ახალი ამბები

პირველობა ჩატარდა შოთა რუსთაველის სახელმწიფო უნივერსიტეტის „მან-სან-კანის“ გუნდებს შორის. შეჯიბრში მონაწილეობას განათლებისა და მეცნიერებათა ფაკულტეტის გუნდი „ბსუ“, აგრარული ტექნოლოგიებისა და ეკოლოგიის ფაკულტეტის გუნდი „სამასი აგრონომი“, საინჟინრო-ტექნოლოგიური ფაკულტეტის გუნდი „კარიკატურა“ და ტურიზმის ფაკულტეტის გუნდი „ტურისტები“ ღებულობდა. მხიარულმა და საზრიანმა ახალგაზრდებმა საკუთარი შესაძლებლობები ორ ნომერში, მისალმებასა და სკეტჩში წარმოაჩინეს. „მხიარულთა და საზრიანთა კლუბის“ თამაშების ჩემპიონატში პირველობა „სამას აგრონომს“ ერგო. შეჯიბრის საუკეთესო მონაწილეებით საუნივერსიტეტო გუნდი დაკომპლექტდა, რომელიც საქართველოს მან-სან-კანის ჩემპიონატში მიღებს მონაწილეობას.

შოთა რუსთაველის დარბაზში ფილოსოფიის მეცნიერებათა დოქტორის, პროფესორის, აჭარის უმაღლესი საბჭოს თავმჯდომარის მიხეილ მახარაძის მონოგრაფიის „არეოპაგიტიკის“ წარდგინება გაიმართა. ნაშრომში აღწერილია V-VI საუკუნეების მიჯნაზე შექმნილი უმნიშვნელოვანესი რელიგიურ-ფილოსოფიური მოძღვრების - არეოპაგიტიკის ფილოსოფიური, თეოლოგიური წყაროები და შეხედულებები. ავტორს განხილული აქვს პლატონის ფილოსოფია, ნეოპლატონიზმი, კაპადოკიელ მამათა მსოფლმხედველობა, არეპაგიტული ფილოსოფია და მისი გავლენა. მონოგრაფია განკუთვნილია დარგის სპეციალისტებისა და ჰუმანიტარული მეცნიერებებით დაინტერესებულთა ფართო წრისათვის.

სპორტისა და ახალგზარდობის საქმეთა დეპარტამენტის სტრატეგიული გეგმა რსუ-ს სტუდენტებს აჭარის განათლების, კულტურისა და სპორტის მინისტრმა გია აბულაძემ და სპორტისა და ახალგაზრდობის საქმეთა დეპარტამენტის ხელმძღვანელმა ნოდარ ფუტკარაძემ გააცნეს. უწყების პირველმა პირებმა ახალგაზრდებთან გამართულ შეხვედრაზე პროექტები წარმოადგინეს და დეპარტამენტის ერთწლიანი მუშაობის შედეგები შეაჯამეს. სტუდენტებს შესაძლებლობა ეძლევათ მონაწილეობა მიიღონ ისეთ პროექტებში, როგორიცაა: ინტელექტუალური თამაშები, ახალგაზრდული შემეცნებითი პროგრამები, ახალგაზრდული ინიციატივების მხარდაჭერის საგრანტო პროგრამა, მხიარულთა და საზრიანთა კლუბების მუსიკალური ფესტივალი, „სტუდენტური დღეები 2012”, საერთაშორისო ახალგაზრდული ფორუმი, „ჩვენი რეგიონისათვის“ –სტუდენტთა საზაფხულო ბანაკის მოწყობა.

აჭარის განათლების, კულტურისა და სპორტის სამინისტროსა და შოთა რუსთაველის სახელმწიფო უნივერსიტეტის მხარდაჭერით სააქტო დარბაზში საქველმოქმედო კონცერტი „გაიღეთ ქველმოქმედება სიყვარულისთვის“ გაიმართა. წმ. ეკატერინეს სახელობის სათნოების სახლთან არსებულმა ანსამბლმა „სათნოებამ“, რსუს-ს ქორეოგრაფიულმა ანსამბლმა „ტბეთმა“ და მგალობელთა გუნდმა „ფერიცვალებამ“ ქართული საგალობლები, ეროვნული ცეკვები, ხალხური და ქალაქური სიმღერები შეასრულეს. საქველმოქმედო კონცერტიდან შემოსული თანხა წმ. ეკატერინეს სახელობის სათნოების სახლს მოხმარდება.

რსუ-ს თარგმანის კვლევებისა და ინტერდისციპლინარული კვლევების საკოორდინაციო საბჭოს სესია ჩატარდა. საკოორდინაციო საბჭოსა და საგრანტო ჯგუფის წევრებმა პროექტი „მულტილინგვური კორპუსი - პოლიტიკა, როგორც მულტიდისციპლინარული კორპუსი“ წარმოადგინეს, რომელიც EWMI – USAID-ის საუნივერსიტეტო მხარდაჭერის გრანტის ფარგლებში ხორციელდება. შეხვედრაზე პროექტის მონაწილეებმა ინგლისურ-ქართული კორპუსის შექმნისა და კორპუსული კვლევების დანერგვის საკითხებზე იმსჯელეს. ასევე წარმოადგინეს გრანტის მართვის ტექნიკური და ლინგვისტური ასპექტების ანალიზი და სტრატეგიული საკითხები განიხილეს. შოთა რუსთაველის სახელმწიფო უნივერსიტეტის თარგმანის კვლევებისა და ინტერდისციპლინარული კვლევების საკოორდინაციო საბჭო 2011 წლიდან ქართული ენის ეროვნული კორპუსის საკოორდინაციო საბჭოს წევრია.