ახალი ამბები

საქართველოს უნივერსიტეტების რექტორთა მუდმივმოქმედი კონფერენციის მორიგი სხდომა შოთა რუსთაველის სახელმწიფო უნივერსიტეტში გაიმართა. უმაღლესი სასწავლებლების ხელმძღვანელებმა ერთობლივი სადოქტორო პროგრამების განხორციელების წესზე იმსჯელეს. რექტორთა შეფასებით კონკურენტუნარიანი, საერთაშორისო მოთხოვნების შესაბამისი დოქტორანტის მოსამზადებლად აუცილებელია ქვეყნის უმაღლეს სასწავლებლებში არსებული პოტენციალისა და რესურსების გამოყენება. ერთობლივი საგანმანათლებლო პროგრამები მომავალში მაგისტრატურასა და ბაკალავრიატშიც განხორციელდება.

უნივერსიტეტის იუბილე ბათუმის ილია ჭავჭავაძის სახელობის სახელმწიფო დრამატულ თეატრში საზეიმოდ აღინიშნა. უნივერსიტეტის რექტორმა, პროფესორმა ალიოშა ბაკურიძემ უმაღლესი საგანმანათლებლო დაწესებულების ისტორიაზე, მიღწევებსა და სამომავლო განვითარების პერსპექტივებზე ისაუბრა. აჭარის ავტონომიური რესპუბლიკის საკანონმდებლო და აღმასრულებელი ხელისუფლების წარმომადგენლებმა, უმაღლესი სასწავლებლებისა და სამეცნიერო-კვლევითი დაწესებულებების ხელმძღვანელებმა იუბილარ უნივერსიტეტს ღირსშესანიშნავი თარიღი მიულოცეს, წარმატებები უსურვეს და სამახსოვრო საჩუქრები გადასცეს. საიუბილეო საღამო შოთა რუსთაველის სახელმწიფო უნივერსიტეტის შემოქმედებითი ჯგუფებისა და ანსამბლ ,,ბათუმის“ ერთობლივი კონცერტით დასრულდა

შოთა რუსთაველის სახელმწიფო უნივერსიტეტს დაარსებიდან 75 წელი შეუსრულდა. საიუბილეო დღეები უმაღლეს სასწავლებელში საუნივერსიტეტო ცხოვრების ამსახველი ფოტოგამოფენით დაიწყო. ორდღიან საიუბილეო სესიაზე პროფესორ-მასწავლებლებმა სამეცნიერო კვლევა-ძიების შედეგები შეაჯამეს. აკადემიური და წარმომადგენლობითი საბჭოების ერთობლივ გაფართოებულ საიუბილეო სხდომაზე ანკარის ბილკენტის უნივერსიტეტის პროფესორი დომენიკ ქასსაბ თეზგიორი, გრაიფვალდის უნივერსიტეტის პროფესორი ჰანს იუსტენი და მიუნხენის ლუდვიგ-მაქსიმილიანეს უნივერსიტეტის პროფესორი როლფ შაუერი საპატიო დოქტორებად აირჩიეს

შოთა რუსთაველის სახელმწიფო უნივერსიტეტის 75 წლის იუბილეს მიეძღვნა სტუდენტური თვითმმართველობის პროექტი - ,,ერთი სპორტული დღე“. პროექტის ფარგლებში უნივერსიტეტის ეზოში შეჯიბრი გაიმართა სპორტის სხვადასხვა სახეობაში: მლავჭიდში, ჭადრაკში, ფრენბურთსა და მაგიდის ჩოგბურთში. გამარჯვებული მონაწილეები სტუდენტურმა თვითმმართველობამ მედლებითა და სიგელებით დააჯილდოვა.

ცნობილი არქეოლოგისა და აკადემიკოსის ოთარ ლორთქიფანიძის ხსოვნას მიეძღვნა მე-12 საერთაშორისო სამეცნიერო კონფერენცია ,,კავკასიის არქეოლოგია, ეთნოლოგია, ფოლკლორისტიკა“. კონფერენცია 27 სექტემბერს საქართველოს მეცნიერებათა ეროვნულ აკადემიაში გაიხსნა და შოთა რუსთაველის სახელმწიფო უნივერსიტეტში გამართული პლენარული სხდომით დასრულდა. ოთხდღიან კონფერენციაში ჩრდილოეთ და სამხრეთ კავკასიის, ევროპის, ამერიკისა და ახლო აღმოსავლეთის 15 ქვეყნის 250-მდე მეცნიერი მონაწილეობდა. საერთაშორისო სამეცნიერო კონფერენციის ფარგლებში დღემდე 1800-ზე მეტი მოხსენებაა გამოქვეყნებული