ახალი ამბები

პუბლიცისტმა, მედიცინის დოქტორმა და საქართველოს პარლამენტის წევრმა ფრიდონ საყვარელიძემ შოთა რუსთაველის დარბაზში საჯარო ლექცია წაიკითხა თემაზე: „ადამიანის უფლებები, დემოკრატია და ქართული კულტურა“. მომხსენებელმა ბათუმის შოთა რუსთაველის სახელმწიფო უნივერსიტეტის სტუდენტებს დემოკრატიული პროცესების განვითარებაზე, სამოქალაქო საზოგადოების განათლების დონის ამაღლებაზე, დემოკრატიულ ღირებულებებსა და სხვა აქტუალურ საკითხებზე ესაუბრა. ღონისძიება აჭარის განათლების, კულტურისა და სპორტის სამინისტროს ქვეპროგრამის „უაღლესი განათლების ხელშეწყობის“ ფარგლებში ჩატარდა.

ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებისა და მკვლევარებისათვის კომპანია „Elsevier“-ის წარმომადგენელმა თამარ გოგუამ ტრენინგი ჩაატარა. ტრენერმა მსმენელებს ონლაინბიბლიოთეკა წარუდგინა და Scopu-ისა და ScienceDirect-ის გამოყენების წესები გააცნო. ორგანიზაცია 125 წელზე მეტია მჭიდროდ თანამშრომლობს მეცნიერებთან და უზრუნველყოფს სამეცნიერო კვლევების საინფორმაციო მხარდაჭერას. მსოფლიოს წამყვანი ონლაინბიბლიოთეკა Elsevier-ი 16 მილიონ მომხმარებელს ყოველწლიურად 2200 სამეცნიერო ჟურნალის 350 000-მდე სამეცნიერო სტატიას სთავაზობს.

ინოვაციებისა და რეფორმების ცენტრის (IRC) წარმომადგენელებმა მარიამ ჭუმბურიძემ და ქეთი გომელაურმა ბათუმის შოთა რუსთველის სახელმწიფო უნივერსიტეტის სტუდენტებსა და პროფესორ-მასწავლებლებს პროექტი “საქართველოს მხარდაჭერა სწორი და დაბალანსებული საიმიგრაციო პოლიტიკის შემუშავებაში“ წარუდგინეს. ცენტრი 2013 წლიდან ევროკავშირის მხარდაჭერით ახორციელებს პროექტს, რომლის ფარგლებში ჩატარდა ფართომასშტაბიანი კვლევა იმიგრაციის საკითხებზე. წარდგინების დასასრულს ცენტრის თანამშრომლებმა დისკუსია გამართეს, სამომავლო თანამშრომლობის გეგმებზე ისაუბრეს და უნივერსიტეტის უცხოელი სტუდენტების შეკითხვებს უპასუხეს.

ბათუმის შოთა რუსთაველის სახელმწიფო უნივერსიტეტის ბიბლიოთეკაში ეროვნული სამეცნიერო ბიბლიოთეკის ფილიალი გაიხსნა. ფილიალის მიზანია ადგილობრივ მკითხველს სამეცნიერო საქმიანობის უკეთ წარმართვაში შეუწყოს ხელი და მისცეს ინფორმაციის მოპოვებისა და გამოყენების სწრაფი საშუალება. დაინტერესებულ პირებს მონაცემთა ბაზების მოძიებაში ბსუ-ს ბიბლიოთეკის თანამშრომლები დაეხმარებიან, რომლებმაც უკვე გაიარეს ტრენინგები ეროვნულ სამეცნიერო ბიბლიოთეკაში. ღონისძიებაზე ეროვნული სამეცნიერო ბიბლიოთეკის დირექტორის მოადგილემ ნინო პავლიაშვილმა პროფესორ-მასწავლებლებს ვებგვერდი და მრავალფეროვანი სერვისების გამოყენების პირობები გააცნო.

ბათუმის შოთა რუსთაველის სახელმწიფო უნივერისტეტის რექტორის მოვალეობის შემსრულებელმა მერაბ ხალვაშმა აჭარის ა/რ სოფლის მეურნეობის მინისტრს ზაურ ფუტკარაძეს უმასპინძლა. შეხვედრა მიზნად ისახავდა აგრარული მიმართულების დარგის განვითარებისთვის ერთობლივი პროექტების განხორციელებას. განიხილეს სამინისტროს პროგრამების მომზადებაში უნივერსიტეტის აკადემიური პერსონალის ჩართულობა. ასევე, ტექნოლოგიური ფაკულტეტის სტუდენტების მონაწილეობა სამინისტროს დაქვემდებარებულ დაწესებულებებში.