო თარიღი მივულოცოთ ბათუმის შოთა რუსთაველის სახელმწიფო უნივერსიტეტის პროფესორს, ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის ხელმძღვანელს, ცნობილ თურქოლოგს, ქართული თურქოლოგიის ბათუმის სკოლის ერთ-ერთ დამაარსებელს, ბატონ ემზარ მაკარაძეს.