ახალი ამბები

ბათუმის შოთა რუსთაველის სახელმწიფო უნივერსიტეტში, ტურიზმის ფაკულტეტზე ფრანკოფონიის საუნივერსიტეტო სააგენტოს (AUF) ორგანიზებით, დასაქმების ფრანკოფონული ცენტრი (CEF) გაიხსნა. ცენტრი გახსნეს და მონაწილეებს მისასალმებელი სიტყვით მიმართეს ბსუ-ს რექტორმა მერაბ ხალვაშმა, AUF-ECO-ს რეგიონულმა დირექტორმა მუჰამედ კეტატამ და ფრანგული ინსტიტუტის დირექტორმა კამილ ნორამ. ბსუ მეორე უმაღლესი საგანმანათლებლო დაწესებულებაა საქართველოში, სადაც დასაქმების ფრანკოფონული ცენტრი გაიხსნა. ცენტრის მიზანია ინტერნაციონალიზაციის ხარისხის გაზრდა, უნივერსიტეტის სხვადასხვა ფაკულტეტის ფრანგულენოვანი სტუდენტებისთვის ტრენინგების ჩატარება, ახალგაზრდა კურსდამთავრებულთათვის კონფერენციების, სემინარების, ინტერვიუების ორგანიზება, სტუდენტების სამეწარმეო უნარების განვითარება, დასაქმების ხელშეწყობა და ახალგაზრდებს, მეწარმეებსა და დამსაქმებლებს შორის შეხვედრების ორგანიზება.

ბათუმის შოთა რუსთაველის სახელმწიფო უნივერსიტეტს ფრანგული ინსტიტუტის დირექტორი კამილ ნორა ეწვია. ფრანკოფონიის დღეების ფარგლებში გამართულ შეხვედრაზე ბსუ-ს რექტორმა მერაბ ხალვაშმა და ფრანგული ინსტიტუტის დირექტორმა კამილ ნორამ არსებულ მრავალწლიან წარმატებულ თანამშრომლობაზე ისაუბრეს და სამომავლო გეგმებზე იმსჯელეს. დაიგეგმა ტურიზმის მიმართულებით ერთობლივი სამაგისტრო საგანმანათლებლო პროგრამის შემუშავება და განხორციელება. ასევე ისაუბრეს ახალგახსნილი დასაქმების ფრანკოფონული ცენტრის მნიშვნელობაზე, რომელიც ხელს შეუწყობს სტუდენტებისა და კურსდამთავრებულების ინტერნაციონალიზაციას, დასაქმებასა და სამეწარმეო უნარების განვითარებას.

ბათუმის შოთა რუსთაველის სახელმწიფო უნივერსიტეტმა ხელვაჩაურის მუნიციპალიტეტის სხვადასხვა საჯარო სკოლის მოსწავლეებს უმასპინძლა. აბიტურიენტებს ბსუ-ს რექტორის მოადგილე თამარ სირაძე შეხვდა, საგანმანათლებლო პროგრამები, სტიპენდიები, სოციალური პროექტები, გაცვლითი პროგრამები გააცნო და დეტალური ინფორმაცია მიაწოდა საუნივერსიტეტო ცხოვრების შესახებ. სკოლის მოსწავლეებმა უნივერსიტეტის ბიბლიოთეკა, ზოოლოგიის კაბინეტი, ქიმიის და კრიმინალისტიკის ლაბორატორიები დაათვალიერეს და სახალისო ცდებში მიიღეს მონაწილეობა. მათ ასევე მოინახულეს ბსუ-ს სასამართლო საიმიტაციო დარბაზი, სადაც როლური თამაშების ფორმატში იმიტირებული სასამართლო პროცესი გაითამაშეს. ღონისძიება ხელვაჩაურის ახალგაზრდული ცენტრის პროექტის „აირჩიე შენი მომავალი პროფესია“ ფარგლებში გაიმართა.

გაეროს ბავშვთა ფონდის წარმომადგენელმა საქართველოში იესპერ მოლერმა, აჭარის განათლების, კულტურისა და სპორტის მინისტრმა მაია ხაჯიშვილმა და ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა ადრეული განათლებისა და ზრუნვის შესახებ მესამე საერთაშორისო კონფერენციის თარიღი გამოაცხადეს. კონფერენცია, რომელიც საქართველოს განათლების, მეცნიერებისა და სპორტის სამინისტროს, აჭარის განათლების, კულტურისა და სპორტის სამინისტროს, გაეროს ბავშვთა ფონდისა და ბათუმის შოთა რუსთაველის სახელმწიფო უნივერსიტეტის ორგანიზებით ტარდება, 26-27 სექტემბერს ბათუმში გაიმართება.

გაეროს ბავშვთა ფონდის (UNICEF) წარმომადგენელი საქართველოში იასპერ მოლერი ბათუმის შოთა რუსთაველის სახელმწიფო უნივერსიტეტს ფონდის თანამშრომლებთან ერთად ეწვია. შეხვედრაზე ბსუ-ს რექტორმა მერაბ ხალვაშმა და იასპერ მოლერმა ბსუ-ს ბავშვთა უფლებების ცოდნის ცენტრის მიღწევებსა და სამომავლო გეგმებზე ისაუბრეს. ვიზიტის ფარგლებში შედგა შეხვედრა ბსუ-ს ბავშვის უფლებათა ცოდნის ცენტრის წარმომადგენლებთან, სადაც დაიგეგმა საქართველოს უნივერსიტეტში მოქმედი ბავშვთა უფლებების ცოდნის ცენტრების ერთიანი ქსელის შექმნა.