ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის ადმინისტრაციის წარმომადგენლები (გ.ფარცხალაძე, გ.შამილიშვილი, გ.ჩავლეშვილი) და მშენებლობის მეოთხე კურსის სტუდენტები სამშენებლო კომპანია „ოცნების სახლის’’ წარმომადგენლებს შეხვდნენ. შეხვედრა სტუდენტთა დასაქმების პროგრამის განხორციელების მიზნით გაიმართა. აქვე გამოვლინდა კომპანიაში არსებულ ვაკანსიაზე წარსადგენ სტუდენტთა კანდიდატურები.

დამდეგი შობა-ახალი წელი ტექნოლოგიურ ფაკულტეტზე საახალწლო ღონისძიებით აღინიშნა. სტუდენტების მიერ ორგანიზებულ საახალწლო საღამოზე ფაკულტეტის შემოქმედებითი ჯგუფები წარსდგნენ. სხვადასხვა ნომინაციაში დაჯილდოვდნენ ტექნოლოგიური ფაკულტეტის პროფესორ-მასწავლებლები. სტუდენტებსა და პროფესორ-მასწავლებლებს დღესასწაული ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა, მოადგილემ ასოცირებულმა პროფესორმა ინგა შამილიშვილმა, ადმინისტრაციის ხელმძღვანელმა ჯემალ ანანიძემ და ფაკულტეტის დეკანმა გიზო ფარხცალაძემ მიულოცეს, წარმატებები უსურვეს და გასული წელი შეაჯამეს.

ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის სტუდენტებისა და პროფესორ-მასწავლებლებისათვუს აგრარული და მემბრანული ტექნოლოგიების ინსტიტუტის დირექტორმა რაულ გოცირიძემ ღია ლექცია წაიკითხა თემაზე: „ცნობადი და უცნობი წყალი“. მკვლევარმა ისაუბრა წყლის არაორდინალობასა და ანომალიებზე, ძირითად თვისებებზე. მსმენელები გაეცნენ წყლის მაღალ სითბოტევადობას, სიმკვრივის თავისებურებას, შემადგენლობას, ზედაპირულ დაჭიმულობას, სიბლანტეს, სასმელი წყლის დადებით და უარყოფით მახასიათებლებს, ადამიანის ორგანიზმის ქსოვილებში წყლის შემადგენლობას, წყლისგან გამოწვეულ დაავადებებს.

ბათუმის მოსწავლე–ახალგაზრდობის სასახლის მხარეთმცოდნეობის განყოფილების „მხიარული მოგზაურის“ პროექტის „თამარის სახელობის ხიდები აჭარაში“ ფარგლებში, ტექნოლოგიური ფაკულტეტის დეკანი, პროფესორი გიზო ფარცხალაძე, ფაკულტეტის ხარისხის უზრუნველყოფის სამსახურის უფროსი, ასოცირებული პროფესორი გოჩა ჩავლეშვილი და ნიკო ბერძენიშვილი ინსტიტუტის წამყვანი მეცნიერ–თანამშრომელი ნინო ინაიშვილი ბათუმის მოსწავლე–ახალგაზრდობის სასახლეს ეწვივნენ. მოსწავლეებმა შეხვედრაზე წარმოადგინეს მათი კვლევითი პროექტის პრაქტიკულ საქმიანობის ამსახველი ფოტო–კოლაჟი. ტექნოლოგიური ფაკულტეტის დეკანი მოსწავლეებს თანამედროვე ინოვაციური სამშენებლო კონსტრუქციებისა და არქიტექტურული დაგეგმარების შესახებ ესაუბრა და სასახლეს საჩუქრად ტექნოლოგიური ფაკულტეტის სამრეწველო ინოვაციიების ლაბორატორიაში დამზადებული ნივთები გადასცა. შეხვედრის დასასრულს ნორჩ მშენებლებსა და სტუმრებს შორის დისკუსია გაიმართა.

ტექნოლოგიური ფაკულტეტის ტექნოლოგიებისა და საინჟინრო მენეჯმენტის დეპარტამენტის ორგანიზებით, ნავთობისა და გაზის საგანმანათლებლო პროგრამის სტუდენტები ნობელების სახელობის ტექნოლოგიურ მუზეუმს ეწვივნენ და ღონისძიების „ნობელების დეკემბერი’’ ფარგლებში სამუზეუმო ექსპონატებს გაეცნენ. ორგანიზაციის წარმომადგენლებმა ახალგაზრდებს პროექტი „პირანდოლო და საქართველო“ წარუდგინეს. პრეზენტაციის დასასრულს ტექნოლოგიური ფაკულტეტის დეკანმა, პროფესორმა გიზო ფარცხალაძემ ნობელების მუზეუმს საზეიმოდ გადასცა ფაკულტეტის ბაზაზე არსებულ სამრეწველო ინოვაციური ლაბორატორიაში დასაქმებული სტუდენტების მამუკა ჩავლეიშვილის, თაზო ჩხარტიშვილისა და არჩილ შოთაძის მიერ დამზადებული ექსპონატი „ნავთობის რეზერვუარი’’.