ახალი ამბები

ბათუმის შოთა რუსთაველის სახელმწიფო უნივერსიტეტის მუსიკალური ბენდი საერთაშორისო არტ ფესტივალ-კონკურსის „ნესებრის თანავარსკვლავედი - 2019-ის“ გრან პრის მფლობელია. ფესტივალ-კონკურსი 20-25 აგვისტოს ბულგარეთში, ქალაქ ნესებირში გაიმართა და მასში ევროპის სხვადასხვა ქვეყნის შემოქმედებითი ჯგუფები მონაწილეობდა. ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში ბენდის წევრებთან ერთად მის ხელმძღვანელს კალისტრატე ცინცაძეს შეხვდა, ფესტივალში წარმატებულად მონაწილეობა მიულოცა და მადლობა გადაუხადა უნივერსიტეტისა და ქართული ხელოვნების პოპულარიზაციისათვის.

სტრატეგიული კომუნიკაციების სალექციო კურსის აქტუალურ საკითხებზე ბათუმის შოთა რუსთაველის სახელმწიფო უნივერსიტეტში ვორქშოფი გაიმართა. ბსუ-ს იურიდიული და სოციალურ მეცნიერებათა ფაკულტეტის პროფესორ-მასწავლებლებმა და საქართველოს სტრატეგიის და განვითარების ცენტრის (GCSD-ის) წარმომადგენლებმა სამუშაო შეხვედრაზე კურსის სტრუქტურა, ამოცანები, მიზნები, სახელმძღვანელო ლიტერატურა და სწავლების ინოვაციური მეთოდების დანერგვის შესაძლებლობები განიხილეს. ინოვაციური სასწავლო კურსი GCSD-ისა და ბათუმის შოთა რუსთაველის სახელმწიფო უნივერსიტეტის თანამშრომლობით და აშშ-ის საელჩოს ფინანსური მხარდაჭერით ინერგება. პროგრამის ფარგლებში ასევე დაგეგმილია სტუდენტებისთვის სტიპენდიების გაცემა და სამეცნიერო კონფერენციის ორგანიზება.

ბათუმის შოთა რუსთაველის სახელმწიფო უნივერსიტეტისა და სოციალური კვლევისა და ანალიზის ინსტიტუტის ორგანიზებით სეზონური სკოლა „სოციალური მუშაობის სერტიფიცირების პროგრამის მომზადება ბათუმის სახელმწიფო უნივერსიტეტში“ გაიხსნა. ბსუ-ს პროფესორ-მასწავლებლები და დასავლეთ საქართველოში მოქმედი სოციალური მუშაკები ხუთი დღის განმავლობაში სოციალური მუშაობის ისეთ აქტუალურ საკითხებს გაეცნობიან, როგორიცაა: სოციალური მუშაობის საფუძვლები, სოციალური ადვოკატირება, ადამიანის ქცევა სოციალურ გარემოში, სოციალურ კეთილდღეობის პოლიტიკა, სოციალური მუშაობის კვლევის მეთოდები. ქართველი და უცხოელი მომხსენებლები ლექციებს წაიკითხავენ ასევე თემებზე: სოციალური მუშაობა თემებთან და ორგანიზაციებთან, სოციალური მუშაობა და ოჯახში ძალადობა, სოციალური მუშაობა და ბავშვთა დაცვა, სოციალური მუშაობა და სისხლის სამართლის მართლმსაჯულება.

დასრულდა ბათუმის შოთა რუსთაველის სახელმწიფო უნივერსიტეტისა და მიკოლას რომერის უნივერსიტეტის ერთობლივი საერთაშორისო საზაფხულო სკოლა „კონსტიტუციური დემოკრატია: თანამედროვე გამოწვევები“. იურიდიული და სოციალურ მეცნიერებათა ფაკულტეტის დეკანმა ლევან ჯაყელმა, ბსუ-ს ასოცირებულმა პროფესორმა, საზაფხულო სკოლის პროექტის ხელმძღვანელმა მალხაზ ნაკაშიძემ, ჰემლაინის უნივერსიტეტის პროფესორმა დევიდ შულცმა და მიკოლას რომერის უნივერსიტეტის პროფესორმა თომა ბირმონტიენემ სკოლის მონაწილეებს საქართველოს კონსტიტუციის დღე მიულოცეს და სერტიფიკატები გადასცეს. საერთაშორისო საზაფხულო სკოლაში 20 ქართველი და უცხოელი სტუდენტი მონაწილეობდა. ახალგაზრდებს კონსტიტუციური სამართალის, კონსტიტუციური დემოკრატიის მნიშვნელოვანი ინსტიტუტების აქტუალური საკითხები ამერიკისა და ევროპის წამყვანი უნივერსიტეტების პროფესორებმა გააცნეს.

საქართველოს საკონსტიტუციო სასამართლოში ტეხასის უნივერსიტეტის პროფესორის რიჩარდ ალბერტის წიგნის - „საკონსტიტუციო ცვლილებები: როგორ იქმნება, ირღვევა და იცვლება კონსტიტუციები“ პრეზენტაცია გაიმართა. წარდგენაზე წიგნის ავტორმა ნაშრომის მნიშვნელობასა და აქტუალობაზე ისაუბრა. წიგნში განხილულია საკონსტიტუციო ცვლილებების განხორციელების პროცედურა, სხვადასხვა ქვეყნის პრაქტიკა და საკონსტიტუციო სასამართლოს მიერ საკონსტიტუციო ცვლილებების კონსტიტუციურობის განხილვის უფლებამოსილების საკითხები. ღონისძიებას ესწრებოდნენ საქართველოს საკონსტიტუციო სასამართლოს მოსამართლეები, საერთაშორისო საზაფხულო სკოლის „კონსტიტუციური დემოკრატია: თანამედროვე გამოწვევები“ ორგანიზატორები და მონაწილეები.