ახალი ამბები

ამერიკის შეერთებული შტატების იუსტიციის დეპარტამენტის ნარკოტიკების წინააღმდეგ ბრძოლის ადმინისტრაციის (DEA – Drug Enforcement Administration) სპეციალური აგენტი როკო ჰერონი, აშშ-ს იუსტიციის დეპარტამენტის ნარკოტიკებთან ბრძოლის ადმინისტრაციის ქვეყნის ატაშე (საქართველო) ჯენიფერ სვიდერი, ამერიკა-საქართველოს მეგობრობის ასოციაციის პრეზიდენტი მელორ წიფურია და კაპრალ-სპეციალისტი თემურ დადიანი ბათუმის შოთა რუსთველის სახელმწიფო უნივერსიტეტის სტუდენტებს შეხვდნენ. როკო ჰერონმა ახალგაზრდებს პროექტი „მე ვირჩევ ჩემს მომავალს“ წარუდგინა და ნარკოტიკების მოხმარების შემცირების პოლიტიკასთან ერთად მისი გამოყენების უარყოფითი შედეგები გააცნო. შეხვედრაზე ყურადღება გაამახვილა ნარკოტიკული საშუალებების უკანონო გამოყენების შემთხვევებზე, მასთან დაკავშირებულ დაავადებებზე, დანგრეულ ოჯახებსა და ძალადობაზე.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა აკადემიური საბჭოს წევრებს, ფაკულტეტის დეკანებსა და ადმინისტრაციის წარმომადგენლებს 2018 წელს გაწეული მუშაობის ანგარიში წარუდგინა. საანგარიშო პერიოდში საქმიანობა ძირითადად წარიმართა ბსუ-ს სტრატეგიული განვითარების და რექტორის სამოქმედო გეგმების შესაბამისად, შემდეგი მიმართულებებით: სასწავლო პროცესიის სრულყოფა, სწავლა-სწავლების ხარისხის ამაღლება, სამეცნიერო-კვლევითი მუშაობის ხელშეწყობა, ინტერნაციონალიზაცია, სტუდენტთა მომსახურების გაუმჯობესება, წარმატებული ავტორიზაცია, საგანმანათლებლო პროგრამების აკრედიტაცია, მატერიალურ-ტექნიკური ბაზის გაუმჯობესება, ინფრასტრუქტურული და სოციალური პროექტები. რექტორმა ასევე, ყურადღება გაამახვილა მნიშვნელოვან საუნივერსიტეტო აქტებსა და ღონისძიებებზე. დეტალურად განიხილა ყველა ის მიღწევა და წარმატებული პროექტი, რომელიც უნივერსიტეტმა 2018 წელს განახორციელა.

ERASMUS+–ის ფარგლებში თსუ-ში პროექტის „საქართველოს უმაღლეს საგანმანათლებლო დაწესებულებებში სამეცნიერო კვლევების განვითარების ხელშეწყობა“ („Raising Research Capacity of Georgian HEI’s through Developing R&D Units/HERD“) პირველი სამუშაო შეხვედრა გაიმართა. ორდღიან შეხვედრაში მონაწილეობა მიიღეს რექტორის მოადგილემ, პროფესორმა ნათია წიკლაშვილმა (ლოკალური კოორდინატორი), სამეცნიერო კვლევების სამსახურის უფროსმა თამარ მაჭუტაძემ და სამეცნიერო კვლევების სამსახურის მთავარმა სპეციალისტმა თამარ ფოლადაშვილმა. ორწლიანი პროექტის მიზანია წევრი უნივერსიტეტების კვლევითი სამსახურების მოდერნიზაცია, კვლევითი პოტენციალისა და ხარისხის გაზრდა და პროექტში მონაწილე უნივერსიტეტებისთვის ერთობლივი კვლევითი პლატფორმის შექმნა.

ბათუმის შოთა რუსთაველის სახელმწიფო უნივერსიტეტი შვედური ინსტიტუტის მიერ დაფინასებული პროექტის “ინტერნაციონალიზაციის ინსტრუმენტების, პრაქტიკისა და პერსონალის კომპეტენციების მოდერნიზება სტუდენტზე ორიენტირებული სწავლების მხარდასაჭერად აღმოსავლეთ პარტნიორობის უნივერსიტეტებში – INTERTOOL “ კონსორციუმის წევრი გახდა. ერთწლიანი პროექტის ფარგლებში კონსორციუმის წევრი უნივერსიტეტების წარმომადგენლებისთვის ჩატარდება სპეციალური სემინარები ინტერნაციონალიზაციის ინსტრუმენტების გაუმჯობესების, საერთო პრობლემატიკის გამოკვეთისა და ახალი საპროექტო განაცხადების მომზადების მიზნით.

ბათუმის შოთა რუსთველის სახელმწიფო უნივერისტეტში საქართველოს რუსეთის მიერ ოკუპაციისა და ძალდატანებითი გასაბჭოების დღისადმი მიძღვნილი ღონისძიებები გაიმართა. სტუდენტებმა და პროფესორ-მასწავლებლებმა 1921 წლის მარტში საქართველოს ერთიანობისათვის დაღუპული გვარდიელების საფლავი ყვავილებით შეამკეს. პროფესორმა ოთარ გოგოლიშვილმა საჯარო ლექცია წაიკითხა თემაზე: „1921 წლის 25 თებერვალი საქართველოში“. ლექციის დასრულების შემდეგ კონფერენცია „აზროვნების განსაბჭოება“ ჩატარდა. სამეცნიერო სესიაზე მონაწილეებმა 1921 წლის 25 თებერვალს განვითარებულ მოვლენებზე დისკუსია გამართეს და ქვეყნის გასაბჭოების პროცესებზე იმსჯელეს.